Xuuma Taani'eeli 10 - Mataafa Qulqulloota

Keleshaata a Taani'eeli kirra Tekirroosi kapa akke

¹ A nuqusa Faarisi Qiroosi' nuqusumeeyye para sessattati Taani'eelise Piltaasoori kidammo keleshaata akke. Wossene a akke' nefokan wa dukaata, wosen' nefo qoota oranna a kokkokaati desa. Ikka maana akka koddite keleshaatoppan upnaade.

² Sitiiyyi anti Taani'eeli anka tappa sessa piisa nyarrahatan tarpishe.

³ Umma tappoosen sessa kara'e, damta paxaara taaki so'a an damme; umma ikkayta wayneeta an ikkine umma daata an daatanne.

⁴ Parooseti leyase a paayyota oppa kuyyata kunda lakki afrattati kirrase kutta a Tekiroosi kapa'en qa'ade.

⁵ Eten ela kide ka tooyyadeeyye nama mehadda paxaara' kalsade ka saalpata warqeeta' surraappa' hiddaden akke.

⁶ Namoose dakintaadi a daka paltitta' mina'e pippildaawni, fuulaadiiw, a hankaada' mina'e ildaappa orra' qinni, ildaadiiw, apitta opayno pahan, harkaadi isho loqqaadiiw, akka sipla poora a laajene pahan, nessaadi akka nessa a orra leka' mina'e dakaanni.

⁷ Kelashaatose ana Taani'eeli patta akke ma orra ana olli co we takkan nefo in akkine; ma xoori akata tatammaqen ka alle' qahen ka deddekaden.

⁸ Anti patta ka eeyye' hase ka kelashaatose asse kutta tooyni; meella kuli ka ana kela' kafaden, pissiyyo kuli ka pursame anka hupna dape.

⁹ Eten nessa namooseti' dakayeeyye, tammaqtannen piitopa pi'e ka isi qara dakaya kuli malaale.

¹⁰ Sekkamma harka nama ka an quda qape ka ela ana xaashe; anka kilpallaan kilpiippade ka harkaan piita qapade.

¹¹ Erkampattootase ka ana' kiite, “Taani'eeli ke akata jaalatame, anti ke kapopan erkameey qa'ado ka waan ke' lella' fayya' dakkaysado.” Ete asse ana' kiiteeyye, anka xaraan xa'e ka qa'ade.

¹² Ikka ana' kiiteewwe, “Taani'eeli in fuuran a wossen upnaatta'e, Waaqaayti tura isi shakkissa paayyiteeyyeew qinseetaayti dakaatte anti nefo ka sede ke' lela de'e.

¹³ Erkampatootase mankisteeta Faarisi' tooytinitto ka kuyyaata kunda lakki takka piisa ana tura' qa'atte. Ma xoori saarase a erkampattowwa oppa isase Mika'eli kidammitto de'e ka ana qaarqaare anka eeyye erkampattootase mankisteeta Faarisi' tooytinitto mina' diishe.

¹⁴ Ha wa itturopa orraayshin qara' kaya'en ke' lela' de'e. Semmalla tooy kelashaatose wa itturopa kodda'e akkinni.”

¹⁵ Ete asse ana' hasawannittooyye waan kida'en dape ka piitan xata matta raa'ishe ka eeyye' dakkaawe.

¹⁶ Sekkamma erkampattootase nama pahato ka hibbaayyo qappatte, anka haasawatta paayye ka ishi' kide, “Poqallaay ha kelashaatose' minan xaate'e, dakinta ana suraawe meella piisa ka ana kela nukkullaaden.

¹⁷ Ata Poqallaay anti orxaytaayti attan ke poqalla olli haasawatta ettansha? Ha amma nefo meella ana kela in caan anka nessa oorsatta kuli malaale.

¹⁸ Erkampattootase nama pahato ka a lammattati ana quda qappatteew anka kokkonnaade.

¹⁹ Ikka ana' kiite, “Atti ke a Waaqa ke jaalade, a nakayta ke' koddo! In fuuran ka kokkonnaado ka japaado! Ete asse ana' kiiteeyye anka kokkonnaade ka ishi' kide, “Poqallaayyo i''ana kokkonnasseey amma oori haasawado.”

^20-21 Ikka amma oppa' ooreew ka ana' kide, “Hela waan malla ke kapopa de'e i''upta? Ha wossen mataafa dukaata oppa' taafame ke upnassa mallan de'e. Amma oori erkampattootase a mankisteeta Faarise torpa'en tiitaawa. Oton anti aano kammaayye erkampattoota a mankisteeta Kirikki'i de'aw; a koddito ma oton ishootta torpinooyye, erkampattootase Isira'eeli tooytinitto Mika'eli maliiyyi a ana qaarqaarto takka nefo in kitto.