Xuuma Sakkaariyaasi 8 - Mataafa Qulqulloota

Waaqa Yursaalami saka'e kippeeta daashe

¹ Ammaaw erkana a Waaqase we piisa ettaninno ka anopa de'en ka kiini,

² Waaqase we piisa ettaninno ikiini, “Siyyooni malla yoota kutta'en qapa, yootose an ishina' qapo mallaawwen paarkaala qara aarri.”

³ Waaqa ikiini, “Anti qinda Siyyooni opan tiitaawa ka Yursaalami kara' kallaada; Yursaalami ka katama a dukaata kara kitta' kidamta. Irrootase a Waaqase we piisa ettaninnooti ka irroota a qulqullaawte kidamta.”

⁴ Waaqase we piisa ettaninno ikiini, “Anti amman qimaya isho qimawwa raaksha, ikka qimuma qaran xaate'e, Yursaalami kara xaliyyaan pora aanan ka mooraddaappa' qaa'an.

⁵ Hellaa a hamiyya isho a tuparra ka moora a katamadda oppa qaasan ka kahadan.”

⁶ Waaqase we piisa ettaninno ikiini, “Sitiiyyi kadi punu sede ka fuula samayse peela a Isira'eeli kodde tura wa orra qawwanna' pahanaatta nefooyye, hela ana Waaqase we piisa ettaninno tura, ini wa orra qawwanna'e?”

⁷ Waaqase we piisa ettaninno ikiini, “Anti samaytase xayyo poojame ka qinda piirtota isho a dumaatati kalonnen pahada.

⁸ Ka akka Yursaalami kara' kallaadane'e eeyye ishootta kalsha, ikka samaytiyyo koddan; anti ka Waaqaaysho kodda ka dukaata isho hanqeellumaan ishootta muksha.

⁹ Ishina akka tikase a Waaqase we piisa ettaninno lammatta' qupamto'e a kiritta katameeyye wa xuumampaya sitiiyyi haasawadene amma sapanoose oppa dakayeetiiyyi, tikase a qulqulloota a Waaqa' qupa japaada.

¹⁰ Parroosen turanne, nama mushshaaraadi teyni in co, umma horeeta kamma xaayya qeedammi in caan. Qootan akka nama piisa olqara' xa'o' kode malla, paarkaalummaata qaran xaate'e, nama nakaytan sookni in co ka kalli in co.”

¹¹ Waaqase we piisa ettaninno ikiini, “Amma xoori, samayse peela hase qara'e a xatta' mina'e an kodo.

¹² Nakaytanne ayladan, sakkatta nefo ka fayyaan deha; dishma a wayneeta' fayya'e dalta dala; piita ka unta palassa, moonta ka tadahata daassa, anti sede piisan peellasene' haseeti kodeeta' koda ka daasha.

¹³ Ishina samayta Yihuta isho a Isira'eelitiiyyi! Ha xatta samayta piita' tura'e' pahana a jiija' kodditen. Amma xoori, anti ishinannen paha; akka orra saka' kodditaneey, semmalla ishina' japaada ka in fuuran.”

¹⁴ Waaqase we piisa ettaninno ikiini, “Eta aappadaassin xatta akata ana' miiraysheneeyye, anti an ishootta an suraysannin maliiyyin ishootta patissa' piisade.

¹⁵ Amma xoori, samayta Yursaalami isho a Yihutaati'in wa paxaara' koda' piisadeey, in fuuran.

¹⁶ Wa koda ishin parpaaccisna sene. Ishina matta matta'e dukaata olli' haasawada ka mooraddaappaayye, dukaata mura ka deexa nakayta' deexa.

¹⁷ Karittaayshin kara'e, oli qara wa neeqa'en dikadan. Ka dartan xaxatta in jaaladan. Waaqa ikiini, anti sene piisan needdanniiy.”

¹⁸ Amma nefo erkana Waaqase we piisa ettaninno'e ana kapopa de'e ka kiiniwwi,

¹⁹ Waaqase we piisa ettaninno ikiini, “Damta musatta a leya afratta ka a kenatta ka a tappatta isho a kundatta, orra Yihutaati eta a xasa ka a ililiwa isho a xaysonessuma a xasa'e koddita. Semmalla ishina dukaata ka nakaytaaw jaalada.”

²⁰ Waaqase we piisa ettaninno ikiini, “Samayta kuttayta isho orra a katamadda lekayaappa kalo amma Yursaalamipa de'a.

²¹ Orra katama takkaneppa ollin kalo ka orra katama pila kara kalo kapopa aana ka ishootta' kida'e, ‘xooya ka jarjartan anna ka Waaqase we piisa ettaninno qara araara qinsanna ka isha faana, ino' nefo mattinno eeyyepaawwen anninnaay.’

²² Samayta kuttayta isho a mankistewwa kokokkoka ka ana Waaqase we piisa ettaninno fada'e ka olli araarama'e Yursaalamipa de'a.”

²³ Waaqase we piisa ettaninno ikiini, “Kuyyawwosenetiiyyi, kaffa ka afadda lekayaappa nama kudani ka kayla ohaata nama a Yihuta takka kokkonnaysha ka qapa ka kida, ‘Akkima Waaqa ishin olli co in dakayneey, ino ishin olli eeyyepa anno?’”