Xuuma Taani'eeli 2 - Mataafa Qulqulloota

Naapukedanasoori olsa olsoode

¹ Naapukedanasoori a nuqusumeeyye para lammattatati olsa olsoode ka akata oppa dikanni; mukitta kuli ka isha' deena tiite.

² Semmalla ikka olsasene a olsoode akka ishi' furane'e, so'aya ka tipamppaya ka ookka ka tooyampaya isho a keleshaata hiikka tooyna halacciise. Ishootta ka oori isha kapopa de'en.

³ Ikka ishootta' kide, “Olsaan olsoode hakan maana akka kodden upnaado'e, ikka ana dikacciisni.

⁴ Ishootta ka afaa Sooriyatin isha' kidene “Nuquso para kuma nuqusume! Olsaatti ino' lele ka in ke' furaay.”

⁵ Nuqusa ka ishootta' kide “Oton olsa an olsoode'e' lela ka maana akka kodden fura malaaltane, akka' oppa quuramtan tikkaassin kuli ka alle' pulpulaman upnaada.

⁶ Ma oton olsaayyo upnaattan ka ana' furtaneeyye, daassata a kutta'en ishin loqsha; akka ana kapa ulfeena akattaneey olsoosene maana akka kodden ana' lela ka fura.”

⁷ Ishootta ka amma a lammattati isha' oorsheneew ka kidene, “Nuquso, ino orxayaatti olsaatti maana akka kodden in ke' furraay olsa a olsootte ino' lele.”

⁸ Nuqusa ka oori ishootta' kide, “Akkima waan dikade uptan ka semmallaaw okoto piitan tinnittan i'ana' kalte.

⁹ Semmalla oton asu olsoosene ana' furra malaaltane, qitaateta oli pahaton ishin piisa qara' mura. Ishina desa wa pursama'e caada, akka sede malla haasa darta' haasawatta'e, piitan tita' harmisatten. Semalla olsoosen upnaada, sedennen akka dukaatan furtan upnaaday.

¹⁰ Ookkasene paata tooyna nuqusa oorshen ka kidene “Nuquso kaassumoosen kokkoka a kaassatte nama oorissa ettansho piita qara in caado; umma kadi puno kokkoki ka hupna qapa nefooyye nuqussaappa nuqusa a kaassuma asse paha, so'aya taaki tipampaya taaki orra hikka tooyno' dehayshe in co.

¹¹ Ha nuquso! Wa kaassannitta, ikokkoki oton iwaaqadda ettanshen diisheey, nama piita qara ettansho in co. Umma waaqadda otanta orra oppa kallaanni in caan.

¹² Nuqusa ka oori akata miirode ka akka ookka piita Paapilooni' piisa leyshane ajaje.

¹³ Ete ajajase a nuqusa akka ookka piisa leysamane sooke dakaadeeyye, akka Taani'eeli isho xeliyyaadi kuli leyshane orra erkame.

Akka Waaqa olsasene a nuqusa maana akka kodden Taani'eeli akkishe

¹⁴ Taani'eeli ka saarase a tooytampaya tika nuqusa Ariyooki kidammo ka allu helani ookkasene a piita Paapilooni lessaata ajajame kapopa aane ka afaa fayya isho naalumaan isha torrumsade.

¹⁵ Ka ishi' kide, “Ata nuqusa maana malla ajaja asse kokkoka ajaje?” Ariyooki ka we' piisa Taani'eeli' torre.

¹⁶ Taani'eeli ka eennow nuqusa kapopa aane ka akka olsoosen fureeta'e eta shakkaya ishi' daasho'e, nuqusa naappade.

¹⁷ Ka sekkamma tikopa tiitaawe ka wa kodde' piisa xeliyyasene' xaadi Hanaaniya ka Misa'eeli isho Assaariya' torre.

¹⁸ Ka akka ookkasene a Paapilooni olli in pirammini'i, akka appa moonta Waaqa ishootta suraysado ka olsoosen a nuqusa' juutame ishootta' lelo'e akka Waaqa qinsadane ishootta dehaame.

¹⁹ Awse halkeetteeyyeew olsasene' fureeta ka keleshaatoppan Taani'eeli akkaatte, ikka Waaqa appa moonta kalataysade.

²⁰ Ka kide, “Ookuma ka hupna piisa xaadiiwwiiy haka paraparati kalata a Waaqa kayo.

²¹ Ha isha kuyyawwa isho leyadda xoora xoora oorinni ka nuqussa nuqusuminni ka nuqusuma qara shaarriiw. Ka ookka ookuma daanni ka upnampaya' matte oorsatta daanni.

²² Ha isha wa juutame ka akkaanni in kinnini kuli akkini. Qoota la'ayta isha kapa co malla, wa tukkanta kara' dekade' piisa upa.

²³ Waaqqo, Waaqa aappadaanno, qoota ookuma ka hupna ana' daasse ka qinseetinno dakayte ka waan kaassanne ana' lelte ka olsa nuqusa ino furte malla, in ke kalataysanni ka ke kukuttinni.”

Akka Taani'eeli olsa nuqusa' fure

²⁴ Sekkammaayye Taani'eeli ka Aariyokise a nuqusa akka ookka a Paapilooni' leysho ajaje kapopa aane ka ishi' kide “Ookka a Paapilooni in leyshan ma nuqusa kapopa anan aane anka olsoosen' xaadi ishi' furo.”

²⁵ Ariyoki ka eennow nuqusa kapopa Taani'eelin aane ka isha' kide “Nuquso! Ha orrase' piita Yihutaati poojame oppa'en nama ke olsoosen furo akke.”

²⁶ Nuqusa ka oori Taani'eelise Piltaasoori kidammo' kide, “Olsan olsoode upnaatta ka olsoosen ana' fura i'ettanissa?”

