Xuuma Nahoomi 2 - Mataafa Qulqulloota

Pi'itta Nenewwe

¹ Atti Nenewwe! A irreetan ke piddo ke qaropa deeniiy, semmalla, mishshikeetaayti tooyte ka porraatti nefo qara ildaan caado ka surraappa fayya hidado! Hupnaayti nefo kokkonnayshe ka oranna' harmisado.

² Kadi punu paarkaala sanynyeetase a Yayqoopi, hellaasene a Isira'eeli saraneeyye, ka dishmase a wayneetaysho alle ishootta turaayye shukaneeyye, Waaqa desa oora ka ulfeenase a xatta ishootta' oorsha.

³ Torpampayaasso kontalewwa tittiima'e qapaden, ka mehadda tittiima' kalsaden; kuyyaata oranna torpa' dikkisannaaneeyye, silpalla a sarakelladdassoti, iwarwarri, orannaasso nefo ka niibniibni.

⁴ Sarakelladdasene porraappandesa xiddisammi ka lakoppan desa pora hirri, pahanaasso ludanna opayna'e pahan, ka akka hankaada' mina walaqlaqni.

⁵ Ukkumampayaasso ollopa de'an ma xoori, ishootta porraappa'ew hasan; kawwatta a katama qitqitissa'e tuudda qapadan ka orana ishoottopa torpammo kontaleetaayshotin oorshan.

⁶ Xarradasene a katama qinda kirratin ca ka takka' panamen, tika a nuqusa ka fuuraan immakaatte;

⁷ Nenewwe ijeerte, poqolteetase a nuqusa ka poojamte; orxayaasene' xaadi ka akka kutta aluulinaan mina'e pora aluulini, ka kessoppa tottoomanni ka pora pooyni.

⁸ Xattaayye Nenewwe, akka pisha harta kara immakaade' mina ma amma xoori, akka pisha hartoppa kaamade' mina'e katamasene karaayye alle' qahani, kadi punu ishootta haleenaan ka kiinaane, “Orrayti qa'ada! A' qa'attane?” Nama qa'anno takka nefo in co.

⁹ Teyanta a katamooseneti akata koopteey, aana ka dakarraasso a pirreeta sarada ka warqewwaasso' pootada!

¹⁰ Ha oori Nenewwe isaramte ka onte, ka wa a qapta oppa harka haqatte; karitta ka kara tammaqe meella ka isheetta kela' pisha kodden, surra ka tupa mittame namaadi piisa tupaayye miinta ka poornaatte.

¹¹ Hela katamasene a xormewwa karmada paha kara kallaannaan, haara karmada ka oppopa xorro, karma ka akkoteetaadi isho nyelqaasso ka fuura mali oppa kallaannaan pahato, awweeyye aysha marte?

¹² Ha xormase karma paho ikute ka wa nyalqaadi ka akkotetaadi kaya' qape, ka porase a kara kallaanno piisa so'an immake.

¹³ Waaqase we piisa ettaninno ikiini, “Atti Nenewwe! Ha anti paarkaalaattin kodda ka ke qara' xa'a. Ka sarakellaatti a oranna kupa ka tara' koda. Torpampayaattin koraatetan pira ka wa a' saratte' piisa alle' pashsha; umma erkamampayaatti arepa desa in caadan.”