Yohaannisi 12 - Mataafa Qulqulloota

Iskatteetase Yesuusi shittootan daatite

¹ A xayso nessuma qaran tarpeeta a orra Yihuta kayto'e, A kuyyaata lehi hasteeyye, Yesuusi Pittaaniyaapa aane. Pittaaniya paleetase a Alaasaarise a Yesuusi tootoppa xaashe kara kalo.

² Ikka eeyye eetota ishi koden. Maarta nefo ishootta'e paata deddehanni. Alaasaari nefo orra Yesuusi olliiyyi damta kuti'e oppaayye takka.

³ Sitiiyyi Maariyaami ka shittoota takka qoyra naartoosi patta oppaayye kodamte heraan akata kokkoka, a paka nitiroota mina kitto shuubbaan qeette ka loqqa Yesuusin daatite, ka nyirfaadi a mattatin quda haaqte, aluma ashittootasitika tikase piisa kela qiten.

⁴ Tamaarewwa Yesuusi oppaayye takka, Asqorottittase Yihuta isase kuli Yesuusi qapsiiso ka kide,

⁵ “Shittootose maana'e opani dinaara dippa sessa in kannin ka kaajaadi teekolaya'en qoonnin?”

⁶ Isha wa malla asse haasawade, qoota teekolaya suraysade mallan ma qoota kera kodde malla. Qoota qarateeta kaaja' xaayno ka kaaja a qarateese kara' xaayna quda hatanta kollade malla.

⁷ Yesuusi ka kide, “Kuyyaata an oppa hawlamo tura'e asse harmisatteey, isheetta diisha.

⁸ Teekolaya awta piisa ishin kapa caan, anti xoori awta piisa ishin kapa an caado.”

⁹ Sitiiyyi Yihutaatoppaayye orra lekayta ka akkima Yesuusi Pittaaniyaayye co upnaade ka eyyepa de'e, wa malla de'ene nefo, qoota Yesuusi patta mallan ma, Alaasaarise a Yesuusi tootoppa xaashe kuli akkeeta malla de'en.

¹⁰ Saarrasene a qeesewwa' xoori Alaasaari kuli ikassa'e oorsaden.

¹¹ Sede nefo qoota Alaasaari minan Yihutaatoppa lekya amanteetaaysho alle' diinnaan ka Yesuusi amannaan malla.

Yesuusi akkima ulfeenanne Yursaalamipa kale

¹² Parraytaadiiyyi, orra lekayta a xaysonessuma qaran tarpeetati de'e, akkima Yesuusi Yursaalamipa de'o dakaye.

¹³ Ka taamma Sampaapa qapade ka isha teyyatta' sooke ka nessa kuttishe ka kide, “Hosa'inna, nuqusa Isira'eeli a maxxa Poqallaatin deeno a eeppisamo!”

¹⁴ Yesuusi ka innayya harreeta akkade ka qara' kute'e. Sede nefo wa malla asse koddite,

¹⁵ xuumase taafame ka kiino, “Atti Yurusaalami katama Siyyooniti, in fuuran; tin nuqusaayti innayya harreeta' qare kute'e ka deeni” akka dikkado malla.

¹⁶ Tamaarewwa Yesuusi paayyota qaraayye sede ishootta in kalle ma ete Yesuusi ulfeenan moontopa fayyadeeyye, sede akka qootaadi desa taafamte ka ishi' koddite matte oorsaden.

¹⁷ A Yesuusi Alaasaari hawloppa hale ka tootoppa xaasheeyye, orra isha kapa co piisa qootaadi desa maakkummi.

¹⁸ Wa malla orra lekayta Yesuusi turopa ollopa sooke' nefo, qoota kodoose orra qawwanno a kode dakaye malla.

¹⁹ Sitiiyyi Feresaata ka olli' kiite, “Tin orra piita' piisa isha kamma anniiy. akkiman ino we takkan' nefo koda an ettaninnin i'akkinittane?”

²⁰ Etasene a xayso nessumaati, orra Yursaalamipa sakatatta aane oppaayye, orra Kirikki takka takka ca.

²¹ Ishootta ka Kelilaayye nama takka a katama Peete Sayda' kodde Filippoosi kapopa aanen ka ishi' kidene, “Poqallaay, Yesuusi akkeetan faaninna.”

²² Filippoosi ka aane ka turaayye Intiriyaasi' lele. Intiriyaasi isho Filippoosi ka ollin aanen ka Yesuusi' lelen.

²³ Yesuusi ka oorshe ka ishootta' kide, “Tin saateta a oppaayye inna a nama ulfeessaman ikayte.

²⁴ Anti dukaatannen ishina' kiini, uqqinteeta a kappa oton piitoppa'e in piinin ka in tooniniiyyi, xawwaati hasni. Oton itoota xoori lekaya dalli.

²⁵ Nama isi jaalanno isi patinni; nama piisse' qara isi needdino xoori caatta paraparati'i isi tooytini.

