Xuuma Taani'eeli 6 - Mataafa Qulqulloota

Akka Taani'eeli qaawa karmada karopa katame

¹ Taariyoosi mankisteetadi piisa qara'e taanynya dippa ka kunda lakki shuuma fade.

² Ka akka orroose mukissampaya kodde qara tooyan ka isha nuqusa kuli qaarqaarane'e, Taani'eeli isho nama lakki saarra' kode.

³ Taani'eeli' qoota saarra isho saarrasene a mukissampaya' piisa qara kodaan jaale malla, nuqusa mankisteetaadi piisa qara'e isha shuuma dikade.

⁴ Sitiiyyi mukissampayasene isho orrase a isha' qara saara koddino wa qudan Taani'eeli xasasane faani; Taani'eeli' xoori' qoota akata isi tooytaanno ka nama amaname kodde malla, isha qara' dapa takka nefo akka in ettaninne.

⁵ Ka oori olli' kidine, “Qoota amanteetaaditi desa diisheey dapa pila Taani'eelise' qara' teya an ettaninno.”

⁶ Sekkamma tanynyada isho saarrasene a mukissampaya ka olli' kalen ka nuqusa kapopa aanen ka ishi' kidine “Nuquso Taariyoosi! Para kuma nuqusume.

⁷ Ha ino a mukissampaya mankisteeta kodde ka siltaana kukutta qapa ka tanynyada isho orra dehaamta dehaammo piisanti akka amma paayyatte haka kuyyaata kunda sessaati'i, nama takka nefo ke mali nama pila taaki Waaqopa qinsado akka qaawa karma karopa katamo'e, nuqusa kapa akka ajaja sooko ka salisamo'en olli' kalle.

⁸ Semmalla nuquso, ajajoose a salisamo ka akka seera Metooni isho a Faarisi' mina'e akka kokkonnaado ka in pursammini'i, ajajoose' taafsiise; ka kamma' kobbeeta toomme.

⁹ Taariyoosi ka oori ajajoose' taafsiise ka kamma' kobbeeta toomme.

¹⁰ Taani'eeli kadii punu akka ajajoose' taafame, kobbeeta ka kamma' toommamte dakayeeyye, fooqotaadi qaropa fayyade. Maskootewwa fooqetaadi qinda Yursaalami opa panama ka akka turan kuyyaatoppa sessaan qinsanno mina'e, Waaqaadi tura kilpiippanni ka kuyyaatoppa' sessaan Waaqa qinsanni ka isha kalataysanni.

¹¹ Orrase ka aane ka akka Taani'eeli Waaqa qinsanno ka naappanno akke.

¹² Ka piisanti nuqusa kapopa Taani'eeli xasasa aanen ka kidene, “Nuquso haka kuyyaata kunda sessaati nama ke maliiyyi, nama pila taaki Waaqopa qinsado akka qaawa karma karopa alle' katamo'e atana issalacciiste ka kobbeeta kuli kamma' toommite pahata?” Nuqusa ka ishootta oorshe ka kide, “Aa dukata, akka seera Metooni isho a Faarisi pursammi in kinnin mina'e, akka in pursammini'i saleeta isalisamte.”

¹³ Ishootta ka oori nuqusa' kidine, “Ha nuquso, orrase piita Yihutaati poojame oppa takka ‘Taani'eeli, kiinaan’ Ke isho ajajaayti puyade ka kuyyaatopa sessaan Waaqaadipa qinsanni.”

¹⁴ Nuqusa ete leloose' dakayeeyye, dikkeeti nyarrahe ka pora oppan Taani'eelin paho dikade ka haka letta dummitto'e, saanta ishin ishan paho dikattappa' kafade.

¹⁵ Orrase ka takka' nuqusa kapopa aane ka ishi' kide “Nuquso! Ajaja taaki saleeta a nuqusa salacciise akka seera Metooni isho a Faarisi' mina'e akkima pursama in qapnin upnaado!”

¹⁶ Nuqusa ka oori akka Taani'eeli' qapamo ka qaawa karma' karopa katamo ajaje. Ka Taani'eeli' kide, “Waaqase' xaayti a awta piisa isha kela koda koonitto a ken paho.”

¹⁷ Ka oori qaawase' qara dakatta dufen, nuqusa ka akka dakoose Taani'eeli tura in panammini'i, kobbeeta mankisteeta isho kobbeeta a orrase isha olli koda koonoti' qara' toomme.

¹⁸ Sekkamma nuqusa tikaadipa tiitaawe umma damta isho wa isha xasaysha takkan nefo in teyyanne ka a in muknin mali asse parishe.

¹⁹ Ka teykante a para in qinnin turan xa'e ka qaawase a karmada kapopa jarjartan aane.

²⁰ Ka ete aane ka qaawase kapa kayeeyye nessa nyarrahatatin kide Taani'eeli orxayta a caattampayta Waaqa! Hela Waaqase' xaayti a awta piisa isha kela koda koonitto, ikarmada kela ken paha ettanshe?”

²¹ Taani'eeli ka ishi oorshe ka kide “Nuquso para kuma nuqusume!

²² Nuquso, qootan Waaqiyyo tura wa neeqa an koonin ka ke nefo tura dapa an koonin malla, Waaqiyyo erkampattotaadi erke ikka karmada tupa afa dufte, umma karmada ana quda in qappanne.”

²³ Nuqusa ka oori akata xasoode ka akka qaawase' kara Taani'eeli sookshane orra ajaje. Ete qaawase' kara Taani'eeli sooksheneeyye, qoota Waaqaadi qara isi xaaye malla quda nefo in qojjamme.

²⁴ Sekkammaayye, nuqusa ka akka orrase Taani'eeli xasase qaqqapan ka isha kapopan de'ane ajaje. Ikka akka ishootta olliiyyiiw iskattaaysho isho hellaasso kuli qaawase a karmada' karopa katane' kode; karmada ka a orrase piitan in sooknin mali moonta quda'ew ishootta piren; lafaasso kuli ka in hasinin.

²⁵ Sekkammaayye nuqusase Taariyoosi ka samayta piita piisa qara kalo ka afadda karkari haasawanno piisa'e, erkana taafe ka kide “A nakayta ishina' koddo.”

²⁶ Nama mankisteese an mukinno oppa kalo piisa akka Waaqase a Taani'eeli tura fuuro ka ulfeesso'en ajajni. Ka saleeta salacciise ka kide, “Ha isha caattampayta Waaqa ka haka paraparati kallaani! Umma mankisteetaadi pata in qapto. Umma mukissaadi in dikkado.

²⁷ Isha idininni ka naman pahanni! Isha moonta isho' piita qara'e wa orra qawwanna' kooni ka afaa karmada' kuli kela Taani'eelin pahe.

²⁸ Taani'eeli ka oori parra nuqusase Taariyoosi isho nuqusase a Faarisi Qiroosi' nuqusummaan piisa oppa ulfeessame.