Xuuma Sakkaariyaasi 11 - Mataafa Qulqulloota

Pi'itta orra Waaqa afa dakayni in kinnini

¹ Atti Lipaanoosi, akka apitta qoraatti a talta kupo'e xarradaatti panado;

² Atti qoyra pirpirtatiiyyi; qoota qoyra talta pi'e malla, pora pooye; qoraassin a kukutta nefo ipaten, ishina hiltewwa a Paasaanitiiyyi, jinxase a mura qoota sahame malla, ishina kuli pora pooya;

³ qoota porase a oppa horeeta deennitto ilaawa tura kupade malla, sikmaya pora pooyniiy, dakkaysada! Jinxase a mura kirra Yurtaanoosi kapandesa co qoota turaayye sahame malla, karmada pora alulliiy, dakkaysada!

Sikmayasene lakki

⁴ Waaqa Poqallaayyo ikiini, “Kahirra a qaloota' reexxame' dawwe.

⁵ Orra a ishootta herade nefo i'ishootta qalada umma in kaassataman. A ishootta katade ka kidane, ‘In teyantoonneey kalata a Waaqa kayo.’ Sikmayaasso nefo ishoottan suraysadan.

⁶ Anti amma desa orroose piisse oppa kalo an suraysado; nama takka takkan qeeda ka harka kantittaadi isho a nuqusaadi oppopa tuukka; ishootta ka piisse rakkacciisan; anti umma an harkaaysho oppa ishoottan an paho.”

⁷ Semmalla anti kahirra a qaloota' reexxame ka xawwidesa a miidameeti'in sikmayta kodde. Ka uleeta lakki qeedade ka a paayyotati' kide, “A ulfeessame” Ka a lammattati' kide, “Takkumta” Ka maxxa ishootta' kode ka xelloose' dawwe.

⁸ Sikmayasene sessa qoota ana needdaden anti nefo ka ishootta pake malla, leya takkopa'ewwen alle ishootta tawshe.

⁹ Anka xellootoseti kide, “Anti ishina an siksho; a leena a le'en; a panna a paten; a kela hase nefo a oli damen.”

¹⁰ Sekkammaayye anka uleetase xayyo an kide, “A ulfeessame” qeede ka qepshe; sede nefo kodayteetase an orra piita' piisa olli kodade, akkima haste upnassa malla.

¹¹ Kuyyaasetiiyyi kodayteetose ka pootamte. Kaharrasene miiddame ka ana tooyna ka ini akka qaaleta a Waaqa koddite upnaaden.

¹² Anti ka ishootta' kide, “Oton iwwa paxaara ishina' pahata ka akkaanniiyyi, mushshaariyyo ana' daasha; oton ishina in akkaanniniiyyi, alle' diisha.” Ishootta ka yaala hupniyyo kamma dakara pirreeta kunda sessa ana' daashen.

¹³ Waaqa ka dakarase a pirreeta a orrase ana' kide, ulfeena' qapta ka yaaliyyo kamma ana' daasheneti' kide, “Kinjapeeteta kara' xaaye.” Anka dakarase kunda sessa qeede ka kinjapeetetase a tika qulqulloota kara' xaaye.

¹⁴ Sekkammaayye, anka uleetase xayya a lamatta an ishi kide, “Takkumta” qepsheew. Sede nefo takkumta an Yihuta isho Isira'eeli isasene a hellaa toolla kodde, oltura qapan akkima haste upnassa malla.

¹⁵ Kammadesa Waaqa ka ana' kide, “Amma nefo meeha a eepa sikmayta' qeede.

¹⁶ Anti sikmaytan piitose qara' xaasha; isha' nefo a pate'en dikado; umma a pelpellaawe in fado; umma a qepe'en hiddo; umma a fayya qapa' nefo qara in tooyo; ma xoori, a kakappa'e qalada ka dama ka kamaja kulippa tottoomada.

¹⁷ Sikmayta a xelloota alle' diishe ka we in patannin oo isha kido! Koraateta a isha tupa harka ka ilta akkitta dotto; harkaadi ka alle' tupa koko; iltaadi a akkita nefo ka alle tupa joolto.”