Xuuma Sakkaariyaasi 1 - Mataafa Qulqulloota

Waaqa akkima samaytaadi qindaadipa oorissa' haleeno

¹ Ataaryoosi Faarisi qara' nuqusumeeyye, para lammattati leya settatta oppaayye xuumampaytase Sakkaariyaasi isase oopa a Parakiyyu ka inna Iddo kodde'e erkana a Waaqa' de'en.

² Ka kiini, “Ha anti Waaqa akatan aappadaassin qara' miirode;

³ Semmalla samayta' lele ka kide, “Waaqase we piisa ettaninno ikiini, ‘Qindiyyopa tiitaawa; anti nefo in ishin opa tiitaawaay.

⁴ Xuumampaya a xatta i'aappadaassina a xattati' torren ka kidene, Waaqase we piisa ettaninno ikiini, poraayshin a neeqa isho kodaayshin a neeqa qara oora; ishootta' xoori in dakayne ka qaraayye in teyyanneey, xaaysho mina'en koddan.

⁵ Amma aappadaassin ayshaayye caan? Xuumampayassin honno? Hela haka paraparati'i kallaadane?

⁶ Seeriyyo isho ajajase' xayyo a orxayaayyo an xuumampaya' qudan ishootta' daashe ete tooytaatta diisheneeyye, waan aappadaassin' qara' kide ishootta qara'en kayne? Ishootta'ew araara'e kalen ka kidene, ‘Ha Waaqase we piisa ettaninno akka piisade mina'e, kodinno isho antinno mina wa ino parpaaccisna ino qara' mure.’”

Sakaariyaasi keleshaata qoota fartadaati desa akke

⁷ A Taariyoosi' nuqusumeeyye para lammattati leya kudanka takkatta isase Shepaati kidammo oppa kuyyaata kunda lakki afrattatiiyyi, erkana a Waaqa a asse kiina'e xuumampaytase Sakkaariyaasi isase oopa a Parakiyyu inna Iddo kodde kapopa de'e.

⁸ Halkeessetiiyyin keleshaata akke; porose oppaayye anka nama takka a farta a makaalaysa' qara' kuti'en akke, isha' nefo naaba qora parsanetiti otanta kara'e qa'ade; isha kamma xataaw farta a makaalaysa ka a awla isho a ata'e ca.

⁹ Anti ka kide, “Poqallaayyo! ata sene maana?” Erkampattootase ana olli torraannitto ka kiite, “Wa koddene ana ke akkisha;

¹⁰ Sekkammaayye namase otanta qora parsaneti kara' qa'ade ka ana' oorshe ka kide, “Sene isasene a Waaqa akkima piita piisa qarandesa tittiitaawane ishootta erke.”

¹¹ Ishootta ka erkampattootase otanta qora a parsaneti kara' qa'atte' kidene, “Piita piisa qaran tittitaawne, piita piisa ka nessatte ka nakayta qapta.”

¹² Sekkammaayye erkampattoota a Waaqa ka oorisse ka kiite, “Oo Waaqqo ke a we pisa ettaninno, ata sene a haka para kunda tappa kara ishootta qara' miirootte, katamaddoosen a Yursaalami isho a Yihuta'e, haka aytamiti'i ishootta suraysatta diissa?”

¹³ Waaqa ka erkampattootase ana olli haasawannitto'e afaa fayya ka orra xasa oorinnaatin haasawade.

¹⁴ Sekkammaayye erkampattootase ana olli haasawannitto ka ana' kiite, “Aane salishe ka kide'e, Waaqase we piisa ettaninno ikiini, ‘Anti' qoota Yursaalami isho Siyyooniti desa yoota kutta'en qapa.

¹⁵ Ma xoori, samayta a piita a kiino nakayta ca qara'en akata miirode, maana malla anti minaddesan samaytiyyo qara' miirode; ishootta' xoori, akka miiddota koopto'e koden.’

¹⁶ Semmalla Waaqa ikiini, ‘Diissata kodaannen Yursaalamipa oora, tikiyyo ka a lammatati eeyye' qupamta; opan ka Yursaalami harmissa'e teepaan isheetta ekkaysadan.’ Sede Waaqase we piisa ettaninno asse kiini.

¹⁷ Amma nefo asse kide ka salsheew, “Waaqase we piisa ettaninno ikiini, ‘Katamaddaayyo i'ooran ka teyanta' posh kidan, Waaqa ka amma nefo Siyyooni' xasa oorsha ka Yursaalami nefo reexada.’”

Sakaariyaasi kaasa a xorma afuri keleshaatappan akkeew

¹⁸ Sekkammaayye keleshaata a pila oppannen kaasa a xorma afuri akkeew.

¹⁹ Ka erkampattootase ana olli haasawannitto kaassade ka kide, “Ata sene kaassa a maana?” Isheetta ka kiite, “Ha sene kaassasene Yihuta ka Isira'eeli isho Yursaalami pasishe.”

²⁰ Sekkammaayye Waaqa ka harmoota afuri ana' akkishe.

²¹ Anka kaassade ka kide, “Ata orroose maana koda'e de'e? Isheetta ka ana' kiite, “Kaassoosen are ca ishootta akka nama takka nefo matta ela in xa'innini'i a Yihuta pasishe. Harmoose' xoori, akka isasene' piita Yihuta' passissa'e qaropa kaassa xaashe tammaqshane'e ka kaassasene a samayta piita alle qeqqepissa ka kata malla de'en.”