Yohaannisi 10 - Mataafa Qulqulloota

Yesuusi akkima sikimayta fayya' kodde

¹ Kamma desa Yesuusi ikide, “Anti dukaatannen ishina kiini, nama moona kahirra karopa xarra maliiyyi pora pilaatin kullino, kera ka sarampayyta.

² A xarran kullino xoori, sikimayta kahirra.

³ Nama xarra tooytino nefo i'isha tura pana. Kahirraadi ka nessaadi dakayan. Isha ka kahirraadi maxxa maxxan hala ka tura qata ka lakopa sooksha.

⁴ Ka otoo kahirraadi lakopa sooksho kammaayye, ishootta tura qata ka aana; kahirraadi ka qoota nessaadi upan malla, isha kamma aanan.

⁵ Nessa anama pila qoota in upnin malla, alle tura qahan diisheey, kammaayye in aanan.”

⁶ Yesuusi pahanoosene ishootta' lele; ishootta xoori wa isha haasawade matte in qapnaanne.

⁷ Se malla Yesuusi ka oppa oore ka ishootta kideewwe, “Anti dukaatannen ishina kiini, anti an xarra kahirra.

⁸ A ana turan de'e piisa kerewwa isho xolma toomaay, umma kahirra ishootta in dakayne.

⁹ Xarrase ana, nama an oppan kallo idina ka kulla ka sooka ka pora deetta nefo akkada.

¹⁰ Kera, hatanta ka qalatta ka patissa patta'e deeni. Anti xoori, akka ishootta caatta akkadan ka caatta immakkoota qapnaadane'en de'e.

¹¹ “Sikimayta fayya ana; sikimayta fayya kahirraadi malla toota'e isi daanni.

¹² Sikimayta a kaharra xaadi in koddinin ikka xaayyaan piddame ka dawwino ka sikimayta dukaata in koddinin, xoori oto Yoyta deeno ikka akkooyye, kahirra alle diinni ka kapa qahani, yoytase ka kahirraappa qapni ka olkelan pasinni.

¹³ Sikimayse wa malla qahana qoota xaayyaan piddame ka kaharra dikanni in kinnin malla.

¹⁴ Sikimayta fayya ana; anti kahirraayyo in upna; kahirraayyo nefo ka ana upan.

¹⁵ Akkima Aappinno ana upo, annti ka isha upo mina'ewwen ishootta upa ka ishootta malla toota isi daanni.

¹⁶ Kahirra apila a xelloose oppa in kinninin qapaaw; ishootta kuli qeedeeta ana parpaaccisni; ishootta nessiyyo dakayan ka xelloota takka koddan; sikimaytaaysho nefo takkaaw.

¹⁷ “Akkan kuli oorsado ka teyyado'e, qootan caattiiyyo daanno malla, Waaqa Aappa ana jaalanni.

¹⁸ Anti heennaayyonnen caattiyyo daanni, diisheey, a ana qara qeedo takka nefo in co. Anti caattiiyyo daassata ka oorsatta ka teyyatta'e, hupna ukkumeeta'en qapa. Ajajoose nefo, aappinno qaran teyyade.”

¹⁹ Haasoosen qaran xaate'e, Yihutaata ka lakki olli qiteew.

²⁰ Ishoottoppa lekaya ka kidene, “Isha orritta qapa ka taaronniiy, maana'e isha dakkaysannittan?”

²¹ Ademo ka kideneewwe “haasoosen, afa nama a kara orritta co oppa sookna'en. Orritta inama a qara ilda paten dinissa ettaninni?”

Yihutaata akkima in amannin

²² Yursaalami karaayye xayso nessuma a oppaayye tika qulqulloota harayannaan ulfeessinaane kayte. Etosen nefo soroora.

²³ Yesuusi ka tika qulqullootati silayta a kelandesa annaan a Selemooni kelan desa pora anni.

²⁴ Sitiiyyi Yihutaata ka Yesuusi kapopa ollopa deete ka ishi kiite “Haka aytamiti akkan kara lakki dikanno koota? Atti oton a Kiristoosiiyyi, olkela la'ayshe ka ino' lele.”

²⁵ Yesuusi ka ishootta oorshe ka kide, “Ha anti in ishina' lelli; ishina xoori a amanni a kittan. Koda an maxxa Aappinnootin koono, isha qootiyyo desa maakkummi.

²⁶ Ishina xoori, qoota xelloota a kahirraayyo oppa a qapnin malla, a amanni a kittan.

²⁷ Kahirraayyo nessiyyo dakayni, anti nefo ka ishootta upa; ishootta nefo ka ana kamma deeni.

²⁸ Anti caatta parapara'en ishootta daasha; umma pakkanna in patan, umma nama takka nefo harkiyyo oppaayye ishootta in ponqo ka in teyyado.

²⁹ Aappinno a ishootta ana daashe piisa qara qapa; umma harka Aappinno oppa a ishootta ponqo ka teyyatta ettansho takka nefo in co.

³⁰ Ana isho Waaqa Aappa, an takkan.”

³¹ Sitiiyyi Yihutaata ka Yesuusi dakka'e lammatta dakada pohatteew.

³² Yesuusi ka ishootta kide, “Waaqa Aappa kapa kodadda papaxxaara lekayan ishina akkisheey kodaddoosen oppa a xaame malla ana dakkinittan?”

³³ Ishootta ka ishi oorshen ka kidene “Waan malla ke dakkinninna, qoota Waaqa qara afa otitta haasawatte malla. diishe, qoota kodaayte a paxaara mallan. Sede nefo a ati nama koddite ka Waaqa isi koote malla.”

³⁴ Yesuusi ka ishootta kide, “Seeraayshin oppa itaafamte ka kiini, ‘In kide, ishina a waaqadda.’

³⁵ Semmalla mataafa qulqulloota shaareeta in koddito; oto mataafa qulqulloota isaasine a qaaleta Waaqa ishootta deeteeti ‘waaqadda’ kide ka haleeyye,

³⁶ ka kuli isase a Waaqa Aappa xawwi reexxe ka piita qara opa erke, qoota kide ‘an inna Waaqa,’ malla, maana'e isha kiinittane ‘Waaqa qara'e qaaleta otitta haasawanni?’

³⁷ Anti oton koda Aappinno'en an kooni an kinniniiyyi, anan amanan.

³⁸ Oton koda Aappinno'en kooniiyyi xoori, kadi punu ana a'amanni a kinniniiyyi, kodiyyo amana. Sedenne akkima Waaqa Aappa anan co, anti ka Waaqa Aappan co fayya upnaattaneey.”

³⁹ Ishootta ka amma isha qapa fadeneew, isha xoori harkaaysho oppa passade ka tawe.

⁴⁰ Yesuusi a lammattati kirra Yurtaanoosi tuulleew ka porase a paayyota Yohaannisi oppa pishaan orra jaqqino opa aane ka eyye jare.

⁴¹ orra lekayta ka isha kapopa de'e ka kide, “Ha Yohaannisi wa orra qawwanna takkan nefo in koone ma, wa qoota namooseti desa haasawade piisa dukaataaw.”

⁴² Eeyye orra lekayta ka isha amane.