Xuuma Sakkaariyaasi 7 - Mataafa Qulqulloota

Waaqa akkima damta musatta a kamma dapte teyyanni in kinnin

¹ A Taariyoosi' nuqusumeeyye para afrattati leyase a sakalatta Kisile kidammo oppa kuyyaata afrattatiiyyi erkana a Waaqa Sakkaariyaasi' de'en.

² Orra Peteliiyyi kalo, akka saka a Waaqa' qinsadane'e Sari'eseeli ka Rekemeleeki isho orra a ishootta quda co ollini qeesewwa isho xuumampaya a tikase a qulqulloota a Waaqase we piisa ettaninno opa erken.

³ Ikka kaassadan ka kidane, “Hela akkan parra lekaya koone mina'e, leyase a kenatta oppa tikase a qulqulloota' pootamte malla, nyarrahata ka damta musatta kammaaw caanna?”

⁴ Sekkammaayye erkana Waaqase we piisa ettaninno ka anopa de'en ka kiini,

⁵ “Samayta piitooseti kalo piisa'e ka qeesewwa'e lele ka kide, ‘Parroosen tarpe kunda tappa kara'e, leya a kenatta isho a tappatta oppa, damta musattaayshin ka nyarrahataayshin, hela dukaatanne ana malla kiiten ka asse kootene?

⁶ Sede a dammittan ka ikkinittan, atana isi patta malla' kiinittan ka dammittan ka ikkinittan?

⁷ Eta a Yursaalami isho katamadda a kapandesa ca a orra oppa immakaade ikka teyantooden ka nakaytan eeyye kallaannaaneeyye, akkimase' mina'ew, sapana a samayta kuttayta a piita qinda tupatta isho a qinda piirtota opa kittooyye kunkunnawwa qara isho koommayta tupattati kalooyye, erkana a Waaqa xuumampayaadi a xatta' qudan ishootta' haasawade sene are caa'enne?’” Akka dukaata mureeta isho diissata olli' kodeeta wa a jaalatame kodden;

⁸ Erkana a Waaqa ka amma Sakkaariyaasi kapopa de'en ka kiini,

⁹ “Waaqase we piisa ettaninno ikiini, ‘Dukaata mura ka mattaayshina ishina oli suraysada ka diissata olli' koda.

¹⁰ Hiyyettewwa ka he'aya ka kalayta isho rakkatampaya in miiddan. Mattaayshina ishina karittaayshin kara'e wa neeqa olqara'e in dikadan.’

¹¹ “Ishootta' xoori, dakaya itiiten ka ishi' tulta katen ka nappaasso' dufaden.

¹² Ka karittaaysho a daka' mina kokkonnayshen ka erkanasene ka seerase a Waaqase we piisa ettaninno xuumampayasene' xaadi a xatta qudan hapuraadin ishootta' erke dakaya tiiten. Semmalla Waaqase we piisa ettaninno ka akata ishootta qara' miirode.

¹³ Waaqase we piisa ettaninno ikiini, ‘An anti ishootta haleenooyye, qoota ana dakkaysannaan malla, oto ishootta ana halanaaneeyye, anti oppa ishootta an oorsho.

¹⁴ Anti orra piita hapta a in upnin oppopan puppeetan ishootta pittinnayshe. Piisse' xaaysho ka ishootta kammaayye ona koddite, nama takka' nefo ka oppan anni in kinnin ka oppan kalli in kinnin; ishootta pora asse pahonne piisse' paxaara onshen.’”