Xuuma Taani'eeli 11 - Mataafa Qulqulloota

¹ A Metoonittase Taariyoosi' nuqusume para paayyotati anti kapanca ka isha qaarqaarri ka isha kokkonnanni.

² Amma tooy waan anti ke' lella dukaata.” Ka kideewwe “Nuqussa pila sessa Faarisi qara nuqusuma, a afratta' xoori ishootta piisa qara teyanta' qapnaada. Ka teyantoose a qapo qaran xaate'e, mankistewwa pila isi quda' qeeda ka mankisteeta Kirikki qara oranna' xa'a.

Mankistewwa piita Kipsi isho a piita Asoori

³ Sekkamma'ew, nuqusa oranna' jaalloo ka nuqusuma ka akka isha aakto qara hupnan pidda.

⁴ Ma xoori a asse hupnan kuttata qara cooyye mankisteetose' xaadi oli kela dapta ka pora afuri' qootamta orra pila a sanynyeetaadi in koddinin ka qara' nuqusuma. Umma a xaadi mina'en mukshan.

⁵ Nuqusase a tupatta a piita Kipsi ka kokkonaada; ma xoori saarrasene' xaadi a xela oranna ajajna oppa takka a xaadi qaran qapto'e kokkonnaada ka a mankisteeta akata kutta mukinno kodda.

⁶ Parra lamaya kammaayye nuqusa Kipsi isho a Sooriya ka kodayteeta a firummaata oli tura kodadan. Nuqusa Kipsi ka enentaadi nuqusa Sooriyaati' daasha; ma xoori qoota firumoose kokkonnassa malaallaan malla, kodayteetase' xaaysho a moottuma in jarto ikka oori isheetta ka innaadi ka diirtaadi isho orrase isheetta olle anno piisa alle' piran.

⁷ Sitiiyyi sanynyeeta enentoseti oppa nama takka ka piita Kipsi' qara nuqusauma ka nuqusa Sooriya' qara oranna' xa'a ka mishshikewwaasso oppan tarpa ka ishootta torpa ka puta.

⁸ Ka pahanaddasene a killowwaassoti mehaddasene a ulfeena isasene sipla dakara ka warqeetoppa kodame' piisa ishootta tura alle Kipsipa haadada ka oori haka parra lamayaati ishootta torpa alle' diisha.

⁹ Sekkamma nuqusa Sooriya ka nuqusa Kipsi' torpana' tuula, ma xoori alle iskammandesa oora.

¹⁰ Hellaa nuqusooseti ka oranna' harmisadan ka xela oranna a akata leka isi quda' padaawadan. Hellaasene a nuqusa oppa takka ka xela oranna a isha quda co ollinni, a malxa' mina diitmada ka katama a paarkaalaassoti a kokkoka' torpa.

¹¹ Sitiiyyi nuqusa Kipsi ka miirooda ka nuqusase a Sooriya' torpa ka xelase oranna' tuule leka kuli puta.

¹² Ka oto orra lekayta puto kammaayye isi peepa paayya ka orrase a pooje oppa nama kuma lekayta alle leysha. Ma xoori putayma quda'en tawo.

¹³ Sekkamma nuqusase a Sooriya ka a xatta qaran qapto xela oranna harmisada ka parra lamaya kammaayye xelase a oranna a akata leka ka fayya harmisade ollin oranna' tuula.

¹⁴ Sitiiyyi orra lekayta ka nuqusa Kipsi qara' xa'a; sede kamma desaaw, keleshaatase akka dikkado'e, orraayshin oppa tiyyoolaya demo ka tiyya koda' xa'aneew, ma xoori ishootta'en ettanto.

¹⁵ Nuqusa Sooriya ka paleeta a kawwattan kapa oxnaamte qudopa akka torpana isha ettanto'e, piita tuula, ka paleetase kapa mura. Umma torpampaya Kipsi a kokokkoka nefo isha mina qa'atta in ettanshan.

¹⁶ Ikka wa isha aaka koda, umma a isha mina qa'ado in caado; ikka piitase ulfeena qapto kuli hupnan isikelopa oorsada; ka piisse kuli alle pashsha.

¹⁷ Ka xela oranna a piitaadippa co piisa ollopa oorsha ka oranna harmisada. Ka akka piita Kipsi qara pira isha salto'e, olli kala malla nuqusa Kipsiti enentaadi hemitta' daasha; ma xoori wa dikade isha'en koddan.

¹⁸ Sekkammaayye piitadda pakateeta kapandesa ca opa tuula, ka piitadda lekaya qara pira ma xoori saara takka a xela oranna a piita pila'e isha qara isipeepasene xaadi hattisha; ikka isipeepasene xaadi malla jeera.

¹⁹ Ka piitaadipa katamaddasene kawwattan kapa oxname opa tiitaawa, ka orannaappa putama; umma lammata'en akkado.

²⁰ Nama pila ka poraadippa nuqusuma; ka mankisteetaadi kuttissa'e, nama a kipira poho piitadda a mukinna piisa karopa erka; ma xoori nuqusoose eennow a nama isha quda in kaynin mali asseew to'a.”

Nyiraamaytase a nuqusa a piita Sooriya

²¹ Erkampatootase ka torraadi kammaaw caatte. Ka kiite, “Nama puyatammo ka pakkaadippa nuqusuma; umma akka nuqusa mina ulfeena in teyo. Isha ka lokkooti sassapaan mankisteeta harkaadippopa oorsada.

²² Ka orra isha needdanno piisa alle leysha; umma saara qeesewwa nefo in diisho.

