Xuuma Sakkaariyaasi 2 - Mataafa Qulqulloota

Sakaariyaasi akka wataroota a paatan ekkaysannaane keleshaatoppan akke

¹ Anka keleshaata a pila a nama takka wataroota a paatan ekkaysannaan harkoppa' qapade akke.

² Anka ishi' kide, “Ata atti ayshopa anni?” Ikka ana' kide, “Derumta ka paldumta a Yursaalami atta akka kitto ekkaysatta'en anni.”

³ Erkampattootase ana olli haasawannitto ka oori' tawte, erkampattoota a pila ka isheetta mina deete.

⁴ Ka isheetta' kiite, “Keere ka xayyoolayse eeyye co' kide, ‘Ha Yursaalami lekumta a orra isheetta kara kalo ka a horeetaadi' qaran xaate'e, akkima katama a quda kawwatta in qapnini mina'e koddita.

⁵ Ma Waaqa ikiini, ana kapa oxinta kawwatta a apitta ishi' kodda ka kara'e ulfeenaadi kodda.’”

Orrase poojame akka piitaaysho opa ooro'e kaassatame

⁶ Waaqa ikiini, “Ana qindadda piita afuri piisa oppa ishin pasisheey; amma xoori, xa'a! Xa'a! Ka piita a qinda qutatta kara sooka ka alle' qaha.

⁷ Atti Siyyooni, ke a enenta Paapilooni olli kalto, alle' kela tawe.”

⁸ Waaqase we piisa ettaninno i'ana' kiini, “An ke ulfeesse ka samaytase a piita ishin sare qaropa ke erke kammaayye, nama ishin qappanno, nama tuma iltaadi oppa qapanno mina.

⁹ Amma anti harkiyyon ishootta qaropa xaasha, isasene karpishshadda kodde ka ishootta saran.” Sekkammaayye akka Waaqase we piisa ettaninno ke kapopa ana erke upnaatta.

¹⁰ Waaqa ikiini, “Oo enenta Siyyooni, ha anti in de'a ka ishin oppa' kallaaday, masmuureta dawada ka xasooda.

¹¹ Awsetiiyyi, samayta a piita lekayta'e Waaqa kapopa heeqqa ka samaytiyyo kodda; anka ishin oppa' kallaada.” Atti ka akka Waaqase we piisa ettaninno ke kapopa ana erke upnaatta.

¹² Waaqa ka piitase qulqullaawteppa'e Yihuta kodayteetaadi' kodada ka lehada ka amma nefo Yursaalami reexadaaw.

¹³ Waaqa tikase' xaadi a qulqullaawte xata ideena' xa'ey, nama piisa a turaayye afa qapado.