Xuuma Taani'eeli 12 - Mataafa Qulqulloota

Sapana piraampira

¹ Erkampattootase kelashaatase maana akka kodde ana' lelte ka ana' kiiteewwe, Sapanoosetiiyyi erkampattootase erkampattowwa a qara saara kutta koddite samaytayshin tooytinitto Mika'eli kidammitto xa'a. Rakkoota a inna nama' piita qara uumamene paayyatte apari piita qara'en koddinin ka koddita; ma xoori sitiiyyi nama maxxaadi maskapa caatta a Waaqa oppa' taafame piisa ipaha.

² Orra le'e lekayta ka tootoppa xa'a ishoottoppa demo ka caatta parapara oppopa aanan, a demo ka pora oppa haka paraparati rakkadan ka jeera oppopa aanan.

³ Sitiiyyi ookka akka piirtota opa la'ayan, a orra lekayta hanqeelluma kollishe ka haka paraparati akka hiikka moonta' mina' la'ayan.

⁴ Ka ana' kiite “Atti Taani'eeli haka piraampira kaynitto kara'e, qaaleta mataafose kara kitto alle' dufe ka leloose a xuuma fayya isi kara' qapado! Sitiiyyi orra olkelanne pora yaaqyaaqa; upna nefo ka koopan.”

⁵ Sekkamma anka nama lakki a kirra kapa kamakama qara olmina desa qa'ade akke.

⁶ Ishoottoppa takka ka erkampattootase ohaata paxaara uwwisatte ka kirra qara xata qa'atte' kide, “Ata wossen orra qawwanna aytami dikkadan?”

⁷ Erkampattootase ohaata paxaara uwwisatte ka kirra qara xata qa'atte ka harka lakki piisa moontopa xa'isse ka maxxa Waaqase a paraparatin reersatte ka kiite “Para sessa ka pakoppa'e dikkadan. Oto rakkoota a samayta Waaqa rakkanno dikkattooyye, wossen piisa dikkada.

⁸ Anti' xoori pateettose a hasawatte piisa in dakaye ma maana akka koddite ana'en kalle. Anka erkampattootaseti' kide “Ata poqallaayyo kuli wossen maana koddan?”

⁹ Erkampatootase ka ana' kiite, “Taani'eeli qoota leloose haka piraampira kaynitto'e eeyye' juutamo ka dufamo malla, atti amma tiitaawe ka alle aane.

¹⁰ Orra lekayta isi harmisha ka wa neeqa koda diisha ka orra qaja in qapnin kodda. Orra wa neeqa' koono xoori qoota matte oorsatta dape malla, neequmtaaw koda. Ookka xoori iwossen matte oorsadan.

¹¹ Eta a oppa kalisootase a kuyyaata mina dehaannitto haste pakkoose oppa nyala heente ka kodammaane desa paayyatte kuyyaata kuma ka dippa lakki ka kunda sakali tarpa.

¹² Nama haka kuyyaata kuma ka dippa sessa ka kunda sessa keniti' duupado maana oloode.

¹³ Atti' xoori haka' piisse qara kitto'e, amanteetaaytin japaado ka innessattaay. Ma xoori kuyyaata piraampirati tootoppa ixxaata ka qoottotaayti akkatta.