Yayqoopi 1 - Mataafa Qulqulloota

¹ Erkana ana Yayqoopi, orxaytase a Waaqa isho a Poqalla Yesuusi Kiristoosi kapaayye, kaffaasene kudanka lakki piita piisa qara' paseeti erkame. Nakayta a ishina' koddo.

Amanteeta isho ookuma

² Hellaanno a kiristaanatiiyyi! oto ekkaysuma ika lekayta ishin qara' kaynaaneeyye, akkima wa ishin xasanna' teyten kapa' dikada.

³ Ekkaysuma amanteetaayshina akkima duupatta ishina' qeedan, i''uptaneey.

⁴ Duupattaan japaattayshinaaw a we takkan nefo ishina'en qajinin mali a qaja dape ka immakkoota koddeetoppan a ishin kayo.

⁵ Ishin oppaayye nama a ishi ookuma qaje oton icaayye, a Waaqa qinsado; Waaqa i'ishi' daashaay. Isha' xoonampayta Waaqa, a fuula in quu'inin mali a nama piisa xoona daannooy.

⁶ Ma xoori, nama amanteetan qinsado diisheey, karitta lakki in kodannin. Nama karitta lakki qapo, pisha a pakateeta qara xayxaytan daysamma ka yaaqyaaqna'e paha.

⁷ Nama asse paho, a Poqalla kapa we teyo ishi in pahanaannin.

⁸ Sede nefo qoota karitta lakki qapo ka saantaadi qara arepa ka arepa kiino malla.

Xasa a teekolayta ka a teyantoolayta

⁹ Inna a kiristaana a kallaatoppaayye harkan shakka, qoota Waaqa isha kuttisho malla a xasoodo.

¹⁰ Teyaanta nama akka pisa jabba' mina, qoota sehnitto malla, inna kiristaana a harkan kutta, oto Waaqa kallaataadippa xata isha shakkinnooyye, a xasoodo.

¹¹ Atoota oto awdinittooyye, jabba kokinni, pisaadi ka sehni; paxaarumtaadi ka panni. Teyantoolayta nama'ew oto kodaadi kammaaw keerannooyye, asseew panni.

Ekkaysuma nama qara' kayna

¹² Nama ekkaysuma duupanno ka oppa japaanno qoota xalaalasene a caatta a Poqalla kodayteetaadin orra isha jaalanno' daasha' teyo malla i'oloode.

¹³ Waaqa qoota wa neeqaatin ekkaysatammi in kinnin ka isha karaayye nama takka nefo ekkaysanni in kinnin malla, nama oto ekkaysatammooyye, Waaqa ana ekkaysade in kiinin.

¹⁴ Ma xoori nama piisa, matta mina'e oto xajeelta a mattaaditin titamo ka sassapatamooyye ekkaysatammi.

¹⁵ Sekkammaayye xajeelta oto hittooyye juppoota dalli. Juppootaaw oto kuttattooyye toota dalli.

¹⁶ Ishina a jaalatame hellaanno a kiristaanatiiyyi! In sassapataman.

¹⁷ Dassata paxaara isho saka a qaja in qapnin piisa, Waaqa kapa deeni. Ka Waaqase a kaatta mina tittiitaawa ka puppursama isha kapa in kinnin Aappase a la'ayta kapa deeni.

¹⁸ Waaqa akkan uumata piisa tura a paayyota' koddino'e, heenna mattaadi qara'e qaaleta dukaatatin ino xaaye.

Wa dakayene koda qara nakassa

¹⁹ Ishina a jaalatame hellaanno a kiristaanatiiyyi, sede an teyman; nama piisa a dakkaysatta' jarjarro ka haasawatta isho' miira'e, a jarjarri in kinnin koddo.

²⁰ Miira nama, hanqeelluma a Waaqa qeenni in cooy.

²¹ Semmalla nyela isho neequmta piisa alle' pashsha. Ka qaalese a Waaqa karittaayshin kara' dishe, isase ishin dinissa ettanisso naalumaan teyyada.

²² A qaalese koda qara nakanna' kodda diisheey, a isi sassapanna ka dakayna patta in koddan.

²³ Nama qaalese' dakayno ka koda qara nakanni in kinnin, nama a fuulaadi kaawwatoppa tooyyanno mina,

²⁴ Namoose oto fuulaadi kaawwatoppa tooyyado kammaayye, i'anni ka wa paha eennow teymini.

²⁵ Nama seerase qaja in qapnin ka nata orra sookinno dakayno ka qanqannissa kara qorro ka teymini in kinnin ka koda qara nakanno, nama a kodaadin sakame kodda.

²⁶ Nama afaadi tooytaanni in kinnin ka kiino, “Waaqan waaqaysanni” isi sassapanni; waaqaysattaadi nefo paata patta.

²⁷ Amanteeta fuula Waaqa Aappa' tura qaja in qapnin ka in nyallin hella a aappadaasso isho a ayyadaasso qara le'ene ka iskatta a diiraasso qara le'ene rakkootaaysho oppa qaarqaareeta ka nyela piisseti kela is tooyteeta.