Xuuma Sakkaariyaasi 14 - Mataafa Qulqulloota

Waaqa akka de'o ka nuqusumo

¹ Oo Yursaalami! Kuyyaatase a Waaqa a oppa waasene ke qara sarame ildaattippa desa qootadan ideeta.

² Waaqa kuyyaasetiiyyi, akka Yursaalami torpane'e samayta piita piisa ollopa oorsha; ikka katamoosen qara piran ka tikkaasso saran ka irreetan iskattaaysho olli mukan; orra katamoosene oppaayye paka takka ka poojama; orra a kela hase xoori, katamoosen kara alle'e in sooko.

³ Sitiiyyi Waaqa ka xa'a ka akkima eta orannaati orana torpino mina'e samayse a piita' torpa' sooka.

⁴ Kuyyaasetiiyyi, loqqaadi irroota a Taprasayti isase Yursaalamiiyyi qinda piirtota opa kitto qara'e qa'adan. Irroose a Taprasayti ka qinda piirtotati desa ka haka dumaataati lakki' kaamatta, naaba kuttayta ka kara sooka; irroota paka takka ka qinda qutatta opa hasta, paka takka ka qinda tupatta opa hasta.

⁵ Ishina ka naabose haka a Saaliti ooro karan desa qahatan. Ka akkima sapanase a Oosiyani nuqusa a Yihutaati piita lellehete akka turaayye qahaten mina'e asseew qahatan. Sekkammaayye Waaqa Poqallaanno ka de'a, qulqullowwa piisa ka isha olli de'an.

⁶ Kuyyaasetiiyyi, apteenta ka qorra isho la'ayta in caado.

⁷ Kuyyaase, kuyyaata a xawwi' desa kitto koddita. Kuyyaase, kuyyaata a Waaqa kapa upnaysamte koddita. Awsetiiyyi, shishshipeew la'ayta umma kuyyaata taaki tukkanta in caatto.

⁸ Kuyyaasetiiyyi, Yursaalami karaayye pisha caatta'e paada. Paka takka ka pakateeta a qinda piirtota opa kittopa urqan, paka takka ka pakateeta a qinda dumaateta opa kittopa urqan. Ka pone isho sorooreeyye kuli urqa tupa' tawan.

⁹ Sitiiyyi, Waaqa piita piisa qara'e nuqusuma; kuyyaasetiiyyi, Waaqa isha takkayta caada! Maxxaadi nefo takkaytaaw kodda.

¹⁰ Piitase Kepa'i paayyatte haka Rimooniti kitto isase Yursaalamiiyyi qinda tupatta opa kitto ipursamta ka laka olimina' oore koddita. Yursaalami' xoori, xarra Piiniyaami paayyatte haka xarra paayyotati'i ka xarra qeppeellitta isho kawwatta Hanaani'eli paayyatte haka porase a kara nuqusa wayneeta diipnnaaneeti'i, eeyye poraadippeelaaw akka kuttatten kallaatta.

¹¹ Orra ka oppa' kallaada, umma arepa desa lammatta in qitqitto. Ka qaapa mali nakaytan kallaatta.

¹² Waaqa samaytase a piita Yursaalami torpe piisa qara'e erkannaata qeeda. Dakintaaysho ka a eeyye qa'annaan quda'ew tupa japjapta; ildaasso ka qaawwaasso kara'ew tupa japjapan; arrapaddaasso ka afaasso kara tupa japjapan.

¹³ Kuyyaasetiiyyi, Yaaqyaaqta kutta'e ishootta tammaqissa'e Waaqa kapaxata ishootta qara de'a. Nama takka ka xelittaadi qara xa'a ka oli leyshan.

¹⁴ Orra Yihuta ka eeyye desa Yursaalami torpa ka teyanta samayta a piita a ishootta kapan desa co piisa warqeeta ka dakara isho ohawwa akata kutta ollopa oorsada.

¹⁵ Erkannaata a asse pahatoow ka fartadaasso ka kaankewwaasso ka kaallaasso ka harrewwaasso isho horeeta a safara paarkaalaassoti kara kitto piisa qara' deeta.

¹⁶ Sekkammaayye, samayta piita a Yursaalami torpe ka leeta kela hase piisa, Waaqase we' piisa ettaninno nuqusooseti sakatatta'e ka xaysoota shaakka ulfeessa'e para paroppa eeyyepa ollopa sooka.

¹⁷ Oton samayta piita oppaayye, Waaqase we piisa ettaninno nuqusooseti' sakatatta'e Yursaalamipa sooka diishaayye, roopa ishootta in roopo.

¹⁸ Oton orra Kipsi'i eeyyepa sooka diishaayye, roopa in akkadan. Waaqa erkannaatase orra Yursaalamipa xaysonessuma a shaakka ulfeessa' sooka tiite qara' qeede, ishootta kuli qara'e qeeda.

¹⁹ Qitaateta orra Kipsi isho samayta a piita a xaysonessuma shaakka ulfeessa' sooka tiinno piisa qara muramto, sede isheetta.

²⁰ Kuyyaasetiiyyi, tawna a xolma farta kela co qara itaafamta ka kidamta, “A Waaqa qulqullaawte.” Okkotowwa tika qulqulloota kela oppa damta anqallaane, akka saahinnasene pora a kalisoota' tura ca' mina'e a qulqullaawe' koddan.

²¹ Okkotowwa a anqala a Yursaalami isho Yihuta kara ca' piisa, Waaqase we piisa ettaninno'e a qulqullaawe koddan. Orra kalisoota dehassa' deeno piisa, ishoottoppaayye teyyada ka oppa anqalada. Kuyyaasetiiyyi, orra xawdummo tika Waaqase we piisa ettaninno karaayye, amma desa in caado.