Xuuma Sakkaariyaasi 13 - Mataafa Qulqulloota

¹ Waaqase we piisa ettaninno ikiini, “Kuyyaasetiiyyi paada a sanynyeeta Taawwiti isho orra Yursaalami kara kalo juppoota ka nyala kela jaqo panama.

² Kuyyaasetiiyyi, maxxada a killowa'en piisse oppaayye pashsha, umma arepadesa nama matte ishootta oorsado in caado. Anti xuumampaya a darta isho hapurra neeqa'en piisse oppa alle' tawsha.

³ Nama oton oppa'e oorri ka xuumaaw haasawanniiyyi, aappa isha xaaye isho aayyaasso i'ishi' kidane, ‘Atti maxxa Waaqatinni' darta haasawatteey, toota ke parpaaccisni.’ Oton xuuma haasawadaayye, aappa isha xaaye isho aayyaasso ka isha doddotan ka ishshan.

⁴ Kuyyaasetiiyyi, xuumampayta xuuma keleshaatoppan akke ka haasawanno, ishinni jeera. Umma orran sassapatta'e ohaatase a xuumampaya nyirfa qapto in kalsado.

⁵ Isha' nefo ikida, ‘Anti an qotampayta diisheey an xuumampaytan; an shakkiiyyiiwwin dula qotanni ka ishin mukni.

⁶ Oto nama takka isha kaassanno ka kiino, ‘Konaatose dakintaayti quda co maana?’ Ishi ikida, ‘An tika firinnotiiyyi cooyyen asse mataawe.’”

Sikmayta akka daysame

⁷ Waaqase we piisa ettaninno ikiini, “Atti koraatetayti! Sikmaytase xayyo an ollin moottumminno qara' xa'e ka dayshe; kahirra ka alle' pasen. Anti nefo harkiyyon a shashakka qaropa oorsada.”

⁸ Waaqa ikiini, “Orra piisse oppa co oppaayye, harka sessa oppaayye, harka lakki idaysama ka pirama; a koddito ma harka sessa oppaayye, harka takka hasa.

⁹ Harkoose takka a kela hase nefo, apittoppopan tuqa ka akka a dakara' mina xoopa ka akka a warqeeta' mina liilsha ka ekkaysada. Sekkammaayye ishootta maxxiyyo halan, anti ka ishootta dakaya ka ishootta' kida, ‘Samaytiyyo’ ishootta ka ana' kidane, ‘Waaqa Poqallaanno.’”