Xuuma Nahoomi 1 - Mataafa Qulqulloota

¹ Mataafose' qoota pateetta Nenewweeti desa torrini. Xuumose Elqoshittase Nahoomi kidammo wa a keleshaatappan akke ka puuse sene.

Miira Waaqa a orra Nenewwe' qara' kaye

² Waaqa yo'ampayta isha Waaqa a haalota pooyino. Yo'ampayta ka a erkannaatan immakaade. Waaqa a isha toorra' qara haalota pooyyini Waaqa paarkaalaadi miiraadin pira.

³ Waaqa dupatampayta, hupnaadi akata kutti, Waaqa juppoolayta' kiini in co a' dukallayta; piwwaleeta a pisha yaaqyaaqqinnitto isho puppeeta a kutta karan desa pora anta'e qapa. Oto annooyye, oraara a kuyyalayta mina'e loqqaadi kelaayye xaani.

⁴ Fukaadi pakateeta isho kirra ku'inni, ka akka kirrada piisa kokane' kooni; ka dishma Paasaani isho a Qermeloosi qara co piisa alle' ruqinni, pisa a miissa Lipaanoosi qara co ka alle' seehni.

⁵ Irrowwa fuulaadi turaayye tupadesa lelleehni, kunkunnawwa ka laka koddini; piita isho orra piita qara kalo piisa isha tura fuura ka xara.

⁶ Ata ayno nyara ka miiraadi tura' qa'atta ettansha? Miiraadi akka apitta' mina'e kupniiy, ata ayno aarase' xaadi a miira orra xaalanno tura' qa'atta ettansha? Sede qaran xaate'e shilalla kuli kakkaamanni ka fidammiiy!

⁷ Ha Waaqa xoonampayta ofinka kuyyaata a rakkootatiiyyi, kela' pahani; isha ka isasene isha qara' xasa xaayanna qara tooyni.

⁸ Ma xoori, toorampayaadi pishaanne haada ka pira; ka paarkaaladdaadi tukkanta poora' karopa alle' daana.

⁹ Ishina Waaqa qara'e sullaata sulannittaneey, ha isha alle'e ishin pira, umma lammatta isha qara'e xaana a ettanissan.

¹⁰ Ishina' maashshoolayaayye! Akka qeeyya isho' miissa koke apittan kupannaan ka pannaan mina'e asseewwe' pattan.

¹¹ Oo Nenewwe! Orra Waaqa qara sullaata sulanno ka dehaamta neeqa orra dehaammo ke oppaayye ca.

¹² Waaqa samaytaadi a Isira'eeliti kiini, “Kadi punu orra Asoori akata lekaade ka irreelaya kodde nefooyye, ile'an ka piraman. Oo Yihuta! anti sede turan in ke rakkacciise, ma arepa desa ke an rakkacciiso.

¹³ Amma nefo, qamparase a orra Asoori'in ishin qaraayye alle' qepsha ka silpallasene a loqqaassinan hiden alle' mooja.”

¹⁴ Waaqa dapa orra Asoori' qara' mure ka kiini, “Arepa desa sanynyeeta maxxaayti dakaytisso a' qapnaatto. Killowwasene tikase a kela' sakatannittane' kela ca, isasene a' qoraappa xefattene ka silpallaappa tumattene' piisan alle' pashsha. Ishina'ew qoota neequmtan immakaatten malla, hawlan ishina' qota.”

¹⁵ Tin are, nama takka irrowwa qaraxata otoota fayya otassa'e ka nakayta salissa' deeni. Atti Yihuta! paarkaalasene' xaayti qoota piramen malla, arepadesa oori wa piitaayshin qappada in caadan. Semmalla xaysonessumasene a Waaqa ulfeessa' koonittane, fuura mali ulfeessa ka wa a Waaqa' daassatta' xasa kaltene' koda qara nakaysha.