Xuuma Yoonaasi 1 - Mataafa Qulqulloota

Yoonaasi akka Waaqa' ajajama tiite

¹ Awta takkaayye Waaqa Yoonaasi inna Amitaayi'i haasawade ka kide,

² “Yoonaasi xa'e ka katamasene kutta a Nenewwe opa aane ka salishe ka kide, neequmtaayshin a' koonittan piisa in akke.”

³ Yoonaasi' xoori ete sede dakayeeyye, Waaqa turaayye piita Terseesi opa pata' xa'e. Yonaasi ka katamasene Iyyoobbe kidamma oppa orra markapa kara anta'e kaaja daasanno opa aane ka kira daassade ka terseesipa anta'e markapoppopa fayyade ka anta' xa'e.

⁴ Waaqa ka pakateeta qara'e puppeeta kutta' xaashe. Pishasene a pakateeta ka olkelan yaaqyaaqni. Markapase ka oori qepa kaye.

⁵ Orrase markapa kara co piisa ka fuure. Nama ka xaadin Waaqaadipa ullupa paayye ka akka markapa sholla'ado'e, mehadda kara ca' piisa alle pakateeta karopa dakken. A wossen piisa koddinaaneeyye, Yoonaasi kaatasene otanta markapa' kara ca' kara'e mukitta oppa tawe.

⁶ Saarase a markapa ka Yoonaasi kapopa aane ka ishi' kide, “Ata xawwi atti atta asse mukte? Akka ino an pirammini Waaqa ka inon paho'e, xa'e ka Waaqaaytipa ino' qinsado! Takka punu akkan an pannini'i, Waaqa i'ino suraysadaay.”

⁷ Orrase markapa kara co piisa ka olli' oorsade ka kide, “Xooya qoyritta katanna ka rakkoose' nama minan ino qara' kaynitto upnaanna.” Ete qoyrittase' katadeneeyye, qoyrittase ka Yoonaasi qa'e.

⁸ Ikka oori ishi' kidene, “Rakkoose' neeqa ayno minan akka ino qara' kayte ino' lele. Ata kodaayti maana? Ayshaayye' deete? Piitaayti kan aysha? Taakki atti a sanynyeeta ayno?”

⁹ Yonaasi ka oorshe ka kide, “Anti an nama Ipru ka Waaqa poqallase a moonta isase piita isho pakatewwa uumen waaqaysanni.”

¹⁰ Orrase' nefo ka akka turan ishootta' lele mina'e, akkima fuula Waaqa' turaayye panno upnaaden ka akata mali fuuren. Ka ishi' kidene, “Ata maana'e wa asse paha' koote?”

¹¹ Puppeetase kello harmo'e pakateeta yaaqyaaqissa qara kitta, orrase ka isha kaassade ka kide, “Akka puppeetose ino' jaw kiito'e, an maana ke qara' koono ke' wayyi?”

¹² Isha ka kide “Puppeetose kutta akka dapiyyo minan ishin qara' kaynitto in upaay, pakateeta karopa alle ana kata, puppeetose' nefo i'ishin qara jaw kiitaay.”

¹³ Orrase' xoori isha kata kapaayye kamkama qudopa markapase' oorissa'e hupnaayshotin harmo ekkayshen. A koddito ma, pakateetase' qoota akata yaaqyaaqnitto malla, imalaalen.

¹⁴ Ikka oori Waaqopa ullupen ka kidene, “Oo Waaqa, wa' jaalatte'e' kooteey, namoose kapa'e akka toota ino qara'e a' farannin ka diika qulqullittoseti ino qara a' faanini'in ke qinsanninna.”

¹⁵ Ka sekkammaayye Yoonaasi qeeden ka pakateetase oppopa katen. Puppeetase pakateeta qara' xaate ka jaw kiite.

¹⁶ Orrase ka piisantiiyyi akata Waaqa fuure ka kalisoota Waaqa' kalshe ka xasa ishi' daasade.

¹⁷ Waaqa ka murkuja akata kutta akka Yoonaasi loqo' harmishe, ikka isha loqe. Yonaasi ka karitta murkuja kara'e, kuyyaata sessa ka halkeetta sessa pire.