Xuuma Taani'eeli 4 - Mataafa Qulqulloota

Naapukedenasoori akkima a lammattati olsa olsoode

¹ Nuqusase Naapukedenasoori orra piita piisa qara kalo ka afaa karkar ca' haasawanno piisa opa erkana erke ka kide, “A nakayta ishina' koddo!

² Anti wa orra qawwanna ka daxxoota kodde a Waaqase kutta ana' kode'en ishina' lela fade.

³ Waaqa wa orra qawwanna a koono oo atta kutti! Daxxotaadi a koono nefo oo atta kokkoki! Isha' nuqusa a parapara, mankisteetaadi umma piraampira in qapto.

⁴ Anti tikiyyo a mankisteeta kara'en xasan kallaanni ikka ana' ettante.

⁵ Kuyyaata takkaayye, an alka qara' mukeeyye olsa nama fuurinna ka nama tammaqinna'en olsoode.

⁶ Ka akka olsoosen ana' fuurane'e ookka piita Paapilooni' piisa halacciise.

⁷ Ete so'aya ka tipampaya isho orra a hikka tooyno piisa ana kapopa ollopa de'eyye, anka olsasene ishootta' lele, ishootta' xoori olsaayyo fura imalaalen.

⁸ Sekkamma nama takka a hapura qulqullita Waaqa isha kara co ikka Piltasoori kidammo ka halaammo Taani'eeli ana kapopa de'e; anka olsasene' xayyo ishi' lele.

⁹ Ka kide, ‘Piltasoori, ke a saara ookka' kodde, qoota hapura qulqullitta Waaqa ke kara co malla, wa juuttota kodde' piisa akka ke tura in dekannin in upa; semmalla ana olsa an olsoode ke' lelo ka maana akkima kodden ana' leli.”

¹⁰ Ka isha kide, “In muke ka qoyra piita dehe ka akata dera kelashaatoppan akke.

¹¹ Qoyrase nefo ikuttade ka akata deraade ka moonta kaye ka orra piita qara co piisa akkaanni.

¹² Hashshaadi i'ilaawi, ka paxaari, dalta qara kitto nefo ka kutti ka damta' nama piisa kayta, pinaana ka kaattaadi kela' qaa'ini, xampira ka taammaadi qara' satta saattaanni. Wa nessa oorsanna' piisa ka qara damta akkanni.

¹³ An eeyye kelashaatase' tooyno oppaayye, erkampattoota a qulqullaawte a paata tooytinitto moonte xata lekkanni anka a lekkannitto akke.

¹⁴ Ikka nessa kuttan kiite, ‘Qoyroose' mura ka taammaadi kuli oppa alle' quura ka haashshaadi alle' quda tiiqa ka daltaadi alle' qara fida, pinaana ka alle' kela qahen; xampira a tammaadi qara kallaanna ka alle' qahen.

¹⁵ Ma xoori kurpanaadi eeyye piita kela' diisha ka sansalaatadda a silpa isho a sipla pooratin quda mara ikka aykitta kara' tawo. Uusheta ka moonte xata isha faakisso, ikka pinaana olli aykitta damo.

¹⁶ Dikatta a namumayteeta ka qara pursamo, ikka haka para tappaati dikatta pinanta' qapnaado.

¹⁷ Sede nefo akka nama piisa akka Waaqase kutta mankistewwa piisa mukinno ka nama heeno shuummo ka isasene' puyatame kuli' hupna ukkumeeta' daanno upnaado'e, erkampattowwa paata tooytina wa kidame tarpinni.’

¹⁸ Anka Taani'eeli' kide, ‘Semmalla innayti Piltasoori, anti nuqusa Naapukedenasoori olsan olsoode seneey, maana akka kodden ana' lele; maana malla ookka mankisteeta an mukinno oppa ca ana' lela in ettanshaneey, ma xoori xaayti qoota hapurase a qulqullitta Waaqa ke kara co malla ana' lela i'ettanissa.”

Taani'eeli akka olsa nuqusa' fure

¹⁹ Sitiiyyi Taani'eelise Piltasoori kidammo akata tammaqe ka oppa ollin jaw kide nuqusa ka ishi' kide “Piltaasoori, qoota olsoosene isho maana akka kodene desa oppa'en tammaqan. Piltasoori ka ishi oorshe ka kide “Nuquso, ha olsoosen kadi orra a ke needdanno qara kayni, maana akkima kodden ka paarkaalaatti qara' kayni kiiteeyye iwayyi.

