Xuuma Sakkaariyaasi 6 - Mataafa Qulqulloota

Sakkaariyaasi akka sarakeladda afuri keleshaatoppan akke

¹ Anka amma moontandela tooyyadeew ka sarakeladda afuri a irrowwa sipla lakki aroota kara sookna akke.

² Fartada a makaalaysa ka sarakeella a paayyota tinni, fartada a poorpoora ka a lammatta tinni.

³ Fartada a atata'ew, a sessatta'e tinni, fartada pujanjarsa ka a afratta tinniiw. Piisanta ka kokokkoki.

⁴ Anka erkampattootase ana olli haasawannitto kaassade ka kide, “Poqallaay! Ata sene maana?”

⁵ Erkampattootase ka ana' oorisse ka kiite, “Sene hapurrasene a moonta afuri, isasene Waaqa poqallasene a piita piisa tura qa'anna'e sooke ka deeni.

⁶ Sarakeella a fartada poorpoora tinnaane, qinda qutatta opa anni; a fartada atata tinnaane, qinda dumaata opa anni; a fartada pujanjarsa tinnaane'ew, qinda tupatta opa anni.”

⁷ Fartadoosen kokokkoka ete sookeneeyye, akka piita piisa qaropa a'aanane'e tittimsanni. Erkampattootase ka ishootta' kiite, “Xa'a ka piita piisa qaropa aana!” Ishootta ka piita piisa qaropa aanen.

⁸ Sekkammaayye erkampattootase nessa a kuttanne ana' kiite, “Fartada a qinda qutatta piita opa aanene, akka miira Waaqa harfo'e koden.”

Ajaja a Iyyaasu daateeta ka nuqusumissa' daasame

⁹ Erkana a Waaqa ka amma nefo ana kapopa de'enew ka ana' kidene,

¹⁰ “Orrase piita Paapilooni opa poojame ka kale, Heltaayi ka Toobbiya isho Yita'iyya qara warqeeta isho dakara a pirreeta qeede ka kuyyaasetiiyyiiw tika Iyyoosiyaasi a inna Sofoniyaasipan aane.

¹¹ Ka warqeetase isho dakarase a pirreeta' qeede ka kulleeta a ulfeenati' tume; ka matta saarase a qeesewwa a Iyyaasu a inna Iyyosedeqi qara' kalshe.

¹² Ka ishi' kide, ‘Waaqase we piisa ettaninno ikiini, namase a maxxaadi ‘Taama’ kidame sede; isha pora oppa co oppa'e poora ka tika qulqulloota a Waaqa qupa.

¹³ Isha tika qulqulloota a Waaqa'e qupa ka kuttuma qapnaada ka alkasene a nuqusuma' qara' kuti'a ka muksha ka alkasene qara qeesitta kodda ka koda lakki piisa nakaytan olloppa' koda.’

¹⁴ Kulleese ka akka qaran Helemi ka Toobbiya ka Yita'iyya ka innasene a Sofoniyaasi Heeni, matte oorsadane'e, tikase a qulqulloota a Waaqa' kela xaayamta.

¹⁵ Sitiiyyi orra a pora sekaayye kalo ka qaarqaarsa qupeetase a tika a qulqulloota a Waaqati' de'a. Ishina' nefo akka Waaqase we piisa ettaninno ishin kapopa ana erke i'upnaattan. Sede nefo oto ishina dukaatan qaaleta a Waaqa a Poqallaassinati ajajammittaneeyye koddita.