Xuuma Sakkaariyaasi 4 - Mataafa Qulqulloota

Sakkaariyaasi akka qoota wa a qara ipsa xaaynaaneti desa keleshaata akke

¹ Erkampattootase ana olli haasawannitto ka desa oorte ka akkima nama takka mukittaapa impasinnaan mina ana impasisse.

² Ka ana kaassatte ka kiite, “Maana akkini?” Anti ka kide, “Wa a qara ipsa xaaynaane a warqeeta pattoppa kodame'en akkini. Kuutaadi qaraayye okta sayteeta'e ca; isheetta qaraayye ipsada opayna' tappa ka caan ipsadosen tappa nefo matta mina'e luulla a karan xaynaata tarpinitta'e qapan.

³ Akkimoose' mina'ew qora a ekerta lakki ca, takka a okta sayteetatiiyyi qinda akkittatin ca takka ka qinda pittitatin ca anka akkiniiw.”

⁴ Anka erkampattootase ana olli haasawannitto kaassade ka kide, “Poqallaay! Ata kuli sene maanaaw?”

⁵ Isheetta ka ana' oorisse ka kiite, “Hela xawwi sene maana akka kodden a upto?” Anka kide, “Poqallaay! Anti an upo”

⁶ Sekkammaayye ikka ana' kiite, “Erkana a Waaqa a Sarupaapeeli erkame anka ishi' lela' de'e ikiini, ‘Hapuriyyonne diisheey hupnaayti isho kokkonnumaattinni a ettanisso.’ Sede ana Waaqase we piisa ettaninno haasawade.

⁷ Atti irroota a kuttatiiyyi, ata atti a' maana? Ha fuula Sarupaapeeli tura'e' laka olimina' oore koddita. Awta isha dakase a libba qaropa fayyinnooyye, orra ka xasooda ka kida, ‘Oo atta paxaari! Oo atta paxaari!’”

⁸ Erkana a Waaqa ka amma ana kapopa de'eneew ka ana' kidene,

⁹ “Sarupaapeeli isha kiritta tikoose a qulqulloota harkaadin kateey, ishaaw harkaadin dikkisha; ishina ka oori akkima Waaqase we piisa ettaninno ishin kapopa ana erke upnaattan.

¹⁰ Ata ayno kuyyaata a oppa we shakkaya kodammaan puyade? Orra oto tumpeeta harka Sarupaapeelippa akkooyye, ixasooda wossen qara ipsa xaaynaane tappa, ilda a Waaqa a piita piisa qara anna ka qinda pisa opa akkina”

¹¹ Anka erkampattootase kaassade ka kide, “Qorosen a ekerta lakki, a porose qara ipsa xaaynaaneeyye qinda akkitta isho a pittittatin ca kuli' maana?”

¹² Ka a lammattati kaassade ka kideewwe, “Taammosen a ekerta lakki, a luulla warqeeta lakki kapa ca ka sayteeta a warqeeta urqinna maanaaw?”

¹³ Isheetta ka ana' oorisse ka kiite, “Hela xawwi sene maana akkima kodden a upto?” Anka kide, “Poqallaay! Anti an upo”

¹⁴ Isheetta ka ana' kiite, “Sene eeyye ca lakki orra poqallasene a piita piisati koda kodeeta' daatame.