Xuuma Taani'eeli 7 - Mataafa Qulqulloota

Pinaana afuri a keleshaatoppa Taani'eeli akkaade ka wa koddene

¹ A nuqusase a Paapilooni Pelishasaari' nuqusume para paayyotati, a Taani'eeli mukittopa cooye olsa olsoode ka keleshaata kuli akke ka wa akke' piisa taafe.

² Ka kide, “Halkeese an mukeeyye keleshaatoppannen xayxayta a qinda piisa desa de'e ka pakateetase kutta yaaqyaaqinnon akke.

³ Pinaana kukutta ka oli in pahanini afuri ka pakateese kara sooken.

⁴ Pinanta a paayyota sookte, karma pahata ka xoolla a kawwaarayta paha qapta. Xoollasene' xaadi ka an eeyye tooynooyye quda shukamen. Pinantase ka a nama' mina'e, loqqa lakkin ela qa'atte, dikatta nama ka ishi' daasame.

⁵ Pinanta lammatta'ew pinanta takka ‘Dipi’ Kiinaane pahata ka qandaasattaan eeyye' qa'ade ka lafa qiniyya sessa afaappa qapta. Nessa kiinoo'e, ‘Fayya' qa'ado ka so'a a' dama ettaninnitta' piisa dame.’ Ka ishi' lelame.

⁶ Sede kamma'ew, pinanata pila a qayranta pahato ka tultaadippa xoolla a xanpira' paha afuri qapton akke. Pinantose matta afuri qapta siltaana mukissa kuli ka ishi' daasame.

⁷ An eeyye tooyyannooyyeew pinanta afratta ka sookteew. Pinantoseew akata kokkoki ka orra fuurinni ka nama tamaqinni ka ilka sipla a kukutta' qapta ka ishin wa qapta' piisa moojni ka dammi. Ka a damtaadi kela haste oppa diddiinni. Pinantose' qoota kaassa kudani qapto malla, pinaana an turan akke oppa xawwayteeta.

⁸ An eyye kaassosen xaadi quda tooyaappa cooyye, kaasa pila shakkayta ka arta kaassaseneti kara' dehe; kaassaasene turan ca oppa sessa ka tura seehen. Kaasose shakka ilda a nama isho afaa a isi peepaan haasawanna'e qapa.”

Kelashaata qoota isase xattaaw eeyye kalooti desa akkaade

⁹ An asse eeyye tooyaappa cooyye alkada ka afamen isase' xattaaw eeyye kalo ka qara' kuti'e. Ohaataadi a apteenta' mina'e ati, nyirfaadiiw, akka fuuttota' mina'e ati, alkasene isho loqqasene a alkaseneti akka apitta a opayno ka hapulpulo'e pahan.

¹⁰ Apitta ka sufaanetose' kela xata a malxa a pisha' mina urqini; isha orxaya kumadda lekaya' dikamma'e qapa; orra kumadda kundadda' dikammo ka isha tura' qa'ade. Firteeta ka faratama paayyite; mataaffa kuli ka panamen.

¹¹ Anka haasasene a isi peepa a kaasase haasawanna dakaye ka tooyni; pinantase ka qapamte ka ete ishshen kamma akka kupatto ka dapatto'e, apittoppopa katamte.

¹² Pinaana a pila'ew hupnaaysho a ukkumeeta'e alle qara qeedame; pinaanoosen qara siltaana qeedame diisheey haka xooraasso' kaynaan kara'e, eeyye diisamen.

¹³ Anti anka halkeette kelashaatoppan a inna nama' paho ka moonte urrattoppa deeno akke. Ikka isase haka parraparati' kallaanno turopan aanen.

¹⁴ Ka akka samayta piitadda leka oppa kalo ka sanynyewwa ka orra afadda karkar haasawanno piisa isha kela' piddamo'e, siltaana ka nuqusuma isho hupna mukissa ka ishi' daasame. Mankisteetaadi umma pata in qapto, mukissaadi umma in dikkado.

Kelashaatose maana akka kodde

¹⁵ Anti Taani'eeli eten kelashaatose akkeeyye in tammaqe dikatta ka ana kara' koope.

¹⁶ Anka orrase eeyye qaqqaade oppa takka kapopa desa heeqqe ka wossen piisa maana akka kodden qara kaassade. Isha ka wossen maana akka kodden ana' lele.

¹⁷ Ka ana' kide, “Pinaanoosen afuri, akka mankistewwa kukutta afuri piita qara' xa'ane akkinni

¹⁸ Ma xoori qulqullowwa a Waaqase kuttati'i mankisteese lehada ikka haka paraparti a xaaysho' koddita.

¹⁹ Sekkammaayye anka qoota a pinantase a afratta, a taakane oppa xawwayteeta koddite desa upnaatta fade; pinantose akata orra fuurinni ka wa akkatta' piisa ilkasene' xaadi a siplatin ka shololoqasene' xaadi a silpa pooratin qeqqepinni ka oppa nyifni ka dammi ka a kela hasso loqqaan qara diddiinni.

²⁰ Akkimoose' mina'ew, anka qoota kaassaasene kudani a pinantose' qapta ka kaasase shakka kamma desa dehe, isho kaassaasene sessa kaasase shakka tura seeheti desa upnaatta fadeew. Kaasoose shakka ilda isho afa qapo ka a kaassa piisa qaran qapto akata orra fuurinni ka isi peepaan haasawanni.

²¹ An sede tooyaappa cooyye, kaasase shakka ka qulqullowwa oli torpen, ikka ishootta pute.

²² Ka haka isase haka paraparti' kallaanno deeno ka qulqullowwasene a Waaqati' dukaata murro kara'e jare. Ete dukaatase' muramteeyye qulqullowwa ka mankisteetase' lehaden.

²³ Isha ka olsasene ana' fure ka kide “Pinantose a afratta, mankisteeta a afratta'e xa'a kideeta. Mankisteese mankistewwa piisa oppa xawwayteeta koddita ka piita piisa isi kelopa oorsatta ka yooqta ka piddita.

²⁴ Kaassa kudaniiw, mankisteetose kara'e nuqussa kudani xa'a. Ishootta kammaayyeew, nqusa xawwayta kodde xa'a ka nuqussasene kudani oppa sessa qara pira.

²⁵ Ka Waaqase kutta kuli qara isi peepa ka qulqullowwasene a Waaqase kuttati kuli rakkacciisa ka seeraaysho isho xayso nessumadaasso kuli alle' purissa fada. Qulqullowwa ka haka para sessa ka a pakati ishi' piddaman.

²⁶ Sekamma a moonteeyye dapa ka dukaata mura ka suafaaneta qara' kuti'an ka nuqusase qara siltaana qeedan ka haka paraparati alle isha pashshan.

²⁷ Siltaana ka kuttumta isho hupna mankistewwa mukissa ka oori moonte arepa xata piita piisa qara'e, qulqullowwasene a Waaqa kuttati' daasama, mankisteetaaysho ka haka paraparati' kallaatta, mankistewwa a piita qara ca' piisa ka ishootta' piddaman ka ishootta' ajajaman.

²⁸ Olsa an olsoode areppa ooran; anti Taani'eeli qootosete desa akatan fuure, qootan tammaqe malla, miinta ka ana tupa poornaatte. A koddito ma anti wossen piisa isi kara'ewwen qapade.