Xuuma Sakkaariyaasi 3 - Mataafa Qulqulloota

Sakkaariyaasi akka qoota saara qeesewwaati desa keleshaata akke

¹ Sekammaayye Waaqa ka saarase a qeesewwa Iyyaasu a fuula erkampattoota a Waaqa tura' qa'ade, seetana ka qinda akittatin Iyyaasu xasasa qa'ade ana akkishe.

² Erkampattootase a Waaqa ka seetana' kiite, “Atti seetano! a Waaqa ke fukko! Waaqa Yursaalami reexade a ke fukko! Ha namoose are co akka torrayta okta kara shore mina.”

³ Sitiiyyi Iyyaasu ohaata a kolootte uwwisade ka erkampattootase' tura' qa'anni.

⁴ Erkampattootase ka orra isheetta tura' qa'adeti' kiite, “Ohaase kolootte alle' quda maysha!” Ka Iyyaasu' kiiteewwe, “Tin in juppootaayti ke qara tawshe ka ohaata fayya' nefo ke quda uwwisha.

⁵ Anti ka kide, “Parroota haaraya matta qara ishi' mara!” Ishootta ka a erkampattoota Waaqa eeyye qa'atteeyyeew parroota haaraya matta qara ishi' maren ka ohaata ishi uwwishen.

⁶ Erkampattoota a Waaqa ka dehaama kokkoka Iyyaasu' daasse ka kiite,

⁷ Waaqase we piisa ettaninno ikiini, “Atti oton saantiyyonne kallaanniiyyi ka wa an ke ajaje' tooytanniiyyi, tikiyyo' mukissa. Ka paapahiyyo nefo qara tooyeeta i'ettanissa ka anti ka orroose are' qaqqa'ade olliiyyi akka ana turandesa a'anto' koda.

⁸ Atti ke a qeesitta kutta kodde Iyyaasu, me dakkaysadooy! Ishina isha olliiyyi koda koona ka are caatiiyyi ka wa a itturopa koddaati' milikkita kodda dakkaysadaay! Orxaytase' xayyo ‘Taama’ kidammo akka ishina' de'en koda.

⁹ Tin daka takka an Iyyaasu tura' qaatishe ca; dakoose qaraayye qindadda tappa ca. Waaqase we piisa ettaninno ikiini, anti dakoose qara'en taafeta poja ka kuyyaata takka oppa'ew dapa a piitooseti alle' tawsha.

¹⁰ Waaqase we piisa ettaninno ikiini, kuyyaasetiiyyi, nama dishma waynetaadi ka a hilteetaadi' kela'e qaa'a ka xeliyyaadi damta' hala.”