Yohaannisi 1 - Mataafa Qulqulloota

qaaleta caatta

¹ Paayyota qara qaaleta ca. Ini qaaleta kidamo nefo Waaqa kapa ca, qaalese nefo Waaqa.

² Isha paayyota qaraayyew Waaqa kapa ca.

³ We piisa ka ishannew uumamen; umma wa uumame pisa oppaayye wa isha mali uumame takkan nefo in caan.

⁴ Caatta ishan caade. caattose nefo kan la'ayta orra.

⁵ La'ayta tukkantoppa'e ila'ayni, umma tukkanta la'aytan punni in kitto.

⁶ Nama takka Waaqa kapa erkame Yohaannisi kidammo ca.

⁷ Akka maakkumaadi qudan nama piisa amano'e, isha qoota la'aytati desa maakkitta kodde ka de'e.

⁸ Isha qoota la'aytati desa maakkuma de'e diisheey, isha mattaadi la'aytan.

⁹ La'aytase a dukaata nama piisa la'ayno, siti piita qaropa deena qara ca.

¹⁰ Isha turan piita qara ca, piita nefo ka ishannew uumamte. Piita xoori isha in upnaanne.

¹¹ Isha sanynyeetaadi kapopa de'e. Sanynyeese xaadi xoori isha in teyyanne.

¹² a kodditoma, orra isha teyyade ka ma''aadi amane piisa'e, mapteeta a ishin hellaa Waaqa koddane ishootta daashe.

¹³ Ishootta nefo Waaqa oppa daladen diisheey, sanynyeeta nama taaki heenna a nama oppaayye in dalanne.

¹⁴ Sede qaaleta kidame nefo, nama kodde ka daassata Waaqa isho dukaata immakaade ka otantinno oppa kallaade. Ino ka a inna sene takkan a aappa ulfeena, a'appaaysho kapa qapan akkine.

¹⁵ Yohannise ka maakkummi ka kiini “Isaase an ishina lele ka kide ‘Ini ana kammaayye de'o qoota ana turan co malla, a kuttati ana qara qapa.’ Tin ini isha.”

¹⁶ Daassatase xaadi a Waaqa eyye immakaatte oppaayye, ino piisantin daassatase a Waaqa qara'ew daassata Waaqa teyyanne.

¹⁷ Seera, Muuse qudanne daasame, daassata Waaqa isho dukaata xoori Yesuusi Kiristoosi qudanne de'en.

¹⁸ Nama Waaqa akke takka nefo in co. a koddito ma, innasene xaadi takkan Waaqa Aappa kapa ca, patta isha la'ayshe.

Maakkuma a Yohaannisise pishaan orra jaqnooti

¹⁹ Ukkumampaya Yihuta ayno akkima kodde akka isha kaassadane'e, ete Yursaalamiiyyi desa qeesewwa isho Lawaata Yohaannisi kapopa erkeneeyye; maakkuma a ishootta daashe sede arepa xata co.

²⁰ Isha in marmanne ma, imaakume ka kide, “Anti an Kiristoosin.”

²¹ Ishootta ka isha kaassaden ka kidene, “Ka kuli atti a ayno? Hela a Eeliyaasi?” Isha ka ishootta oorshe ka kide, “Inna!” Ikka kideneewwe, “Hela atti a xuumampaytase kiinaane ‘Ide'a’ ?” Isha ka kideewwe, “Inna!”

²² Ishootta ka isha kideneewwe, “Ka kuli, atti a ayno? Akkan orra ino erke malseeta oorinno'e, atti qoota mattaaytiti desa maana' kiini?”

²³ Isha ka kide, “Akka xuumampaytase Issayyaasi haasawade mina'e, anti an nessa namase koommaytoppa ullupno ka kiino, ‘Pora Poqalla qajeelshaati.’”

²⁴ Orrose Feresaata kapa erkame.

²⁵ ka semmalla isha kaassade ka kide, “Atti oto a Kiristoosin taaki a Eliyaasi, taaki a xuumampaytase kiinaane ide'a, a koddininiiyyi, kuli maana'e pishaan orra jaqqini?”

²⁶ Yohaannisi ka ishootta oorshe ka kide, “Anti pishaannen orra jaqqini ma, takka a ishina a upnini ishinoppa qa'anni.

²⁷ Isha ana kamma desa de'a, umma anti an teeppa xopaadi mikka isha kelaayye fura mina an qanne.”

²⁸ Sede nefo katamasene a Pittaaniya kirrase a Yurtaanoosi a karaayye Yohaannisi pishaan orra jaqqinooti kama disiti ca kara'e asse koddite.

Laaha Waaqa

²⁹ Parraytaadiiyyi Yohaannisi, a Yesuusi isha kapopa deeno akke ka kide, “Tin laahase a Waaqa juppoota piita alle pashsho.

