Xuuma Nahoomi 3 - Mataafa Qulqulloota

Saara pooyta a Nenewwe malla saarsame

¹ Nenewwe! katamasene a diika a darta ka saraan immakaade ka xolma toomaan teyantoode, oo ishootta kido!

² Nessa halanka ka nessa korkoraata a kaarreetta kamma' hiddinaane xiddisammi, nessa a sarakella isho nessa a fartada kulufna kuli ka dakaani.

³ Orra fartada qara kulufno koraatewwaasso ka pippildaawni, orannaasso ka warwarri, orra akata pirammi pukkada a dikoota in qapnini ka olopa tuulamen, pora oppan tarpan nefo ka dapade.

⁴ Sede piisa qoota nyala a dahalmayteetase sira xooto a Nenewwe koope malla asse koddite; isheetta tipanne akata jaalte, ka samayta piita' dahalsattaadin iskelopa oorsatte ka mankistewwa kodkoddaadin iskelopa oorsatte ka piddite.

⁵ Waaqase we piisa ettaninno ikiini, “Tin anti ke qara'en xa'e. Ha uwwaattin ke kammeela qapa samayta piitadda isho mankistewwa ka jeeraayti rukan.

⁶ A kuufa' mina'en ke saha ka ke kojeessa ka akka orra ke qara xosalo' koda.

⁷ Nama ke akko piisa ka ke turaayye qaha ka kida, “Ha! Nenewwe i'onteey, ata ayno isheetta pooya? Ka isheetta' kida, ‘Qara hase.’”

⁸ Hela atti Nenewwe, katamasene a Kipsi Tepeesi kidamma, isasene kirra Appaayi kapa tiitayshe ka a kawwatta' mina kapa qorre, pakateeta ka ishootta' mishshikeeta koddite qara' qapta?

⁹ Qoota piita a Toobbiya ka a Kipsi ishi awlinaan malla, hupna a qapan ikokkoki; orra Fuuti isho a Liipiya'ew oranna'e asseew ishootta' awlini ka qaarqaarri.

¹⁰ A koddito ma xoori, ishootta ipoojamen ka tawen, hellaadi ka porraappan desa marjajjaawen; poqalladdaadi nefo qara ikka qoyritta kataden ka mukissampayaadi a kutkutta' piisa sansalaatan hiden.

¹¹ Atti Nenewwe! kuyyaata a' nama maashshoode mina taaltaalto ka jeerto ka paarkaalaatti turaayye pora qahato ka deddekatto de'a.

¹² Mishshikeetaayti piisa akka dalta qoyra hilteeta a paayyota' dalte ka palite mina, oto lellehinnaaneeyye akka harka orra pohanno oppopa seehnitto mina'ewwe mishshikeetaayshin paarkaalaassin turopa qitqitta.

¹³ Aren, torpampayaatti piisa sakowwa kodden. Xarrada a piitaayti takka'e paarkaalaatti' panamen, dufanaddaasso' nefo ka apittan kupaden ka piramen.

¹⁴ Pisha oo paarkaalaatti ke kapa muran ka ke rakkacciisnaaneeyye ikta, ammaaw iskapa oraapado! Ka dooqqeta diitado ka mishshikeetaaytin kokkonnassa' harmisado.

¹⁵ Kadi punu akka heente harmisattaayye, apittan kupatta ka koraatetan quurama ke qara in oolo. Kadi punu akka a torrayta' mina lekaattaneeyye ka akka farata' mina oli daltaneeyye, akka torrayta' miissa dalade dammo ka pirro mina'en apittan ishin kupa.

¹⁶ Atti xawdaatti akka hinkaajjeta' mina'e' lekaysatte, ma xoori akka xampirteeta xoolla dehsannitto ka alle' xa'annitto mina'e alle ke kapa qahan. Ishootta akka torrayta' mina'e wa piitaaytippa ca' piisa tupadesa daman ka piran ka oppaayye alle' tawan.

¹⁷ Tooytampayaatti akka farata' mina'e ka saarraattiiw akka torrayta' mina. Awta rakkootatiiyyi kawwatta kara'e deddekanni, ma oto awditooyye, oranna turaayye alle akka torrayta jaamsade mina' qahani, umma pora oppopa qahanaan upnaatammi in co.

¹⁸ Atti nuqusa a Asoori! Ha isasene ke tooytina isho poqalladdaatti ile'en. Samaytaayti nefo irrowwa qara'e pittinnaawe, umma nama ollopa ishootta oorsho in co.

¹⁹ Qepanittaayti olopa in ooro umma faykitteetaayti dina in qapto. Orra pateettaayti desa dakkaysanno piisa ka xasan kanaata qapa. Maana malla orra a' karpaaytin' miidda diisse in cooy!