²⁷ Taani'eeli ka ishi orshe ka kide “Nuquso kaassumoosen a' kaassatte ookka taaki tipampaya taaki hayyowwa ke' fura in ettanshan.

²⁸ Ma xoori Waaqa a moonte co wa juutame' piisa akkini. Ha isha wa itturopa kodda' piisa ke akkishe; semmalla olsa a' qoollaappa mukittoppa kittooyye olsootte are dakkaysado.

²⁹ “Nuquso, ha a alka qara' mukteeyye, piite desa wa itturopa kodda' dikanni; semmalla Waaqase wa juutame akkinno ka wa ituropa kodda ke akkishe.

³⁰ Wa malla juuttose ana upnaatamte, akka olsoosen ke' furaman, atti ka wa ke dikacciisina upnaatto malla diisheey, qootan anti ookuma orra pila qara qapo mallan.

³¹ Nuquso, pahana olsaan ke tura' qa'ade akka akkitte ikutti ka warwarri ka tooyeeyye nama fuurinni.

³² Matta pahan osseneti warqeeta fayya oppa kodamen, kessaadi isho harkaadi dakara pirreeta fayya oppa kodamen, karittaadi isho taffaadiiw sipla poora oppa kodamen.

³³ Loqqaadi kilpa kulixata siploppa kodamen, kamantaadiiw, paka takka sipla paka takka'ew piitoppa kodamen.

³⁴ A eeyye pahanoosen akkinittooyye shila kuttayta ka a we quda in kaynin maliiyyi sukme ka pahanasenetiiyyi loqqa sene sipla isho piitoppa kodame' qara' pi'e ka yooqe.

³⁵ Sitiiyyiiw siplase ka piitase ka siplase poora ka siplase isho warqeetase' piisa ka takka alle yooqamen ka akka raanda poneeyye okteetoppa xaano mina'e, uruuritta ka piisa alle' haade, ikka porase oppa dapaden. Ma xoori shilase pahanasene qara' pi'e ikuttade ka piita piisa qara pire.

³⁶ Olsaatti in ke' leleey, amma olsoosen maana akkima kodden dakkaysadoow.

³⁷ Nuquso! Atti a nuqusa nuqussa aappa moonta Waaqa ka ke nuqusumshe ka hupna ka ukkumeeta isho ulfeena ke' daashe.

³⁸ Ka orra ka pinaana ka xampira moonta' piisa pora oppa caaneeyye, akka' piddito'e, harkaaytippa' daashe. Semmalla mattase warqeetoppa kodame ke.

³⁹ Ke kammayyeew mankisteeta a xaayti kelopa xata kitto xa'a; sekkamma'ew mankisteetase a sipla poora a sede a lamatta kelopa xata kitto xa'a ka piita piisa pidda.

⁴⁰ Afratta qaraayyeew mankisteeta a sipla' opa kokkoka ka we' piisa qeqqepisso ka yooqto xa'a ka akkima sipla we' piisa yooqno ka nukkullano mina'e, mankistewwa isheetta turan ca' piisa moojita ka yooqta.

⁴¹ Sede a loqqaadi isho qupiyya loqqaadi a paka takka piitoppa kodamen paka takka ka siploppa kodamen a akkite, mankisteese olkela qootamta. Sede a sipla isho piita oloppa lahate a akkite, mankisteese quda paka takka a sipla opa kokkonnaatta.

⁴² Akkima qupiyya loqqaadi paka takka sipla, paka takka kan piita mina'e, mankisteese quda paka takka ikokkonnaatta paka takka ka nukkullaada.

⁴³ Akkima sipla isho piita olloppa lahen mina'e, samayta mankistewwosen lakkiti oli heman ka olloppa lahan ma akkima sipla isho piita olquda' jaqqalli in kinnin mina'e, ishootta ollin takka kodda in ettanshan.

⁴⁴ Sapanna nuqussasenetiiyyi aappa moonta Waaqa mankisteeta haka parparati' kallaatto, samayta piita pila ka quda qappatta in ettaninnini xaasha. Mankisteetose ka mankistewwa pila' piisa alle' pirta ka xaadi haka paraparati kallaatta.

⁴⁵ Shilose a nama quda in kaynin maliiyyi irroote sukume ka pahanasene sipla ka a sipla poora ka piita ka dakara pirreeta isho warqeetoppa kodame qara' pi'e ka yooqe, mankisteetoose'e akkinni. Sede tooy Waaqase kutta wa itturopa kodda' piisa ke akkishe. Sene tooy olsaatti akkeeto olsootte, furamaadi nefo dukaataaw.

⁴⁶ Naapukedenasoori ka oori Taani'eeli ulfeessaa'e, haka miinta piitan kayno'e xata kide. Ka akka daassata a kalisoota tankarta Taani'eeli' dehayshane' ajaje.

⁴⁷ Ka ishi' kide “Waaqaayshin keeton Waaqa waaqadda ka nuqusa nuqussa ka wa juutame' piisa akkinni; atti' nefo semalla wossen juutame akkeeta ettanisse.”

⁴⁸ Sekkamma nuqusa ka pora ulfeena a kitto oppa'e, Taani'eeli xaaye ka daassata kutta ishi' daashe ka piita Paapilooni' piisa qara hupna ukkumeeta ishi' daashe ka ookka piita Paapilooni' piisa qara' saara isha kode.

⁴⁹ Taani'eeli ka akka Sitiraaqi ka Misaaqi isho Aptinaako shuumo'e, nuqusa naappade. Ikka awraajadde a piita Paapilooni' qara ishootta shuume. Taani'eeli' xoori tika nuqusa kara koda kooni.