Xuuma Taani'eeli 5 - Mataafa Qulqulloota

Nuqusase Piltaasoori kidammo sankulta kode

¹ Kuyyaata takkaayye nuqusase Piltaasoori kidammo kutkuttowwa tanynyada a piita mukinna' pisa'e sankulta kutta kode ka ishootta olli taadeta wayneeta oppa' qa'e ka ikiini.

² Piltaasoori ete taadetase a wayneeta duttaneeyye i'orxayaadi' kide, “Aana ka kuppaayyaddasene a warqeeta isho a sipla a aappinno Naapukedenasoori yursaalamiiyyi tika qulqlloota' kela pooje ka ishin kale' qeeda ka ishin xooya.” Sede nefo akka isha isho kutkuttowwa taanynyada ka iskattaadi isho iskattaadi a pila ollin oppa ikkayta ikane fade ka malla asse kode.

³ Orxayasene ka eennew kuppaayyaddasene a warqeeta isho siploppa kodame Yursaalami tika qulqlloota kela poojametin de'en. Nuqusa isho kutkuttowwasene halaame ka iskattaadi isho iskattaadi a pila ka ikkaytan ikni.

⁴ Ka a ikkaytase oppa caaneeyye, waaqaddasene a darta a warqeeta ka a dakara pirreeta ka a sipla poora ka a sipla ka a qoyra isho a dakaappa kodame kalataysaden.

⁵ Sitiiyyi eennow qupiyya a harka nama'e akkaade ka tika nuqusati qussa a saalame quda'e, porase' qara ipsa xaaynaan minaadesa paata puusni; nuqusa ka qupiyyasene' paata puusna akke.

⁶ Tammaqta'e, fuula ka tupa poornaade, dakinta ka tupa qishshammoote, meella piisa ka kela xarri.

⁷ Ikka akka isha kapopa tipampaya ka so'aya isho orra hikka tooyno halane'e, ajaje. Ka ookkasene halaameeti' kide, “Nama taafetoose nappapo ka wa kiinitta ana' lelo, ohaata paxaara'e ishi uwwishan ka warqeeta xolma kela ishi' kalshan; ikka mankisteetiyyo qaraayye mukissampayta sessatta' kodda.”

⁸ Ookkasene' piisa ka nuqusa kapopa kullen, ma ishoottoppa nama takka nefo taafetase nappapa ka maana akkima koddite lela in in ettaninne.

⁹ Nuqusase Piltaasoori oori akata tammaqe fuulaadi ka akata poornaade tanynyadasene isha olli ca ka asseew tammaqen ka wa kodane' dapen.

¹⁰ Aayya opa nuqusa ete tammaqtoose a nuqusa isho a taanynyada dakayte, tikase a orra kela sankulta dammo kelopa kullite ka nuqusa' kiite “Nuquso para kuma nuqusume!” Maana'e sene malla tammaqte ka asse poornaatte?

¹¹ Nama takka a kara hapura a qulqullita Waaqa' co mankisteetaaytippa ca; namoose sapana aappaayshinatiiyyi akkima waaqadda mina'e upna ka ookuma isho matte oorsatta qapnaattaan immakaade i'upnaysamte. Semmalla aappaayshin Naapukedenasoori ka so'aya ka tipampaya isho orra hikka tooyno piisa qara' saara isha kode.

¹² Ha isha olsa fura'e ka wa dekade orra akkissa'e ka rakkoota a kitto fura'e ookuma isho upna pila'e qapa. Semmalla Taani'eelise a aappaayshin Naapukedenasoori ishi ‘Piltaasoori, kide’ Halacciise, isha wossen piisa olkela ke' la'ayshaay.

Akkima Taani'eeli' taafetase olkela nuqusa' la'ayshe

¹³ Ikka oori nuqusa kapoopa Taani'eelin de'en. Nuqusa ka ishi' kide, “Hela orrase a aappinno Naapukedenasoori' piita Yihutaati pooje oppaayye ken Taani'eeli?

¹⁴ Ha akkimma hapura qulqullitta Waaqa ke kara co, upna ka matte oorsatta isho ookuma ka ke' daasame in dakaye.