³⁰ Namase an ishina' lele ka kide, ‘A ana kammadesa de'o, qoota ana turanneew co malla, a kuttati ana qara qapa.’ Ini isha.

³¹ Anti nefo mattiyyo'e turan isha an upnaanne ma, akka isha samayta Isira'eeli tura akkaado'e anti pishaan orra jaqqaannen de'e.”

³² Kamma desaaw Yohaannisi imaakkume ka kide, “A Hapura Qulqulloota moonte xata a elela mina lekkanno ka isha qara kutiinon akke.

³³ Anti mattiyyo turan isha an upo ma, isase akkan pishaan orra jaqqo'e ana erke, isha ana' lele ka kide, ‘Nama a Hapura Qulqulloota lekkanno ka isha qara kutiino a akkito, namoose, isha Hapura Qulqullootatin orra jaqqa.’

³⁴ Anti ka sede akke ka semmalla akka isha inna Waaqa kodde maakkummi.”

Tamaarewwa a Yesuusi a paayyota

³⁵ Parraytaadiiyyi, Yohaannisi tamaarewwaadi lakki olliiyyi eyye qa'ade.

³⁶ Yohaannisi ka Yesuusi a eeppa desa tarpino akke ka kide, “Tin laahase a Waaqa!”

³⁷ Tamaarewwasene a Yohaannisi lakki ka a Yohaannisi asse kiino dakayen ka Yesuusi kamma aanen.

³⁸ Yesuusi ka desa tiitaawe ka ishootta a isha kamma deena akke ka ishootta kide, “Maana faanittan?” Ishootta ka ka isha kidene, “Repi, atti ayshaayye kalta?” (Repi kideese nefo, “Kollissampayto” kideeta.)

³⁹ Isha ka ka ishootta kide, “Xooya tooyya.” Ikka aanen ka pora oppa kalo akken ka kuyyaaseti isha olli nakayen. Siti nefo letta saateta kudan mina'e kitta.

⁴⁰ Tamaarewwasene wa a Yohaannisi haasawade dakaye ka Yesuusi kamma aane oppaayye, takka Intiriyaasi inna a opa Simooni Peetiroosi.

⁴¹ intiriyaasi paayyota qara innaasso Simooni kapopa aane ka ishi kide, “Ha ino Mesihin akkane!” “Mesihi” kideese nefo, Kiristoosi kideeta.

⁴² Se kammaayye intiriyaasi ka Simoonin Yesuusi kapopa de'e. Yesuusi ka Simooni tooyyade ka quda ilda kode ka ishi kide, “Atti a Simooni a inna Yoona ma, arepa desa ‘Kefa’' kidamta.” (Kefa kideese nefo, Peetiroosi taaki shila kideeta.

Yesuusi akkima Filippoosi isho Naatina'eli hale

⁴³ Parraytaadiiyyi, Yesuusi piita Kelila opa anta heena ka Filippoosi akke ka ishi kide, “Ana kamma' xooye.”

⁴⁴ Filippoosi a intiriyaasi isho a Peetiroosi mina'en nama katama Peetesayda.

⁴⁵ Filippoosi ka Naatina'eli akke ka ishi kide'e, “Ha ino isase a Muuse qootaadi desa mataafa seera oppa' taafe, xuumampaya kuli ka qootaadi desa mataaffa a xuuma oppa taafenen akkanne. Isha nefo inna Yoosefi, Yesuusise a katama Naasirati.”

⁴⁶ Naatina'eli xoori i'ishi kide, “Katama Naasirati kara wa paxaara te'atta i'ettanshane?” Filippoosi ka ishi kide, “Xooye tooyye!”

⁴⁷ Yesuusi ka a Naatina'eli a isha kapopa deeno akke ka qootaadi desa haasawade ka kide, “Tin nama Isira'eeli a dukaata, a darta kara in kinnin.”

⁴⁸ Naatina'eli ka ishi kide, “Aysha ana upnaatte?” Yesuusi ka isha oorshe ka kide, “A Filippoosi ke in haleenin turanne, a qoyra hilteeta kela kittooyyen ke akke.”

⁴⁹ Sitiiyyi Naatina'eli ka ka kide, “Kollissampayto, atti a inna a Waaqa! ka a nuqusa Isira'eeli!”

⁵⁰ Yesuusi ka kide, “Hela atti qootan ke kide'e, ‘Aqoyrase a hilteeta kela kittooyyen ke akke’ malla amante? Wa sene qaropa qapa'e amma akkita.

⁵¹ Anti dukaatannen ishina kiini, a moonta panamto, erkampattowwa Waaqa ka inna a nama qareela fayyannaan ka lekkannaane akkitan.”