Xuuma Taani'eeli 3 - Mataafa Qulqulloota

Naapukedenasoori pahana warqeeta'e qaatishe

¹ Naapukedenasoori pahana a warqeetoppa kodame ka moontandela deruma' dikla kunda lehi ka xaltandesa palduma' dikla lehi mina' ca'e piita Paapiloonitiiyyi laka “Tura” Kidammo oppa' qaatishe.

² Ka kuyyaata a oppa pahan wossen qaatisheneti' sakatatta paayyan ulfeessa'e, orra isha olli piita mukinno ka taanynyada ka saarra palewwa ka qimoota piita ka orra kaaja qapno ka orra qoota seerati desa upo ka piita tooytino piisa ollopa hale.

³ Orrase' piisa ka paaletase ulfeessa' de'e ka pahanasene a nuqusa kode tura piisanti qa'aden.

⁴ Namase' saleeta salinno ka nessa kuttan salishe ka kide, “Ishina piitadda lekayaappa de'e ka afaa lekaya haasawannaati,

⁵ oto' nessa kaasa a dawnaan ka a hibaara ka a maasinqoota ka a kehayta ka a luuttota isho nessa a kirpan dawnaane a pila kuli dakaytaneeyye akka' pahan wossen a Naapukedenasoori warqeetoppa kode' tura kilpallitan ka ishootta' sakatatane i''ajajamten.

⁶ Nama pahanooseneti' xata in kiinnin ka in sakatannin sitiiw porase a kara apitta opayno co karopa katama.”

⁷ Semmalla oori orrase' piitadda lekaati de'e ka afadda karkar haasawanno piisa ete nessa kaasa dawammo ka a kehayta ka a luuttota ka a maasinqoota' piisa dakayeeyye, pahanasene a Naapukedenasoori worqeetoppa kode' tura'e piitopa xata kide ka sakatade.

Akka xeliyyasene a Taani'eeli sessa pahana sene wrqeetoppa kodameeti' sakatatta tiiten

⁸ Sitiiyyi oori ookka Paapilooni oppa orra takka takka nuqusa kapopa aane ka orra Yihuta' xasase.

⁹ Ka kide, “Nuquso, para kuma nuqusume

¹⁰ ha nuquso, atti ajaja' sookisse ka kiite, ‘Oto nessa a kehayta ka a luuttota ka a maasinqoota ka a mehadda kirpan dawammo dawnaane piisa dakaadooyye, nama piisa a xata kido ka pahanasene warqeetoppa kodameeti' sakatado.

¹¹ Nama xata in kiinnin ka pahanooseneti in sakatannin a porase a apitta kara co karopa katamo.’

¹² A koddito ma Yihutaatase a' piita Paapilooni' qara' mukissampaya' koote, Sitiraaqi ka Misaaqi isho Aptinaako kidamma ajajaayti tooytanni in caan, umma waaqaddaatti waaqaysanni in caan; umma pahanasene a warqeetoppa kooteti' sakatanni in caan.”

¹³ Nuqusase Naapukedenasoori ete sede dakayeeyye akata miirode ka Sitiraaqi ka Misaaqi isho Aptinaako akka halamaane'e, kamma orra erke; ikka nuqusa turopa dehaaden.

¹⁴ Naapukedenasoori ka ishootta' kide, “Hela Sitiraaqi ka Misaaqi ka Apdinako, keeto' waaqaddosen xayyo a' waaqaysanni a kinnini ka pahanoosen an warqeetoppa kodeeti a' sakatanni a kinnini?

¹⁵ Amma nefo oto nessa kaasa a dawnaan ka a hibaara ka a maasinqoota ka a kehayta ka a luuttota isho nessa kirpan dawnaan a pila kuli dakaytaneeyye, kadi' pahanoosen an warqeetoppa kode' tura' sakatannitan ipaxaari. A taakiti eennowwe pora kara apitta opayno co karopa katamtan umma Waaqa harkiyyoppa ishinan paho akka in kinnin upnaada.”

¹⁶ Ishootta ka ishi oorshen ka kidene, “Nuquso! Issin paha malla waan oorsanna in caan.

