Yayqoopi 3 - Mataafa Qulqulloota

Arrapa tooytaatta

¹ Hellaanno a kiristaanatiiyyi, ino a kollissampaya kodde akkiman firteeta a jaallitto teyyanno i'uptaneey, ishin oppaayye lekaya kollissampaya in koddinin.

² Ino' piisantiiyyin a lekatin ishin dapninna; nama haasaadippa ishin dapni in kinnin, isha nama qajan qapnin a dakintaadi tooytaatta ettaninno.

³ Farta akka ino' ajajamto'e, afaappa'en ishi' luukaama kalinninna ka pora an heennopa ishin anninna.

⁴ Markapa kadi punu kuttiiyyi ka puppeeta a hupna qapton tuukammaayye, nama markapoose qullo, pulampayta shakkaytanne, pora isha aako opa qulli.

⁵ Akkimoose' mina'ew arrapa dakintoppa meela a shakka ma, wa kukutta'e jeejjaanni. Apitta shakkayta, mura kuttayta kupni.

⁶ Arrapaw, apitta mina; arrapa wa akata neeqa a meellaanno a dakinta oppaayye ca ka dakintinno nyalinni. Ka apitta a kahannami kara xaano mina'e santa kallaatinno' piisa kupni.

⁷ Nama pinaana a piita qara ca' piisa ka xampira ka uumata a piitan desa titmanno isho a pakateeta kara lellehno piisa iskelopa oorsatta ettaninni ka iskelopa oorsade.

⁸ Ma nama a'arrapa iskelopa oorsatta ettaninno in co. Isha wa neeqa a hadda nama ikannaatin immakaade. Ka nessuma in qapnin.

⁹ Ishannen Waaqa Aappinno kalataysanninna ka ishanneew orrase pahana Waaqatin uumame jiijninna.

¹⁰ Afa takkan karaayye, kalata ka jiija sookni. Hellaanno a kiristaanatiiyyi asse kodda parpaaccisni in kitto.

¹¹ Hela ela, takka karaayye pisha paxaara isho a neeqa ipaadini?

¹² Hellaanno a kiristaanatiiyyi, qoyra hilteeta idalta ekerta dala ettaninni? Taaki'iw dishima wayneeta, idalta hilteeta' dala ettaninni? Ka asseew pisha a neeqa oppa a paxaara deena i'ettaninni?

Ookuma piita isho a moonta

¹³ Ishin oppaayye, nama ooka kodde ka qalpeeta qapo ayno? Koda a ookuma ka naalumaan kode, a kallaataadi a paxaaratin akkisho.

¹⁴ Ma xoori, oto yoota haddaawnitto isho isi patta jaalatta karittaayshin kara caaneeyye, isi in jeejjan ka dukaata qara' darada an kodan.

¹⁵ Ookuma asse paho, piita ka so'a isho seetana kapa deeni diisheey, Waaqa kapa deeni in co.

¹⁶ Pora a oppa yoota isho isi patta jaalatta caan oppaayye, horayta isho' koda neeqa piisa caanni.

¹⁷ Ma xoori, ookuma a Waaqa kapa deeno, paayyota qaraayye, qaja in qapo; kamma'eew a nakayta jaalanno ka a paxaara ka a ajajammo ka a diissata koono ka a dalta paxaaratin immakaade, a karaayye olqaran orra jaalissa isho pappahanassa in kinnin.

¹⁸ Orra nakayta ollopa orra jaalanno, nakayta aylaanni ka dalta hanqeelluma' feranni.