Yohaannisi 13 - Mataafa Qulqulloota

Yesuusi akka tamaarewwaadi' loqqa jaqe

¹ Tin eta, a xayso nessuma a qaran tarpeeta a orra Yihuta tura desa Yesuusi ka saateta a oppa piisse' diisho ka Waaqa Aappa kapopa aano, akkima kayte upnaade ka isasene xaadi kodde piita qara ca jaalade. Ka haka piraampirati ishootta jaalade.

² Yesuusi isho tamaarewwaadi ollinni eetota qara caan. Innasene a Simooni Asqorottittase Yihuta' xoori, akka Yesuusi qapsiiso'e seetana karittaadi kara' dikatta a neeqa xaaye.

³ Waaqa Aappa akkima hupna ukkumeeta piisa ishi' daashe, ikka Waaqa kapa sooke ka de'e ka Waaqa kapopaaw tiitaawo Yesuusi i'upa.

⁴ Ka semmalla eetotase' qara xa'e ka ohaataadi alle' xaaye ka ohaata a paatan haqnaan qeede ka surrappa' hiddade.

⁵ Ka sekkammaayye wa kara' paata jaqannaan kara' pisha kishshe ka loqqa tamaarewwaadi jaqa paayye ka ohaatase paatan haqnaan a surraappandesa hiddaden loqqaasso quda haqe.

⁶ Yesuusi ete Simoon Peetiroosi kapa kayeeyye, Simoon Peetiroosi i'ishi' kide'e, “Poqallaay, hela ke ana' loqqa jaqa?”

⁷ Yesuusi ka ishi' kide, “Waan anti' koona, amma atti a' upto ma, kuli'i' matte qapnaatta.”

⁸ Peetiroosi ka ishi' kide, “Atti pakkanna loqqaayyo a' jaqto!” Yesuusi ka ishi' kide, “Oton an loqqaatti an jaqniniiyyi, ana olli qoottota a' qapto.”

⁹ Simoon-Petiroosi ka ishi' kide, “Poqallaay, oton asseeyye, loqqaayyo patta an jaqan ma, harkaayyo ka mattiyyo kuli jaqe.”

¹⁰ Yesuusi ka ishi' kide, “Nama dakintaadi jaqade, isha kumma quda qoota jureeta in kinnin malla, loqqa jaqatta mali wa pila ishi' parpaaccisni in caan. Ishina jureeta a' qaptan, ma a jureeta in qapnini ishin piisan.”

¹¹ Yesuusi wa malla kide, “A jureeta in qapnini ishin piisan,” qoota turanneew a isha qapsiiso upo malla.

¹² Ka ete ishootta' loqqa jaqe kammaayye, ohaataadi uwwisade ka poraadipa tiitaawe ka kuti'e ka ishootta' kide, “Waan ishina' kode immatte qapnaattene?

¹³ Ishina i'ana' kiinittane, ‘Kollissampayta ka ‘Poqalla’ ikkan dukaata. Anti keeto'en an kollissampayta ka an Poqallaay.

¹⁴ Ka asseeyye, oton anti Poqallaassin ka kollissampaytaayshin koddeeyye ka loqqaassin jaqeeyye, ishina asseew loqqa olli' jaqeeta ishin parpaaccisni.

¹⁵ Akkan anti ishina' kode mina'e, akka' kootane'en ishina' pahana akkisheey.

¹⁶ Anti dukaatannen ishina' kiini, orxayta poqallaadi qara in qapo, umma nama erkame, a erke qara in qapo.

¹⁷ Kati sede upnaannittan ka koonittan kiiteeyye, ishina a orra eeppisame.

¹⁸ Oton asse haasawannooyye, ishin piisa mallan. Anti ishina an reexade in upa ma xoori, qaalese a mataafa qulqulloota kiinitto ‘Nama laaqqotiyyo dame ana qara' paarkaalummaata' xa'e’ dikkatta isheetta parpaaccisni.

