Xuuma Sakkaariyaasi 10 - Mataafa Qulqulloota

Waaqa akkima samaytaadin paho'e kippeeta daashe

¹ Akka roopa hakayta ishina' roopsho'e, Waaqopa qinsada. Ha Waaqa xayxayta oraarta' kooni ka roopa orra kayo roopinni ka piita akka nama piisa'e sakkatta dehisso' kooni.

² Killowwa wa sassapa'e torrini; so'aya keleshaata darta'e akkini ka olsa darta' torrini ka xasa paata patta orra' lelli. Semmalla samayta ka akka kahirra sikmayta dape' mina pelpellaawe ka rakkade.

³ Waaqa ikiini, “Sikimaya qara'en miiriyyon xa'a; ka a saarra kodde nefo qatta'a. Waaqase we piisa ettaninno kahirraadi, orrase a Yihuta'e tooytada ka akka farta ulfeena a orannaappa kitto mina ishootta kokkonnaysha.

⁴ Yihuta karaayye, daka a matta tika koddo ka shikaalla a tunkaanna ka lawa a oranna isho a orra muksho sooka.

⁵ Ishootta ollinni pora takka'e akka xormeeta oranna' mina xormuman ka paarkaalaasso a dooqqeta' mina diddiitan. Qoota Waaqa ishootta olli co malla, ishootta oranna torpan ka torpampaya a fartadaan torpina jeershan.

⁶ “Anti kafa Yihuta'en kokkonnaysha ka a Yoosefin paha, anti qootan ishootta suraysado malla, poraaysho a xatta opan ishootta oorsha. Anti qootan Waaqa Poqallaasso kodde malla, qinseetaaysho in dakaya ikka akkan ishootta an diinnin upnaadan.

⁷ Samayta Efreemi akka xormewwa a oranna' mina'e kodda ka akka nama taadeta a wayneeta ike mina'e, iskaranxata xasooda; hellaasso ka sede akkan ka xasoodan ka karittaaysho karanxata Waaqan xasoodan.

⁸ Fiijaannen ishootta hala ka ollopa ishootta oorsha ka dukaatan ishootta furada; ishootta ka akkimase a xatta' mina pooran.

⁹ Kadin punu piitaddaappa ishootta pasishe nefooyye, ishootta piitaddoosen sessekaati desa ana dikadan. Ishootta isho hellaasso takka'e pahan ka napseetan piitaaysho opa tiitaawan.

¹⁰ Anti piita Kipsiti desan ollopa ishootta oorsha ka piita Asooriti desa olopa ishootta poha ka piita Kele'adi isho a Lipanoosi oppa ishootta kalsha, qoola ka kela' qaja.

¹¹ Ishootta pakateeta rakkoota oppanne tuullan puppeeta pakateeseti ka turaayye jaw kiita; hiwwalaalla kirra Appaayi piisa ka koka; Asooratase isi peepnitto ka jeerta; mankisteeta Kipsi ka alka qara lekkatta.

¹² Ana Waaqa ishootta kokkonnaysha ikka maxxiyyo' kallaadan.” Sede ana Waaqa asse haasawanni.