Yohaannisi 11 - Mataafa Qulqulloota

Alaasaari akka to'e

¹ Pittaaniyaayye nama takka Alaasaari kidammo paaqni; Pittaaniya paleeta a kara Maariyaami isho enentaaysho Maarta kalan.

² Maariyaamise nefo, isase loqqa Poqalla shittootan daatite ka nyirfaadi a mattatin quda haaqte. Alaasaarise paaqno nefo innaasso.

³ Tuparraasso ka Yesuusi kamma erken ka kidene, “Poqallaay, ha isase a jaalannitto ipaaqni.”

⁴ Yesuusi ete sede dakayeeyye ikide, “Paaqose isha ishsha deene ma, akka ulfeena Waaqa koddo, inna Waaqa ka se minan ulfeessaman malla.”

⁵ Yesuusi Maarta ka enentaaysho Maariyaami isho innaasso Alaasaari jaalanni.

⁶ a koddito ma, ete paaqa Alaasaari dakayeeyye, pora a oppa co oppa'ew kuyyaata lakki jare.

⁷ Ka sekkammaayye tamaarewwaadi kide, “Piita Yihuta opa amma annaaw.”

⁸ Tamaarewwaadi ka ishi kidene, “Kollissampayto, eta shakkaya turanne, Yihutaata dakaddaan ke dakkeeta faaniiy, ka kuli atti amma eyyepa tiitaawtaaw ka antaawwe?”

⁹ Yesuusi ka ishootta oorshe ka kide, “Kuyyaata takka, saateta kudanka lakkinni? nama kuyyaate pora anno, qoota la'ayta piisseti akkino malla, kehanni in co.

¹⁰ Ma xoori a halkeette pora anno, qoota la'ayta in qapnin malla, ikehaysanni.”

¹¹ Yesuusi ete asse ishootta' kide kammaayye, ikide, “Moottase xanno Alaasaari imukeey, anti mukittaappa isha xa'issa'en aana.”

¹² Tamaarewwaadi ka ishi' kidene, “Poqallaay, oton imukeeyye, i'ishi aknaatta kideeta.”

¹³ Yesuusi, qoota toota Alaasaari desa asse ishootta' haasawade, ishootta xoori, a qoota mukittaati desa haasawade ishootta' pahanaatte.

¹⁴ Seminan Yesuusi ka ishootta olkela jai kiishe ka kide, “Alaasaari ito'e.

¹⁵ Ishina akka amantane'e, sede an eyye an kinnin qootaayshin malla, xasa ana' dakaanni. Ma amma isha kapopa anna.”

¹⁶ Sitiiyyi Tomaasise Didimoosi kidammo, itamaarewwasene ata haseeti' kide, “Ino' nefo, akkan kollissampayta olli leeno'e, anna.”

Yesuusi akkima tootoppa xaana ka caatta kodde

¹⁷ Yesuusi ete eyye kayeeyye, Alaasaari a hawlame kuyyaata afuri kayte.

¹⁸ Pittaaniya Yursaalami kapa desa kiilomeetireeta sessa mina kitto'e seki.

¹⁹ Yihutaatoppa lekaya ka toota innaassoti malla Maariyaami isho Maartan paana'e ishootta kapopa aanen.

²⁰ Maarta ete deena Yesuusi dakayteeyye, isha teyyatta'e sookte. Maariyaami xoori tika kare haste.

²¹ Maarta ka Yesuusi kiite, “Poqallaay, katin ke are ca kiiteeyye, innaanno tooni in heenne.

²² Ma xoori amma nefo, wa qinsannitta piisa Waaqa akkima ke' daasho in upa.”

²³ Yesuusi ka isheetta' kide, “Innaassin tootoppa ixa'an.”

²⁴ Maarta ka ishi kiite, “Kuyyaata piraampiratiiyyi eta tootoppa kahaanaati akkima tootoppa xa'o in upa.”

²⁵ Yesuusi ka isheetta kide, “Tootoppa xaana ka caatta ana; nama ana amano, kadi punu to'ayye icaada.

²⁶ Nama co ka ana amanno piisa pakkanna in to'o. Sede i'amanni?”

²⁷ Isheetta ka kiite, “Aa Poqallaay, atti akkima inna Waaqa; Kiristoosi a piita qaropa deeno koddite in amanni.”

²⁸ Maarta, ete sede haasawatte kammaayye, i'ante ka enentaaysho Maariyaami dekandekatti haleete ka ishi kiite, “Ha, kollissampayta ide'e ka ke haleeni.”

²⁹ Maariyaami ete sede dakayteeyye, jarjartanne xaate ka Yesuusi kapopa ante.

³⁰ Sitiiyyi Yesuusi porase a oppaayye maarta isha teyyatte oppaayyeew ca diisheey, ata paleeta karopa in kulline.

³¹ Yihutaatase Maariyaamin paanitta deete ka tika kara kitto, ete Maariyaami jarjartan xaate ka sooknitto akkite, a hawwla Alaasaari qaropa pooyta annitto ishootta pahanaatte ikka isheetta kamma aanen.

