Xuuma Sakkaariyaasi 12 - Mataafa Qulqulloota

Kippeeta dina a Yursaalami' daasamte

¹ Waaqa a moonta paldishe ka piita' kiritta kate ka hapura nama kara uume qoota Isira'eeliti desa asse kiini,

² “Yursaalamin orra isheetta kapandesa kalo piisa'e akka kuppaayya a taadeta wayneeta a orra oppa ike taaltaalinnaati koda. Yursaalami oto kapa murammittooyye, katamadda a Yihuta a pila kuli asseew kapa muraman.

³ kuyyaatase a samayta piita Yursaalami qara pira' tuulooyye, anti isheettan samayta piita tura' shila a tuukkammi in kinnini koda. Orra a isheetta lellehissa dikanno piisa ka isi miidda.

⁴ Waaqa ikiini anti kuyyaasetiiyyi, fartadaasso'en tammaqsha ka orra a ishin kulufno taaraysha ka fartaddaasso piisa qara ilda lulsha, ma xoori orra Yihuta qaran ildaan caada.

⁵ Sitiiyyi saarra a Yihuta ka karittaaysho karanxata dikadan ka kidane, ‘Qoota Waaqase we piisa ettaninno Waaqaaysho' kodde malla, samaytaadi a Yursaalami kara kalo ishanne hupna akkada.’

⁶ Kuyyaasetiiyyi, akka xoopnatta apitta a tuula qora oppa qapade ka akka ila apitta a tuula unta oppa' qapade mina'en saarra a Yihuta' koda. Ishootta ka samayta a ishootta kapandesa a qinda akitta isho a pittittatin co piisa kupan. Yursaalami' xoori, poraadippaayye in lehto.

⁷ Ulfeena sanynyeeta Taawwiti isho a orra Yursaalami akka a sanynyeeta a Yihuta qara in jaallini'i, ana Waaqa paayyota qattisha ka sanynyeeta Yihutaati putayma daasha.

⁸ Kuyyaasetiiyyi, ana Waaqa orra Yursaalamiti kontaleeta xelsuma kodda; a ishoottoppa dikkeeti nukkullaade ka a Taawwiti mina kokkonnaadan. Sanynyeeta a Taawwiti ka a erkampattoota a Waaqa' mina'e ka akka a ana a Waaqa' mina'e, samayta tura qatta.

⁹ Kuyyaasetiiyyi, anti samayta piita a Yursaalami torpa xaano piisan alle' pashsha.

¹⁰ Anti hapura a oli suraysatta ka a qinseeta'en sanynyeeta Taawwiti isho orra Yursaalami kara kalo qara' tuqa, ishootta ka anase a doten opa tooyyadan. Ka akka nama inna takkan qapo taaki a inna kuuta' tura to'en mina akata pooyan.

¹¹ Kuyyaasetiiyyi, pooyta a Yursaalami kara xaato akka pooytase laka Mekido oppa Hataatirimoni akata pooyamte mina'e pahanaatta.

¹² Piita piisa ka pooytan immakaatta. Nama piisa ka kaffa kaffa ka toolla toollaan xaadin pooyada. Hamiyya sanynyeeta Taawwiti xaayshotinni pooyada, iskattaaysho ka xaayshotin pooyada. Hamiyya sanynyeeta Naataani xaayshotinni pooyadan, iskattaaysho ka xaayshotin pooyada.

¹³ Hamiyya sanynyeeta Lewi xaayshotinni pooyadan, iskattaaysho ka xaayshotin pooyada, hamiyya sanynyeeta Shimi'i xaayshotinni pooyadan, iskattaaysho ka xaayshotin pooyada.

¹⁴ Kaffa a kela hase' piisa nefo, asseew hamiyya xaayshotin pooyadan, iskattaaysho ka xaayshotin pooyada.”