²⁰ Qoyrose kuttade ka akata deraade ka moonta kaye ka orra piita' piisa akkaanno akka akkite

²¹ haashshaadi ka ilaawaan ka paxaaraan, dalta qara kitto ka nama piisa qara kayto pinaana ka kaattisaadi kela' kallaannaan, xampira ka taammaadi qara' kallaannaan,

²² ha nuquso, qoyroose ke. Maana malla kuttumaatti moonta kayen, hupnaayti a ukkumeeta ka piita piisa qara oora.

²³ Nuquso, a eeyye tooynittooyye erkampattoota a paata tooytinitto ka moonte xata deete ka kiite, ‘Qoyroose' quura ka alle' pashsha ka kurpanaadi eeyye piita kela'ew diisha ka sansalaata sipla isho sipla a pooran eeyye' hida ikka eeyye piita kara' tawo; uusheta ka moonte xata isha affasso; ikka haka para tappaati' pinaana kappina olli kallaado.

²⁴ Nuquso, olsoosene maana akka kodden dakkaysado, Waaqase kutta wa ke qara' qeeda' piisade tin are tooye;

²⁵ atti akkima Waaqase kutta mankistewwa piisa qara hupna ukkumeeta' qapo ka mankisteeta nefo nama heeno' daanno haka upnaannitto'e, orroppa alle' daanamta ka haka para tappaati pinaana kappina olli kallaatta. Ka a horeeta' mina aykitta deetta; tadahata ka moonte xata ke qaropa roopta ka ke japissa

²⁶ sede a ajaje ka kide, ‘Kurpanaadi a piita kara' haso ka eyye' tawo’ Oto akka Waaqa piita piisa qara hupna ukkumeeta' qapo upnaattooyye, akka' lammatta nuqusumaayti qaropa oorto akkinni.

²⁷ Semmalla nuquso! Waan ke dehaamma dakkaysado, juppoota koda diishe. Ka koda fayya patta kode. Ka koda neeqa alle' diishe ka orra rakkanno suraysado, oto asse kootooyye takka punu Waaqa akka' nakaytan kallaatto'e paraayti derayshaay.”

²⁸ Wossen piisa ka nuqusase Naapukedenasoori qara' kayen.

²⁹ Leya kudanka lakki kamma, Naapukedenasoori tikase a mankisteeta Paapilooni kitto qaropa fayyade ka eeyye qarandesa pora anni.

³⁰ Ka kide, “Paapilooni katamoosen asse kutta, akka katama kara nuqussa kallaanna koddito'e, ana hupniyyo a kokkokan asse ulfeeniyyon qupenne?”

³¹ A haasoosen afaappa in dikkinniniiyyi, nessa ka moonte xata de'e ka kiini, “Nuquso Naapukedenasoori, wa ke qara' kidame dakkaysado! Mankisteetaayti ike qara' qeedamte.

³² Atti nefo orroppa alle' daanamta ka akka Waaqase kutta piita piisa qaraayye hupna ukkumeeta' qapo ka mankisteeta nefo nama heeno' daanno, upnaannitto kara'e, haka para tappaati pinaana kappina olli' kallaatta ka akka lo'alla' mina aykitta deetta.”

³³ Wa Waaqan kidame ka eennow Naapukedenasoori qara' kayen; ikka orroppa alle' daaname ka akkima lo'alla' mina aykitta deete; uusheta ka moonte xata qara uushni, nyirfaadi ka a paalla kawwaarayta' mina' qara' dehen; shololoqaadi ka a shololoqa allitta' mina' dehen.

Naapukedenasoori kalata Waaqa' kalshe

³⁴ Naapukedenasoori ka kide “Ete parose tappa dikkade kammaayye anka ildaayyo moontopeela tooyyishe, qalpeetiyyo ka ana' oorte; anka Waaqase kutta kalataysade ka isase haka paraparati' kallaanno saarsade ka isha ulfeesse. Ha isha nuqusa para para mankisteetaadi umma piraampira in qapto

³⁵ ha orra piita qara kalo piisa isha turaayye we'en isha erkampattowwa moonta isho samayta piita qara kalo kuli qara'e wa heena' kooni umma wa heena akka in koonini nama isha dawrino taaki isha' kiino maana' kooni? Takka nefo in co.

³⁶ Ete qalpeetiyyo ana' oorteeyye, ulfeena mankisteetase xayyo ka ana' tiitaawe. Anka kuttumta ka ulfeena kuli akkade; a ana dehaammo isho a ana olli koda koona ka xasan ana teyyaden ulfeena ka a xatta qaran qapto ana' padaawame.

³⁷ Amma anti Naapukedenasoori, nuqusa moontati'in kalata ka ulfeena isho saara dehanni. Ha isha wa koona' piisa dukaata ka we' piisa oppaayye hanqeetaaw kooni; ka orra isi peepno xata shakkissa ettaninni.”