¹⁵ Ha ookka ana dehaamma isho tipampaya akka taafetose nappapan ka maana akka koddite ana' lelane'e i'ana kapoopa halaamen ma, lela imalaalen.

¹⁶ Anti' xoori akka wa juutame la'assa ka wa rakkoota kodde fura ettaninnitto in dakaye. Amma nefo, oton taafetose nappapa ka maana akka koddite ana' fureeta ettanissaayye, ohaata paxaara'e ke uwwishan ka warqeeta xolma kela ke' kalshan; akka mankisteetiyyo oppa mukissampayta a sessatta' koddita.”

¹⁷ Taani'eeli ka ishi' kide, “Nuquso, daassata a ana' daasso a ke'ew hasso; loqshaatti nefo nama pilaati' daashe; ma xoori taafetoose in ke nappapa ka mana akkima koddite ke' lela.

¹⁸ Nuquso! Waaqase kutta aappaayshin Naapukedenasoori nuqusumeeta ka kuttumta ka ulfeena isho dakaatta daashe.

¹⁹ Kuttumaadi a ishi' daashe qaran xaate'e, kaffa leka leka isho samayta piitadda leka oppa kalo ka afaa karkar haasawanno piisa ka isha tura xarri; isha ka nama heeno ikanni, taaki akka kallaado' kooni ka a heeno shuummi ka a in heennin shaarri.

²⁰ A koddito ma ete isi peepa paayye ka kamtollayta kodde ka nyiraamumeeyye, kuttumtase isho ulfeenase a qapo piisa qara qeedame, ikka sufaanetase a nuqusuma qara lekkade.

²¹ Ikka akka Waaqase kutta mankistewwa piisa qara hupna ukkumeeta' qapo ka mankisteeta nefo nama heeno' daanno, upnaanno kara'e orropa alle' daaname; ka qalpeeta pinanta' qapnaade ka akkima lo'alla' mina aykitta deete. Ka harretiita olli kappinoppa' kallaade, uusheta ka moonte xata isha japisse.

²² Atti Piltaasoori xoori a innaadi koddite ka wa kodde' piisa upto kapaayye isi shakkissa diisse.

²³ Ka laaddi aappa moonta' qara isi peepte ka isi kukuttisse ka mehaddasene a warqeeta tika qulqllootati sarame, qeedacciiste ka tanynyadaatti ka iskattaayti isho iskattaayti a pila ollin oppa ikkayta ikten ka ete ikkayta ikten kamma waaqaddasene dakara pirreeta ka warqeeta ka sipla pora ka sipla ka qora isho dakaddaappa kodame, paata akkini in kinnini ka dakayni in kinnini ka we in upnini kalataysatten. Ka Waaqase ke caassa taaki ikassa ettansho ka napseetaayti harkoppa qapo a ulfeessinin.

²⁴ Semmalla Waaqa qupiyya harka nama akka taafese' taafane erke.

²⁵ Wossen taafame ete nappapnaan ikiini, “Maane, maane, teqel, faaresi’

²⁶ Oto furraan, maane kideeta, ‘Waaqa parra mankisteetaayti'i dike ka akka dikkadane' kode.’ kideeta.

²⁷ Teqeli kideetaaw, ‘Hiilanne' hiilamte ka sholla'atte’ kideeta.

²⁸ Faarisi kideetaaw ‘Mankisteetaayti iqootamte ka Metooneta isho Faariseta' daasamte kideeta.’”

²⁹ Sekkamma Piltasoori ka eenneew akka Taani'eeli quda ohaata a paxaara uwwishan ka xolma kela ishi warqeeta kalshane'e, ajaje ka akka mankisteeta qara ukkumampayta sessatta' koddo'e, saleeta salacciise.

³⁰ Ikka kuyyaatoosetiiyyi halkeettiiyyiiw Piltasoori nuqusa Paapilooni ishshen.

³¹ Medoonitta takka Taariyoosi kidammo ka pakkaadippa' nuqusume; sitiiyyi Taariyoosi paraadi kunda lehi' lakki.