Xuuma Yoonaasi 4 - Mataafa Qulqulloota

Diissata Waaqa ka tana Yoonaasi

¹ Yoonaasi' qoota wa Waaqa kode' qaran xaate nyarrahe malla; harmo'e miiroode.

² Ka Waaqa qinsade ka kide, “Oo Waaqqo, waasene an disi piitinnooyye cooyye kide ka minan Terseesipa alle' pate sedenne? Atti akkima' diisammpayta ka suraysattampayta koddite ka miira'e a' jarjarri a kinnin ka jaalalaan immakaatte ka waasene' neeqa a' qeeda dikatte alle' diinnitto turanneewwen upa.

³ “Oo Waaqqo! Amma oori caatta kapa toota ana' wayyiiy, alle ana ishshe!”

⁴ Waaqa ka Yoonaasi' kide, “Hela yoonaasi hakaseti' miirootta ike parpaaccisni?”

⁵ Yonaasi ka katamasene a Nenewwe kara alle' sooke ka katamasenetiiyyi qinda piirtota opa aane. Ka shaakka issi' qupade ka kela' qaa'e. Ka wa Waaqa orrase a Nenewe' qara' qeeda eeyye desa tooyni.

⁶ Waaqa Poqalla ka akka shaakkaasene a Yonaasi' qupade' qara'e dahanta a dehto ka qaropa saarto ka atoota kela ishin pahato ka kaatta ishi' koddito kode. Ishi ka dahantose malla harmo' xasoode.

⁷ Letta a lammattati paraappanne, Waaqa ka munaata harmishe ikka saartotase a dahanta' damte, ikka kokte.

⁸ Ete letta piirteeyye, Waaqa ka xayxayta qinda piirtota a orra xaalanno erke; atoota ka dikke awdite ka mattoppaxata Yoonaasi xoopa paayyite. Ikka liiba kaye ka kideewwe, “Caatta kapa toota ana' wayyi.”

⁹ Waaqa ka ishi' kide'e, “Hela dahantose' toote malla' miirootta ike parpaaccisni?” Yonaasi ka kide, “Aa, haka tootati' miirootta i'ana parpaacciisni.”

¹⁰ Waaqa ka ishi' kide'e, “Atti dahantose akkamma a' yaallin ka a' kuttinnin, a kuyyaata takka oppa' dehte ka kuyyaata a lammattati toote' suraysatte.

¹¹ Hela xawwi anti orra a katamoosen kutta a Nenewwe kara kalo ka nama kuma dippa kunda lakki qara qapo, sene akkittaaysho isho pittittaaysho olkela in upnin, ishootta ka horeetase' xaaysho' leka' suraysatta ana parpaacciisni in kitto?”