Xuuma Yoonaasi 2 - Mataafa Qulqulloota

Qinseeta a Yonaasi' qinsade

¹ Yoonaasi karitta murkuja' kareela Waaqa Poqallaadipa qinsade ka kide,

² “Oo Waaqa! Eten rakkadeeyye keepan ullupade! Atti ka ana dakayte. Hiwwalaallasene' seka a si'ooli kareelan kepa ullupe, akka ana dakayte ka ana' oorisse.

³ Ka xati kirittase' seka a pakateeta' karopa alle ana katte; pisha ka ana kapa tiitayshen; pishasene a pakateeta ka ana qarandesa kuuminni

⁴ anti in kide, ‘Fuulaayti turaayyen alle' katame; a koddito ma xoori, amma nefo tikase' xaayti a qulqulloota iltiyyon akka an diisho.’

⁵ Pisha ka ana qara piren; hiwwalaallasene' seka a pakateeta ka ana kapa tiitayshen; korleeta a pakateeta ka matta qara ana' maramte.

⁶ Anka porase a xati kiritta irrowwa pakateeta kara co, karopa loqame ka haka piraampirati akka nama a hidame mina' kodde. Ma xoori atti Waaqa Poqallaayyo, hiwwalaallasene' seka karaayye ana' sookisse.

⁷ Waaqa, eten' nessa diisata kela' foolsadeeyye, dikattiyyon kepa oorsade ka kepa ullupade; qinseetiyyo ka tikase' xaayti a qulqulloota illi moonte kitto' dakaatte;

⁸ orrase killowwaan kallaanno, diissataayti alle' tiite

⁹ ha Waaqa dinshampayta, semmalla anti xasannen kalata ke' dehaysha; ka kalisoota ke' kalsha ka xasase an daasade dikkisha.”

¹⁰ Waaqa ka murkujase Yoonaasi loqe ajaje ikka pishaappaayye laka qaropa isha tufe.