Yayqoopi 2 - Mataafa Qulqulloota

Akka teekolayta puyatta parpaaccisni in kinnin

¹ Hellaanno a kiristaanatiiyyi, oton Yesuusi Kiristoosi, Poqallasene a ulfeena'e amannittaneeyye, nama takka takka qara qapa in kidan ka orra olqara an jaalshan.

² Pahanaa'e, nama lakki pora a opa ollopa annittanepa de'a; takka teyantoolayta a jifeeta warqeeta qupitta quda qapo ka mehadda paxaara a sira qapa' kalsade, A pila'ew teekolayta ka mehadda a kere ka jureede' kalsade.

³ Akka namase mehadda paxaara ka sira qapa' kallsade ulfeessitan ka ishi' kiitane, “porose paxaara oppa kuti'e,” Ka teekolayta' kiitaneewwe, “Atti eeyye' qa'ado taaki loqqaayyo kela' kuti'e.”

⁴ Ka kuli sedenne akka orra olqara jaalinnittan ka firteeta qatayma' farannittan ishina akkaanni in kitto?

⁵ Ishina a jaalatame hellaanno a kiristaanatiiyyi, dakkaysada! Waaqa, akka amanteetan teyaantolaya koddan ka mankisteetase a orra isha jaalanno' kippeeta' daashe lehadane'e, teekolaya piisseti in reexanne?

⁶ Ishina' xoori teekolaya' puyannittan, a ishin miiddina ka tika firteeta opa ishin tinna, teyantoolayaanne?

⁷ A maxxase a ulfeena a ishina ishin halaammittan onna, ishoottanne?

⁸ Seerase a mankisteeta Waaqa mataafa Qulqulloota oppa' taafame ka kiino, “Nama piisa a mattaayti' mina' jaalado” Kati' tooytannittan kiiteeyye, a paxaara'e' koonittan.

⁹ Oto orra olqaran jaalinnittan xoori, juppoota' koonittan ka qoota' seera qepissen malla akka qootisammittan.

¹⁰ Nama kadii seera piisa tooytada ka oppa takka qepshaayye, akka piisa qepshe kapa'e dikammi.

¹¹ Poqallasene “In dahalan (in dahalsadan)” kide ishaaw kide, “In ishshan” Semmalla kadi punu a' dahallin/a dahalsannin' nefooyye, oton in nama ikasseyye, isseera qepisse

¹² Akka orra seerase nata orra sookinno turopa dehaado ka firteeta akkado mina haasawada ka koda.

¹³ Firteeta Waaqa nama nama diissata kooni in kinnini, diissata kooni in kitto. a kodditoma diissata firteeta punni.

Amanteeta ka koda

¹⁴ Hellaanno a kiristaanatiiyyi, nama kadi kida, “Amanteeta in qapaayye,” Ka amanteetaadi koda paxaaran akkinni in kinniniiyyi, maana isha qara nakassa? Hela amanteetaadi i'isha dinissa ettanissa?

¹⁵ Pahana'e kati inna kiristaana isho enenta kiristaana a wa damane ka uwwisadane' dape caaneeyye,

¹⁶ Ishinoppaayye nama takka ka a wa kallaata ishootta parpaaccisna ishootta in daannin maliiyyi, ishootta' kida, “Nakaytan aana ka foolsada ka duttanaayye,” maana ishootta qara nakassa?

¹⁷ Amanteeta a koda paxaara in qapnini, amanteeta a toote.

¹⁸ Ma xoori, kadi nama a kiino, “Atti amanteeta' qapta anti ka koda paxaara qapa.” Caayye, in ishi' kida, “Atti amanteetaayti koda quda mayshe ka ana' akkishe;” Anti, amanteetiyyo kodiyyonnen ke akkishaay.

¹⁹ Atti i'amanni ka kiini “Waaqa takkayta ca” Sede ipaxaari, a amanteetatidesa orriyya kuli amanni ka fuuraan xarri.

²⁰ Atti eepo, amanteeta akka koda maliiyyi a we' nakanni in kinnin koddite a akkini a kitto?

²¹ Aakkinno Aprihaami a innaadi Hisaaqi poqa kalisoota' qara' kalisoota' dehaysheeyye, kodaannen hanqeellaawne?

²² Semmalla amanteeta akka kodaadi quda kitto ka kodaan immkkoota koddite, a akkini a' kitto?

²³ Mataafa Qulqlloota qara qaalese kiinitto, “Aprihaami Waaqa amane amanteetaadi ka hanqeelluma ishi' dikamte” Idikkatte Aprihaami ka seden mootta Waaqa' kodde.

²⁴ Semmalla nama akka amanteeta pattan hanqeellaawni in kinnin ka koda kulin hanqeellaawno i'akkini.

²⁵ Sharmuutitteetase Re'api, ete orrase erkame a Isira'eeli tikaadipa teyyatteeyye ka akka pora pilaatin kalane' kooteeyye, isheetta kodaadin in hanqeellaawne?

²⁶ Dakinta a kara napseeta in kinnin akkiman dakinta toote mina'e, amanteeta koda in qapnin, asseewwen amanteeta toote.