Yayqoopi 4 - Mataafa Qulqulloota

Neequmta piita' jaalatta diissata

¹ Oranna isho peeqqa a ishin kara ca ayshaayye deeni? Xajeeltase xaayshin a so'a dakintaayshin kara desa torpinitto qudaayyenne?

² We takkan akkatta'e, ixxajeellittan umma a akkanni a kittan ka semmalla nama ikannittan qoota Waaqa a qinsanni a kinnin malla wa' faanittane a akkanni a kittan.

³ Kadi punu Waaqa qinsannittaneeyye wa malla qinseetaayshin ishina oorri in kinnini, wa Waaqa qara qinsattene qoota xasaayshin a so'a qara nakassa'e dikatta a neeqan qinsannittan malla.

⁴ Ishina amanammi in kinninitiiyyi! nama piita jalanno akkiman paarkaala Waaqa a' uptane? Semmalla nama piita jaalanno piisa paarkaala Waaqa'e koddini.

⁵ Sede a mataafa qulqulloota' kiino'e, “Hapurase a Waaqa ishin kara' xaaye, akkan isha patta kallaanno'e a kuttati' xajeelli.” hela Patta'e asse kide?

⁶ Ma xoori mataafa qoota kiino, “Waaqa, ispeepampaya toorri ka naalaya' daassataadi daanni.” malla, daassata a Waaqa daanno piisa qara qapta.

⁷ Semmalla, Waaqa' piddama ka seetana ikkisada; isha i'ishin kapa qahaay.

⁸ Ka Waaqa kapopa dehaada; isha i'ishin kapopa dehaadaay. Ishina' juppoolayaayye! harkaassin jaqada; ishina dikatta lakki qapaatiiyyi! karittaayshin qulqullaysada.

⁹ Ka qaapa ka nyarraha ka pooya; xosaltaayshin a pooytoppa pursamto, xasoottaayshin ka nyarrahatopa ooro.

¹⁰ Poqalla tura' xata isi shakkisha, isha opeela ishin qapaay.

Nama qara' farata diissata

¹¹ Hellaanno a kiristaanatiiyyi! oli in haasawan. Nama a nama haasawno taaki nama qara' faranno, seera haasawni ka seera qara' faranni. Oto seera qara' farannittooyyew, faratampayta' koddite diisheey, seera a' tooytaanni a kitto.

¹² A seera daanno ka faranno Waaqa takkayta patta. A dinissa ka patissa ettaninnoow, isha patta ka kuli ke a nama qara' faranno, atti a ayno?

¹³ Ishina a kiinaa'e awwe taaki parri katama asse paha opan anna ka eeyye para takka kallaanna ka nakatanna ka tookta qeenna isi tooytaada.

¹⁴ Wa parri kodda a uptan; caattaayshin maana? Ha ishina a qayanqayootase shakkayteeta akkaannitto ka kamma pannitto mina.

¹⁵ Sekkapaayye laadi wa kida ishin parpaaccisnitta, “Kati heenna Waaqa' koddinitta anka kallaanninnaayye, ini taaki sede in koona.”

¹⁶ Ishina' xoori, a'asse kiitan kapaayye, ispeepaassina' jeejjannittan; jeejja asse paha piisa ka neeqi.

¹⁷ Semmalla nama wa paxaara' kodeeta a upo kapa kooni in kinnin, sede a koda diishe, juppoota isha qara' koddini.