Xuuma Taani'eeli 8 - Mataafa Qulqulloota

Akka Taani'eeli kelashaatoppan laha ka qolpayta akke

¹ A Piltasoori' nuqusume para sessattati anti Taani'eeli kelashaata an turan akke malin a pila akkeew.

² Ka akkan piita Elaamiti katamasene a Suusa kawwattan kapa qorrame kara kirra Ulaay kapa' qa'ade kelashaatoppan isi akke.

³ Ka kirroose kapa'e, laha a kaassa deddera lakki qapo akke. Kaassosen lakkippa takka kamma desa dehe ma, deruma a taaka qara qapa.

⁴ Anka akka laahase kaassosen xaadin qinda dumaatati ka a tupatta isho a qutatta opa paata tottoommo akke, pinanta takka nefo ka isha tura' qa'atta malaalte umma a issin paha malla tura qaha ettanshe in caan, ikka wa ishi aaka' kooni ka kuttatta ka koopaanneew anni.

⁵ An eeyye dikattaappa cooyye, qolpayta a miintoppa arta ildaadi kara kaasa kuttayta qapo ka qinda dumaatati xata sooke ka piita lakki' mitte ka a uruuritta opa keerittan de'e.

⁶ Ka laahase kaassa lakki qapo ka kirra kapa' qa'ade kapopa miira kuttan keerrade.

⁷ Ka laahase qara' miirode ka kapopa desa heeqqe ka toome ka kaassasene lakki piisa qara alle' qeqqepshe. Umma laahase isha mina' qa'atta in ettaninne ikka oori laahase piitopa kate ka oppa diddiite. Umma wa laahosetin paha ettanshe takkan nefo in ccaanne.

⁸ Qolpaytase ka akata isi kukuttishe, ete koopeeyye, kaasase' xaadi kutta ka qara qepe; kaassa afuri a qinda afuripa oore ka pakkaadippa' dehen.

⁹ Kaasa shakkayta ka kaassasene oppa takka qara' dehe ka qinda tupatta ka a piirtota isho qinda piitase paxaara opa akata kuttade.

¹⁰ Ka moontandela kuttade ka lekna moonta, kapa kaye ka hikka oppaayye lekaya piitopa sehshe ka qara diddiite.

¹¹ Ka saarase a lekna moonta kuli ekkaysade ka kalisootase kupannitto kuyyaata piisa dehaannitto kuli nyalshe.

¹² Leknase ka kaasaseti isi daashe, pakka kalisootase kupnaan a kuyyaata piisa dehaannitto oppa'e, neequmta ka kodammi. Kaasase ka a amanteeta dukaata' piitopa dite; wa koona' piisa ka ishi' qajeelen.

¹³ Sekkamma anka a qulqullowwaappa takka' haasawanno dakaye. Qulqullitta pila ka isase' haasawanno' kide, “Hela wossene kelashaatoppan qoota kalisootase kupnaan a kuyyaata mina' dehannittooti desa akkaade ka qoota neequmtose a nyala koddite desa akkaade ka sede a tika qulqulloota isho lekna qara diddiitammo desa akkaade aytami dikkadan?

¹⁴ Ikka ana' kide, “Teykanta isho kallapta kuma lakki ka dippa sessa kamma dikkadan; sekkamma tika qulqlloota iqulqullaawta.”

Erkampattootase Kepreeli akkima kelashaatase maana kodde olkela la'asse

¹⁵ Anti Taani'eeli eten kelashaatase akke ka maana akka koddite upnaatta fadeeyye, wa nama paha'e ana tura' qaade.

¹⁶ Nessa nama ka kirra Upaali kareela kiini “Kepreeli! namooseti kelashaatose maana akka kodde lele.

¹⁷ Ete erkampattootase Kepreeli kidammitto deete ka ana kapa' qa'atteeyye, anti in tammaqe ka piitopa pi'e; erkampattotase ka ana' kiite “Atti inna nama kelashaatose akka kuyaata piraampira lello upnaado!”

¹⁸ A erkampattootose asse ana' haasawannittooyye in tammaqe ka piitopa pi'e ka isi an upnin. Ikka oori ana quda qapte ka piite ana xa'isse ka ana qa'atisse.

¹⁹ Ka ana' kiite “Kelashaatose akka Waaqa piraampira qara kuyyaata qapade oppa erkannaata qeedo desa akkinnitton ke' lelli.

²⁰ “Laahose kaassa lakki qapo a akkite nuqussa a Medooni isho a Faarisi'i akkinni.

²¹ Qolpaytaaw, nuqusa Kirikki'i akkinni. Kaasoose kutta arta ildaadi kara miintoppa coow, nuqusa Kirikki; a paayyota' nuqusumo akkinni.

²² Kaassosen afuri pakka kaasase qepe oppa' dehe'eew mankisteetose akka pora afuri' qootamto ka kuli hupnan ise takka a turan kitto kapa qajane akkinni.

²³ Oto juppoota koopto, ikka dikkatta a sapana nuqussaseneti' kaytooyye, nuqusa a amanammi in kinnin, nyiraamayta, sassapampayta xa'a.

²⁴ Ma akata kokkonnaada ma isha issinni in kokkonnaado ka dapa a akata neeqa koda; wa koona' piisa ka ishi' qajeelan; ikka xormewwa isho qulqullowwa kuli alle' pashsha.

²⁵ Isha' qoota ilattuma neeqa' qapnaado malla, sassapa ka ishi' salan. Ikka isi peepa paayya ka orra we takkan nefo is qara in upnin lekayta alle' pira ka nuqusa nuqussa ekkaysada ka oori hupna nama' mali asseew pata.

²⁶ Kelashaatose a' qoota kalisoota a tekkanta isho a kallaptati desa akkite maana akka koddite wa a' dakayte, dukaata ma xoori qoota sapanna kamma oorshaati koddito malla isi kara' qapado.

²⁷ Anti Taani'eeli akatan kafade ka kuyyawwa lekaya ishin paaqe. Ka sekkamma xa'e ka kodiyyo qaropa oore. Ka qoota kelashaatoseti desa akata oppa' qawwaawe umma maana akka koddite ana kalli in kitto.