Xuuma Sakkaariyaasi 5 - Mataafa Qulqulloota

Sakkaariyaasi akka mataafa a ollopa marrame keleshaatoppan akke

¹ Anka amma tooyyadeew ka mataafa a ollopa marrame a moonta quda anno akke.

² Erkampattootase ka ana kaasatte ka kiite, “Maana akkini?” Anka ishi oorshe ka kide, “Mataafa a ollopa marrame, a derumtaadi dikla kunda lakki, paldumtaadi ka dikla kudani kodde, a moonta quda annon akkini.”

³ Isheetta ka ana' kiite, “Ha sene jiijasene piita piisa qara' de'a akka mataafose qara qinda takkan taafamte mina'e, nama hanno piisa ipata; akkimoose' mina'ew akka qinda pilaatin taafamte mina'ew, nama dartan xaxanno piisa ipata.

⁴ Waaqase we piisa ettaninno ikiini, ‘Ana jiijoosen erka, ikka tikase a kera isho tikase a namase maxxiyyon dartan xaxanno karopa kulla ka eyye tikkaasso kara tawan ka turaayye tikkaasso ka qoraasso isho dakaddaasso alle qitqishshan.”

Sakkaariyaasi iskatteeta satara kara kitto keleshaatoppan akke

⁵ Erkampattootase ana olli haasawannitto ka deete ka ana' kiite, “Moontandela tooyyado! Ka ini deenitto maana akka koddite tooye.”

⁶ Anti ka kide, “Ata sene maana?” Ikka ana' kiite, “Ini satara a paatan kurraane;” Ka kiiteewwe, “Ini dapa samayta piita piisa qara cooti.”

⁷ Sekkammaayye ete satarasene' turaayye dufana sipla ulsa oppa kodame' paneneeyye, satarasene karaayye iskatteeta takka kutiite akkaade.

⁸ Erkampattootase ka kiite, “Isheetta nyala.” Ka satarasene karopa kamma xata tuqquurte ka dufanasene a sipla ulsa satarasene tura' dufte.

⁹ Sekkammaayye eten ela kide ka tooynooyye, iskatta xoolla kela xayxayta qapo lakkin akke. Xoollaasso nefo akka xoolla xooxayta' mina'e kokkoki. Ikka satarasene piite qeeden ka moontandela ishin xa'aden.

¹⁰ Anka erkampattootase ana olli haasawannitto' kide, “Ata ayshopa sataroosen qeenni?”

¹¹ Isheetta ka ana' kiite, “Sataroosen Paapiloonipanne anni ka eyye tika ishi' qupan ka poraadi kela' xaayan.”