Xuuma Sakkaariyaasi 9 - Mataafa Qulqulloota

Dapa a paarkaala Isira'eeleta a ishootta kapandesa ca' qara' muramo

¹ Ilda orra isho xawwidesaaw ilda a kaffa Isira'eeli piisa qinda Waaqa opaaw tooyanniiy, Waaqa dapa a piita Hatiraaki' qara' mure, katama Tamaasqo kuli qara'e mura.

² Akkimoose mina'ew dapoose' piitase Hatiraaki quda oorto a Hamaati ka katamasene a ookka lekaya qapa a Tiroosi isho a Sidoona kuli qara' mura.

³ Tiroosi issi'i mishshikewwa harmisatte ka pirrewwa akka piita' mina' tuulatte ka warqeeta akka tahayta' mina isikapa' kuulatte.

⁴ Ma xoori, Waaqa wa qapta piisa isheetta qara qeeda ka teyantaadi pakateeta karopa tura alle' tuqa; katamaadi nefo ka apittan kupadan.

⁵ Katama Asqeloona ka sede akkan ka fuuran; katama Kaasa' nefo ka qaapa qara' pi'an; Eqrooni ka asseew xasa murta. Nuqusa Kaasa kuli ka alle' pata; Asqeloona ka oori onta.

⁶ Pohenna a orra ka Ashtooti qara piran. Waaqa ikiini, “Isipeepa a Filisteemi kulin alle' pashsha.

⁷ Anti diikan afaasso karaayye alle' haqa ka damta a nyalte ilkasso' kelaayye alle' puqqisha; peella hase nefo a Waaqa'e koddan. Ka piita Yihuta karaayye kafa takka koddan. Aqarooneta nefo akka orra Iyyapuusata' mina'e koddita.

⁸ Anti ka tikiyyo sarampaya kelaayye tooyta. Qootan ildaan qara caado ka samaytiyyo tooyto malla, arepadesa nyiraamaya ishoottan miiddan.”

Deena nuqusase a Siyyooni

⁹ Atti enenta Siyyooni, akata xasoodo! Atti enenta Yursaalami, xasan ililiwe! Ha nuqusase' xaayti hanqeellayta ka dinshampayta isha naalayta kodda ka harreeta qara' kuti'a, innayya harreeta qara'e kuti'a ka qaraayye ke kapopa de'a.

¹⁰ Waaqa ikiini, “Anti sarakellaan piita Efreemi karaayye, pashsha ka fartada a oranna Yursaalami karaayye tawsha; lawadda a oranna alle'en mooja; nuqusaayti ka samayta piitati nakayta salisha; xeelaadi nefo pakateete paayyatte haka pakateetati'i oornaada ka kirrase a Efratiisiti paayyatte haka pora oppa piita oortooti'i paldaada.

¹¹ Qootan kalisoota a diikatin ke olli kodayteeta kodade malla, orra ke tura hidamen qaawa a pisha in qapnin kara nataan sooksha.

Samayta a Waaqa akkima porase a oppopa poojameeyye tiitaawo

¹² Ishina a hidame ka xasan kallaannaatiiyyi! Poraayshin a nakayta opa tiitaawa amma nefo wa a daptene kapa'e akkan harka lakki ishina' oorsho'en haasawanni.

¹³ Yihutan akka paanta' mina' kodada ka Efreemi akka lawa' mina tittada; oo Siyyooni! Hellaattin oranna' xaasha ka akka koraateta a maxanyawwa' mina ke kodada; akka hellaa Kirikki qara' xaata.”

¹⁴ Waaqa ka samaytaadi qara akkaada oranaadi ka akkima hankaada mina akkaada; Waaqa Poqalla ka kaasa dawa ka puppeeta qinda tupatta kara aana.

¹⁵ Waaqase we piisa ettaninno ka ishootta tooyta ishootta ka paarkaaladdaasso pashshan. Ka dakaan kullumissaan ishootta piran ka ikan ka akkima nama taadeta wayneeta' maashshoode mina ullupan. Akka diika toma kalissoota oppa immakaanno ka qaran tuqammo mina'e, diika paarkaalaassoti asse tuqma.

¹⁶ Kuyyaasetiiyyi, Waaqa Poqallaasso ka akkima sikmayta wa neeqa kela xellootaadin pahano mina'e, samaytaadin paha; ishootta ka akkima sira kulleeta ulfeena qara ca pippildaawnaan mina'e, piita Waaqaayshoti oppa pippildaawan.

¹⁷ Paxaaruma isho xarjaalluma a piitoseti oo atta orra qawwayshan! Unta a oppa' palito hellaa a hamiyyaati'i pissa koota, maaddota wayneetaadi'iw, tuparra'e pissa daassa.