¹⁷ Ma nuquso, Waaqoose an waaqaysanninno oto inon paha heenooyye apittose opayno ka harkaayti kela i'inon paha.

¹⁸ Ma nuquso, kadi punu isha inon paha in heennin' nefooyye, akkiman waaqaddaatti an waaqaysannin ka pahanasene a' warqeetoppa kooteti an sakatannin upnaado!”

Xeliyyasene a Taani'eeli sessa akka apitta a opayno oppopa katamen

¹⁹ Sitiiyyi Naapukedenasoori ka Sitiraaqi ka Misaaqi isho Aptinnaako qara akata miirode ka pissaadi kuli purshe. Ka apittase akka a turan opayno qara harka tappaan qapnayshan ka opayshane' ajaje.

²⁰ Ka akka opa Sitiraaqi tulopa hidan ka apittase opayno oppopa katane'e, kodanpayasene' xaadippa a kokokkoka ajaje.

²¹ Ikka ishootta qamisewwaasso isho konfadaasso kalsade ka parrowwaasso hidade ka mehaddaasso a kalsannaane a pila a qapa ollin qeeden ka apittase opayno oppopa ishootta katen.

²² Ajajoose a nuqusa' qoota kokkoki, apittase opayshen ka dikkeeti koope malla, xaalayta apitta'e orrase Sitiraaqi ka Misaaqi isho Aptinaako apittoppopa kate kukkupe ka leyshe.

²³ Sitiraaqi ka Misaaqi isho Aptinaako xoori akka tulopa hidamenenne apittase opayno oppopa katamen.

²⁴ Sitiiyyi Naapukedenasoori oori oppa'e qawwaawe ka jarjartan xa'e ka orrase isha olli piita mukinno kaassade ka kide, “Ata a pahato nama sessa pattan tulopa hiine ka apittoppopa kanne pahata?” Ishootta ishi oorshen ka kidene, “Aa, nuquso, dukaata' kiite”

²⁵ Nuqusa ka ishootta' kide, “Tin orra furame ka apittoppandesa tittitaawno afurin akkini umma apittase ishootta kupni in co. Ishoottoppaayye takka inna Waaqa'e paha.”

²⁶ Naapukedenasoori oori qaawase a apittase kara opayno kapopa dehaade ka hale ka kide, “Sitiraaqi ka Misaaqi isho Aptinaako, ishina orxaya a Waaqase kuttati' kodde! Alle' sooka ka xooya” Ishootta ka oori apittase kara sooken.

²⁷ Sekkammaayye orrase' piita mukinno ka tanynyada isho orra paatadehaammo piisa ka ishootta kapopa ollopa de'e ka akka apitta ishootta quda in kaynin ka nyirfa matta' nefo ishootta qara in kupnin ka mehadda a isquda' kalsadene nefo quda'en qapannin ka sede disi diishe ma qayya nefo ka ishootta quda in kaynin piisanti akken.

²⁸ Naapukedenasoori ka oori' kide “Waaqase a orxayaadi a kide'e, ‘Waaqinno mali waaqadda a pila an waaqaysanno, umma ishi an sakatanno!’ Ka ajaja nuqusa' tiite ka toota' isi daasheti, erkampattootaadi erke ikka orxayasene' xaadi isha amaneetin pahe, Waaqa Sitiraaqi ka a Misaaqi isho a Aptinaako a kalataysamo.

²⁹ Semmalla Waaqa pila a isha mina orran pahano qoota in kinnin malla, orra piita an anti mukinno oppa kalo ka afaa karkar ca' haasawanno pisa oppaayye, nama a Waaqqose a Sitiraaqi ka a Misaaqi isho a Aptinaako onno, akka oppa quuramo, tikaadi kuli ka alle' pootamto in ajaje.”

³⁰ Ete ajajose' sooke salisame kammaayye Naapukedenasoori Sitiraaqi ka Misaaqi isho Aptinaako akka piita Paapilooni' mukshane'e hupna ukkumeeta ishootta' daashe.