²⁶ Nama orxaytiyyo kodda heeno, a ana kamma de'o; pora an anti oppaayye co, orxaytiyyo eeyyew caada; nama orxaytiyyo kodde Aappa i'isha ulfeessa.”

Yesuusi akkima qoota rakkoota isho toota a isha qara' kayto desa haasawade

²⁷ Kamma' desa Yesuusi ikide, “Tin anti qaapannen kupade ka kuli maanan kida, hela in kida ‘Aappo, saatese kela anan pahe?’ Ma xoori akkan asse an kiinini'i, saatese a rakkoota mallan de'e;

²⁸ Aappo, maxxaayti ulfeesse!” Se kammaayye nessa a kiino, “Maxxiyyo in ulfeesse ka oppa' ooraaw ka ulfeessaaw” ka moonte xata dakaade.

²⁹ Orra eeppaayye qaqqa'anno ete nessoose dakayeeyye ikide, “Ha qaqawwa!” Ademo ka kidene, “Ha erkampattoota ishi' haasawade.”

³⁰ Yesuusi ka oorshe ka kide, “Ha nessoose ishin malla de'e diisheey, ana malla in deene.

³¹ Eta a oppaayye piisse' qara faratamta amma. Eta a oppaayye poqallasene a piissiti, seetana lakopa katamo nefo, ammaaw.

³² Anti oton piita qareela opeela qeedamooyye, orra piisan issipa tita.”

³³ Yesuusi wa malla asse haasawade, toota atta pahato akkima to'o akkissa malla.

³⁴ Orrase ka ishi' kide, “Wa seeroppa' taafame, anka akkininna, ikiini, ‘Kiristoosi haka paraparati kallaadaay,’ atti atta' kiini ‘Inna a nama fannisama ishootta faani?’ Innoosene a nama kan ayno?”

³⁵ Yesuusi ka ishootta' kide, “Amma eta shakkaya kara'e la'ayta ishin kapa caay, akka tukkanta ishin qare in qinnin turan, a la'ayta ishin kapa cooyye pora aana. Nama tukkantoppa pora anno, pora a opa anno in upooy.

³⁶ Akka hellaa la'ayta' kodditane'e, a la'ayta ishin kapa co oppanneew la'aytoseti amana.” Yesuusi ete sede haasawade kammaayye, i'aane ka ishootta tura dekade.

Yihutaata akkima in amannin

³⁷ Yesuusi kadi punu kodaddaasene orra qawwanna lekaya fuulaaysho' tura' kode nefooyye, Yihutaata isha in amanne.

³⁸ Sede nefo wa malla asse koddite, qaaletase a xuumampaytase Issayyaasi haasawade ka kide, “Poqallaay, ayno maakkuminno amane? hupna Poqalla ka ayno' akkaade?” akka dikkatto malla.

³⁹ Issayyaasi ka oppa' ooreew ka akkima in amannin upnayshe ka kide,

⁴⁰ “Akka ildaassotinni in akkinini'i, ka karittaaysho' kara matte in qapnaannini'i, ka desa in oorrin ikka ishootta in dininnini'i, Waaqa ildaasso' lulshe ka karittaaysho daka' kode.”

⁴¹ Issayyaasi wa malla asse kide, qoota ulfeena Kiristoosi akke malla qoota Yesuusi desa sede haasawade.

⁴² A koddito ma, saarra a Yihutaata kuli oppaayye lekaya Yesuusi amane ma, xoori akka Feresaata tikase a qinseeta a orra Yihuta kelaayye alle ishootta in daannini fuuren ka ildaappa desa ishi maakkuma diishen.

⁴³ Wa malla asse kodene nefo, qoota ulfeena a Waaqa kapa teyanno kapa a nama kapa teyanno jaaladen malla.

⁴⁴ Yesuusi ka nessaadi kuttishe ka kide, “Nama ana amanno, ana patta amanni in co ma, isase ana erke kuli amanni.

⁴⁵ Nama ana akkino, isase ana erke akkini.

⁴⁶ Nama ana amanno piisa akka tukkantoppa in kallaannini'i, anti la'aytan kodde ka piita qaropa de'e.

⁴⁷ Nama qaaletiyyo dakayo ka ishin kallaanni in kinnin a isha qara' farato anan. Anti piita dinissa'en de'e diisheey, piita qara' farata an deene.

⁴⁸ Nama ana tiinno ka qaaletiyyo teyyanni in kinnin qara'e a farato ca. Qaalese an anti haasawade isheetta kuyyaata piraampiratiiyyi isha qara' farata.

⁴⁹ Anti hupniyyo a ukkumeetatin an haasawanne; ma ajajose an anti lello ka haasawanno a ana' daashe, Waaqa Aappa isase ana erke.

⁵⁰ Ajajaadi nefo akka caatta parapara' kodde in upa. Semalla anti wa Waaqa Aappa ana' lele'en haasawanni.”