³² Maariyaami ete porase a Yesuusi oppa co opa deete ka Yesuusi akkiteeyye, loqqaadi kela'e pi'ite ka kiite, “Poqallaay, katin are kitta kiite, innaanno asse tooni in heenne.”

³³ Yesuusi ete isheetta a pooynitto, isho Yihutaata isheetta olli deete a pooynitto akkeeyye, a kuttaati nyarrahe ka suraysade ka kide,

³⁴ “Ayysha'e isha mookten?” Ishootta ka kidene, “Poqallaay, xooye ka tooyye.”

³⁵ Yesuusi ka ilmaama urrqishe.

³⁶ Yihutaata ka kiite, “Akka isha jaalanno tooyya.”

³⁷ Ma xoori ishootta oppaayye a demo ka kidene, “Ini nama ilda in qapnin dinshe, namoose akka in toonini kodeeta in ettansho?”

Yesuusi akka Alaasaari tootoppa xaashe

³⁸ Yesuusi ka a kuttaati nyarraheetan hawlase kapopa aane. Hawlase nefo rahana, atura daka dufen.

³⁹ Yesuusi ka kide, “Alle tura dakoose maysha.” Enenta opa Alaasaari Maarta ka kiite, “Poqallaay, a to'e desa awwe kuyyaata afuri kayteey, ha ixaccada.”

⁴⁰ Yesuusi ka isheetta kide, “An ke an kiine'e, ‘Oton i'amanniiyyi, ulfeena Waaqa'e akkita?’”

⁴¹ Orrase ka hawlase turaayye dakase mayshe. Se kammaayye Yesuusi ka moontandela tooyyade ka kide, “Aappo qoota ana dakayte malla in ke kalataysanni.

⁴² Akkima awta piisa ana dakaynitto in upa, ma xoori waan malla asse kide, orrose areppa qa'ade akkima atti ana erkite akka amano malla.”

⁴³ Yesuusi ete sede haasawade kammaayye, nessa kuttishe ka kide, “Alaasaari! xooye sooke!”

⁴⁴ Alasaarise to'e ka akkima harkaadi isho loqqaadi hiddamenen hawlase kara sooke. Fuulaadi nefo akka japaran maramenneew ca. Yesuusi ka kide, “Quda fura ka tupa desa diisha ikka aano.”

Sullaata a Yesuusi qara sulamte

⁴⁵ Yihutaata Maariyaamin paana deete oppaayye lekaya ka wa a Yesuusi kode akken ka isha amanen.

⁴⁶ Demo xoori, Feresaata kapopa aanen ka waasene a Yesuusi kode ishootta lelen.

⁴⁷ Se minan saarra qeesewwa isho Feresaata ka firtishoonkota ollopa halen ka kidene, “namoose wa orra qawwanna lekaya kooniiy, an atta isha koono wayyi?

⁴⁸ Oton assen isha diinnaayye, orra piisa isha amana, orra Roomi ka de'a ka tikinno a qulqulloota isho samaytinno piisa pashsha.”

⁴⁹ ishootta oppaayye nama takka parkoose a saara qeesewwa kodde Qayyaaffa ka kide, “Ha ishina, we takkan nefo a uptan!

⁵⁰ A samayta piisa pato kapaaye, a nama takka samayta malla to'o akkima ishina wayyi a upnaanne?”

⁵¹ Isha sede a haasawade, iskaraayye in qeenne ma; qoota parositiiyyi saara qeesewwa kodde malla, akka Yesuusi samayta malla toota isha parpaaccisnitto akkissa'e xuumose haasawade.

⁵² Wa malla to'a nefo, samayta patta mallan ma, hellaasene a Waaqa olkela pase ollopa oorissa takka kodeeta malla.

⁵³ Ka semmalla awseti desa paayyen ka Yesuusi ikassa suladen.

⁵⁴ Awwseti desa paayyatte Yesuusi orra a Yihuta turan desa akkaattaan in anne ma, eeyye xa'e ka katamasene Efreemi kidamma koommayta kapa ca opa aane. Ka eyye tamaarewwaadi olliiyyi jare.

⁵⁵ Sitiiyyi xayso nessuma a qaran tarpeeta a orra Yihuta kela'e foolsatte, orra lekayta ka xayso nessumoosen a qaran tarpeeta in kaynin turan isi jaqqeeta piitaddaappaayye Yursaalamipa de'e.

⁵⁶ Ishootta qoota tika a qulqullootati qa'aden ka deena Yesuusi asannaan malla; ioli kaassanni ka kiini, “Maana dikannittan, hela Yesuusi a xayso nessumoosen oppopa de'o ishina in pahato?”

⁵⁷ Se maliiyyiiw saarra qeesewwa isho Feresaata akka Yesuusi qapeeta ettanshane'e pora a isha oppa co nama upo oton icaayye akka ishootta akkisho'e nama piisa ajajen.”