Yayqoopi 5 - Mataafa Qulqulloota

Dehama a tura desa teyantoolaya' daasame

¹ Ammaaw ishina' teyantoolayaayye! xooya dakkaysada; qoota rakkoota kokkoka ishin qara' kayto malla, ullupa ka pooya.

² Teyaantaayshin piisa ijapjapte, mehaddaassin a' kalsannittane itteeta dame.

³ Warqeetaayshin ka dakaraayshin a pirreeta ijaljaltoode. Jaljaltoose nefo maakkitta ishin qara' koddita. Ka akkima apitta mina dakintaayshin kupta; kuyyawwosene a piraampira' qaraayye, teyaanta kuttayteeta ollopa tuulatten.

⁴ A kodditoma ferampaya a dullaassin oppa feraappa nakayeeti' qoota' xaayyaasso a' daanin malla, tin ullupitta lelatta'e dakaanni. Poqlase we piisa ettaninno ka ullupitta a ferampayooseneti' dakaye.

⁵ We' piisa ishin tura' pure akka issi patta kallaatten ka a horeeta a qalama meerte mina'e isi meerissen.

⁶ Ka hanqeellitta qara' dartan faratten ka ikassen; umma isha ishin mineela in tooyyanne.

Deena poqalla a lammatta duupattaan asatta

⁷ Amma oori hellaanno a kiristaanatiiyyi! haka Poqalla deeno kara'e duupattaan asada. Qotampayta haka piitaadi roopa para isho a hakayta akkannitto kara'e duupanni ka miillatase heraan kokkoka a piitaadi palannitto asanni.

⁸ Ishina' nefo, asseew duupada ka japaada. Kuyyaata deena Poqalla idehaateey.

⁹ Hellaanno a kiristaanatiiyyi! akka ishin qara in faratammini'i, oli qara an qoojqoojan, tin faratampayta eta a oppa de'o idesa kayteey.

¹⁰ Hellaanno a kiristaanatiiyyi! xuumampayasene maxxa Poqallaatin haasawade, rakkoota duupattan akka ishna' pahana kodden upnaada.

¹¹ Semaliiyyiiw sene duupattaan japaadeeti'i, “A eeppisame'en” kiininna. Iyyoopi atta akkima duupade iddakayten ka piraampira qaraayye, waasene' paxaara a Poqalla ishi' kode akkiten. Ka sedenne Poqalla akkima duupattampayta ka suraysattampayta kodde akkiten.

¹² Hellaanno a kiristaanatiiyyi! we' piisa qaropeela, moonta taaki piita taaki wa pila takkan nefonne in xaxadan. Haasaassin oton “Aayye” a dukaatan “aa” kodden. Otoon “inna''iyyi” a dukaatan “inna''i” koddito. Oton asse in koddininiiyyi i'ishin qara' faratamta.

¹³ Ishin oppaayye, nama a qara' rakkoota kayte oton icaayye, a Waaqa qinsado; oton a xasa ishi' dakaanno caayyeew, a Waaqa kalataysattaan sammaro.

¹⁴ Ishin oppaayye, oton nama paaqno caayye, a qimaya tika kiristaana iskapopa halaado, ikka maxxa Poqallaatin sayteetan isha' daaten ka ishi Waaqa qinsaden.

¹⁵ Qinseeta asse pahato ka amanteetan kodamte paaqolayata dininni; Poqalla ka paaqoose oppa isha dininni. Oton juppoota a kode caayye, ikka ishi' diisammi.

¹⁶ Semmalla akka' dintane'e, juppootaayshin oli tura' lelada ka olli' qinsada. Qinseeta a hanqeellita nama, wa kutta'e kooni.

¹⁷ Eeliyaasi xanno mina'ewwen nama, ma xoori akka roopa in roopnini'i, ete a kuttati qinsadeeyye, para sessa ka paka kara'e piita qara' roopa takka nefo in roopne.

¹⁸ Ete oppa' oore ka qinsadeeyyeew roopa ka roope. Piita ka unta palasse.

¹⁹ Hellaanno a kiristaanatiiyyi! kadi ishin oppa nama takka saanta dukaata' qara maqqaayye, a pila ka saanta dukaata' qaropa isha oorshaayye,

²⁰ namoose' juppoolaytase saanta qaropa oorinno, akkima toota kela napseeta namoosetitin pahano ka juppootaadi a koopte akka ishi' hasto' koono a upnaado.