¹⁹ A sede in koddinin turan, waan malla amma turan qattishe ka ishina' lella, oto wessen koddan kammaayye, akka aynumiyyo amantan malla.

²⁰ Anti dukaatannen ishina' kiini, nama namase an anti erkino teyyanno, ana teyyanni; nama ana teyyannoow, isase ana erke teyyanniiw.”

Yesuusi, nama isha qapsiiso turanneew lele

²¹ Yesuusi ete asse kide kammaayye isi karan xata kupade ka kide, “Anti dukaatannen ishina' kiini, ishin oppaayye takka ana qapsiisa” Ka olkela ja'i kiishe ka lele.

²² Tamaarewwaadi ka qoota ayno desa akkima sede haasawade a in upnin malla, oli totooyyen.

²³ Tamaarewwaadi oppaayye isase a Yesuusi' jaalanno, takka Yesuusi quda' desa kuti'e.

²⁴ Simoon-Peetiroosi ka tamaarittase quda harkan kaye ka kide, “Qoota ayno desa akkima haasawade, intoonno isha kaassadooy.”

²⁵ Tamaarittase ka Yesuusi qudopa desa kide ka isha kaassade ka kide, “Poqallaay, ata ayno ke qapsiisa?”

²⁶ Yesuusi ka oorshe ka kide, “Nama an laaqqota wateetoppan qappado ka ishi' puukkisho, isha.” Ka asse kide ka laaqqotase wateetoppan qappade ka innasene a Simooni Asqorottittase Yihuta' puukkishe.

²⁷ Yihuta, puukkatta laaqqose puukkadenne, seetana eennow isha karopa kale. Yesuusi ka Yihuta' kide, “Wa' koda dikatte irra qara kode.”

²⁸ Yesuusi wa malla asse kide, orrase damta qara co oppaayye, nama ishi' kalte takka nefo in co.

²⁹ Yihuta qoota kaaja xaayno malla, tamaarewwaappaaye a demo, a Yesuusi Yihuta' kiino, “Wa xaysonessuma ino' parpaaccisna' pidde” Taakki “Teekolaya' kaaja daashe” ishootta' pahanaatte.

³⁰ Yihuta ka puukkatta laaqqotase puukkadenne, eennow sooke ka tawe. Letta nefo sitiiyyi halkeetta.

Ajaja haaraya

³¹ Ete Yihuta' sooke ka tawe kammaayye Yesuusi ikide, “Amma oori, inna a nama i'ulfeessamen, Waaqa kuli ka isha minan ulfeessame.

³² Oto Waaqa isha minan ulefeessameeyye, Waaqa ka isha ulfeessaaw ka a in jarrin mali isha ulfeessa.

³³ Hellaayyooyye, anti an ishin kapa a kuttati an jaro, ishina ka pora ana faatan. Akkiman ukkumampaya a Yihutaati kide'e, ‘Pora an anti opa anno opa deena a ettanissan’ mina'e, amma nefo asseewwen ishina' kiini.

³⁴ Akka oli jaalattane'e ajaja haarayan ishina' daanni, akkan anti ishin jaalade; mina'e ishina asseew oli jaalada.

³⁵ Oton oli' jaalannittaneeyye, akkima' tamaarewwaayyo kodditen, orra piisa sedenne upnaada.”

Yesuusi, akkima Peetiroosi isha marmado turanneew haasawade

³⁶ Se kammaayye Simooni-Peetiroosi ka Yesuusi kaassade ka kide, “Poqallaay, ayshopa anni?” Yesuusi ka ishi oorshe ka kide, “Pora an anti opa anno, amma ana kamma deena a ettanisso ma, kuli'i ana kamma' deeta.”

³⁷ Peetiroosi ka kide, “Poqallaay, maana mallan amma ke kamma' deena an ettaninnin? Anti ke mallan toota kuli isi daasha.”

³⁸ Yesuusi ka ishi oorshe ka kide, “Ke ana malla toota kuli isi daasha? Dukaatannen ke' kiini, awwe a lukkalitta in iyyinin turanne, sessaanne ana marmatta.”