Xuuma Taani'eeli 1 - Mataafa Qulqulloota

Taani'eeli isho moottadaadi tika mankisteeta Paapilooniti

¹ A Iyyo'aqemi' piita Yihuta' qara' nuqusumeeyye para sessattati, Naapukedenasoori nuqusa Paapilooni ka Yursaalami kapa mure.

² Poqalla ka akka Iyyo'aqeemi nuqusase a Yihuta' poojo ka mehadda a tika qulqulloota' quda lamaya saro' kode. Naapukedenasoori ka orrase a nuqusa Yihuta ollin pooje qeede ka Paapilooniiyyi tikase a kela killoota kodanno kela' hide ka mehaddasene a sare tika a kela meeha a qulqullaawe xaaynaan kela' xaaye.

³ Nuqusase Naapukedenasoori ka saara orrase a tika mankisteeta' tooytino Ashfanaasi kidammo, akka aano ka hellaa Isira'eeli oppa a sanynyeeta nuqussa oppa dalade isho hellaa taanynyada oppa orra reexo ka isha kapopan de'o ajaje.

⁴ Orra a reexno nefo, xayyoolayta a toobuma in qapnin ka xarjaallewwa a ookuma ka upna qapa ka wa kollinnaane eennoow qapanno ka tika nuqusa kara koda koda ettansho kodda ishootta parpaaccisni; ka akka fitalla ka afaa Paapilooni' kuli ishootta kollisho'e, Shfanaasi ajaje.

⁵ Ka a koda tika nuqusa in paayyinin turanne, akka haka para sessaati tika nuqusaati damta nuqusa dammo pahato isho taadeta a wayneeta a nuqusa ikino pahato ishootta' daashan ka kollishane'e orxayaadi ajaje.

⁶ Orrose reexame oppa a sanynyeeta Yihuta' kodde Taani'eeli ka Hanaaniya ka Misa'eli isho Asaariya ca.

⁷ Saara orrase tika nuqusa' tooytino ka ishootta' maxxada purshe ka Taani'eeli Pilttasoori kide ka Hanaaniya Sidiraaqi kide ka Misa'eli Misaaqi kide ka Asaariya'e Apdinaako kide ka hale.

⁸ A koddito ma Taani'eeli damta isho ikkayta tika nuqusa akka isha in nyalinnini fade ka akka damtoose ka ikkaytoose isha'en daannin ikka isha in nyalinnini'i, Ashfanaasi naappade.

⁹ Waaqa ka akka Ashfanaasi Taani'eeli jaalado ka suraysado' kode.

¹⁰ A koddito ma Ashfanaasi iTaani'eeli' kide “Ha damtoose isho ikkaytoose akka ishina' daasamo poqallaayyo nuqusa ajajeey, oto ishina xayyoolaya a ollin kittane kapa a'apdattaneeyye xayyo ana ishshaay, anti in furri.”

¹¹ Sekkamma Taani'eeli ka tooytampaytase Ashfanaasi akka isha ka moottadaadi Hannaaniya ka Misa'eli isho Asaariya tooyto' reexe kapopa aane ka kide,

¹² “Haka kuyyaata kudaniti'i, damta a so'a oppa in kodammin isho pisha pattan ino orxayaatti ekkaysado.

¹³ Ka sekkamma ino isho isasene damta tika nuqusa' damma oli kapa' tooye. Sitiiyyi oori wa' qara' kaytaatinni' qootinno desa wa ke aaka koda i'ettanissa.”

¹⁴ Isha ka wa kiinaane oppa' sale ka kuyyaatase kudani kara ishootta ekkaysade.

¹⁵ Kuyyaatase kudani kammaayye, opan ka isasene damta tikase a nuqusa' damma oli kapa ishootta tooyyen; opa Taani'eeli tupa miinta ka oyni ikka kakappuma kuli a taakane qara qapan.

¹⁶ Kuyyaatoseti desa paayyatte aappase tika nuqusa' tooytino ka damtase tika nuqusaati ishootta erkammitto alle' diishe ka damta a oppa so'a in kinnini patta ishootta' daanni.

¹⁷ Waaqa ka xayyoolayse afuri'i ookuma ka upna kolluma isho matte pata oorsatta daashe ka ishoottoppa desaaw Taani'eeli'i, upna keleshaata akkeeta isho a olsa fureeta' daasheew.

¹⁸ Ete parase sessa dikkadeeyye Ahfanaasi xayyoolayse'e Naapukedenasoori turopa dehayshe.

¹⁹ Nuqusa ka ishootta piisa kakaassade. Umma ishoottoppa nama a Taani'eeli ka Hanaaniya ka Misa'eli isho Asaariya paho takka nefo in co. Semmalla ishootta ka tika nuqusaati koda koda' reexamen.

²⁰ Nuqusa ete ishootta kaassannooyye, akka upna isho ookuman so'aya isho tipampayasene' piita a nuqusa mukinno oppa kala' piisa qara harka kudanin qapan.

²¹ Taani'eeli ka haka para oppa Qiroosi' nuqusummo kuli'i tika nuqusa kara koda kooni.