²³ Ka ilattuma neeqatin mankistewwa pila sassapada ka olli kodayteeta nakayta kodada, kadi punu orra isha quda koddino shakki nefooyye kokkonnaattaanneew aana.

²⁴ Ka piitaddasene teyanta qapa ka eeyye nakaytoppa ca kuli isi kelopa oorsada; ka a orra isi qara in upnin mali piita teyanta qapto takka qara pira. Ka wa xatta aakkadaasso taaki aappadaasso in koonini piisa koda. Ka wa orannaappa pooje piisa orra isha quda co' qoota. Eta shakkaya kardesaaw koddita ma, katamadda kapa kawwattan oxname kuli patissa dikada.

²⁵ Ka xela oranna lekayta harmisada ka nuqusa Kipsi torpa tuula, nuqusa Kipsi ka isi qara oorissa'e xela oranna lekayta harmisadaaw, nuqusa Kipsi xoori qoota sullaata isha qara kodammitto malla isi qara oorissa in ettansho.

²⁶ Moottadaadi a isha olli damma'ew isha patissa xa'a; orrase xaadi a oranna ka alle pittinnaawa lekaya ka orannaappa le'an.

²⁷ Nuqussasene lakki ka oli kapopa de'an ka toma takkopa ollin daman, qoota karitta karanxata neequmtaaw olli dikadan malla haasa oli sassapata'ew olli' haasawadan. Ma xoori qoota piraampiraaysho in kaynin malla, dikatta a dikaden ishootta'en koddo.

²⁸ Nuqusase a sooriya ka waasene a pooje piisa piitaadipan kalatta xa'a dikattaadi kara xoori orra Waaqa sakatanno patissa qapnaada. Ka oto wa heena kodo kammaayye, piitaadipa tiitaawa.

²⁹ Ka kuyyaata Waaqa kideeyye piitase a Kipsi torpana tiitaawaaw. Ma xoori akka turan koddite mina isha'en ettanto.

³⁰ roomeeta ka markappaan isha qara oranna' xaata; isha ka tammaqa ka alle iskammandesa tiitaawa; ka kodayteeta a amanteetase a orra a Yihuta jeerissa xa'a ka orrase amenteeta a Yihuta marmade olli moottuma paayya.

³¹ Xelase xaadi a oranna ka tikase a qulqulloota nyalissa' xa'an; ka kalisootase kuyyaata mina dehannitto kuli alle hattishan ka pakkoose oppa nyala heenti kodan.

³² Nuqusoose ka orrase amanteetaaysho alle diishe sassapada ikka quda koddan. Orra a fayya Waaqaayshotin kallaanno xoori ikokkonaada. Ka isqara isha oorsha.

³³ Kadipunu ishoottoppa a demo koraatetan leysaman a demo ka apittoppa kupadan, a demo ka poojaman wa qapane piisa ka tura saraman, nefooyye ookka samaytoppa ca orra lekayta upna kollishan.

³⁴ Sede a asse rakkootoppa caaneeyye, qaarqaarsa shakkaya akkadan. Orra amanteeta okoto' qapo lekayta ka ishootta quda koda.

³⁵ Haka kuyyaatase a Waaqa kide kaynitto kara'e, akka a fayya harmisame kara sookane'e ookkaappa lekaya ka akata rakkadan.

³⁶ Nuqusoose a Sooriya haka kuyyaatase a miira Waaqa kaynitto kara'e, wa ishi aakaa'e koda ka waaqadda piisa qaropa dela isi kukuttisha ka Waaqase a Waaqadda kuli qara seesan hasawada.

³⁷ Ka killannasene a xatta a aayyaassoti isho killanase a iskatta jaalanna piisa alle puyada, ka qoota wa piisa qaropeela isi kukuttisho malla killanna piisa alle diisha.

³⁸ Ka pakkaaysho oppa killowwasene a aappadaasso turan in upnini killowwa a piita pila isasene a mishshikewwa tooytino kidamma ulfeessa ka warqeeta ka sipla dakara isho sira lekaya ishi dehaysha ka ulfeessa.

³⁹ Ka akka xeelaadi tooytane'e, orra killoowwa piita pilaati sakatanno reexa ka orra isha teyyanno'e, ulfeena kutta daasha; ka samayta qara mukissampaya ishootta koda; ka mushshaara yaalaayshoti kapa'e, piita ishootta' daasha.

⁴⁰ Para dikkatta qaraayye nuqusa Kipsi ka nuqusase a Sooriya qara oranna' xa'a, nuqusase a Sooriya ka fartada sarakeella qapa isho markappa lekayaan sooka ka isi qara isha oorsha; ka akka malxa mina diittada ka piitadda lekaya qara pira.

⁴¹ Ka piitase ulfeena qapto kuli qara pira ka piitadda lekaya isi kelopa oorsada. Ma xoori piitadda Etoomi ka a Mo'api isho piita Amooni quda paka kutta orannaadi kela paha.

⁴² Isha ka piitadda isi kelopa oorsada umma piita Kipsi' nefo isha kela in pahato.

⁴³ Ka piita a Kipsi kara warqeeta ka sipla dakara isho teyanta kitto piisa harkadippopa oorsada ka piita Liipiya isho a Toobbiya kuli isi kelopaaw oorsada.

⁴⁴ Ma xoori otoota qinda pirtota isho qinda qutattati xata deeto dakaya ka tammaqa ka miiran xa'a ka orra lekayta alle' pira.

⁴⁵ Ka otanta pakateeta' kara irrootase qulqullaawte ulfeena qapto kara'e, tukkanna a kukutta ka papaxxaara a nuqusa kara' kallaada' daapada. Ma xoori pirraampira qara isha' mattaadi ito'a umma qaarqaarsa in teyo.