Xuuma Milkiyaasi 3 - Mataafa Qulqulloota

¹ poqallasene we piisa ettaninna ikiini, “Ha anti erkamampaytase' xayyon erka ikka ana turandesa pora harmisha. poqallasene a ishina' faanittane ka a isqara a upnin maliiyyi, tikaadi a qulqulloota kelopa de'a. Erkamampaytase a ishina ishin xasoottan ide'a.

² Ma xoori ayno kuyyaata a oppa de'o duupatta ettansha? Kuyyaata isha' de'oyye, ayno ka tura' qa'atta ettansha? Ka isha akka porooda silpoppa uta sookinno ka akka saamuna ohaatoppa jureeta tawinno mina'e kodda.

³ Isha akka porooda silpoppa uta sookinno ka harminno mina'e dapa ka dukaata mura' kuti'a ka orra Lewi akka warqeeta ka akka dakara pirreeta' mina' xoopa ka harmisha, ishootta ka a dukaatan Waaqa' kalisoota kalinna' koddan.

⁴ Sitiiyyi oori, kalisoota samayta Yihuta isho a Yursaalami dehanno, akka kalisoota xeltada a xatta ka a parrada tarpe' mina'e a Waaqa xasannitto koddita.

⁵ Waaqase we piisa ettaninno ikiini “Anti firteeta'en ishin oppopa de'a ka tipampaya ka dahalmaya ka orra dartan xaxanno ka orra muushshaara a yaala nama dawrino ka orra hiyyettewwa ka he'aya isho kalayta miiddino ka ana tura furri in kinnin qara jarjartan farata.”

Kuma a kundatta Waaqa' daasheeta akkima fadammitto

⁶ Anti an Waaqa an pursammi an co. Semmalla ishin hellaa Yayqoopiiyyi, ha ishina a' panne.

⁷ Xelta aappadaassinati paayyatte, seeriyyo kapa issekaatten umma a' tooytaanne, anti Waaqase we' piisa ettaninno in ishina' kiini, ‘Anopa tiitaawa! Anti nefo in ishin opa tiitaawaay.’ Ma xoori ishina ikkiitene, ‘Hela attan kepa tiitaawna?’

⁸ Hela nama iwa Waaqa hanni? Ma ishina kuma a kundatta isho daassata ana' daassan dawrattaanne waayyo hannittan.

⁹ Ishin ka samayta piisa qoota ana hatten malla, ijjiijamten.”

¹⁰ Waaqase we piisa ettaninno ikiini, “Akka tikiyyo kara damta immakkootan caatto'e, kuma a kundatta kosaayyo karopa kalsha; oton sede' koonittaneeyye, anka paada moonta ishina'e an panniniiyyi ka saka qara' saka ishina an koopinniniiyyi, sede qara ana tooyya.”

¹¹ Waaqase we piisa ettaninno ikiini “Akka tummaysa untaayshin in dammini'in ishin qara dawra umma dishma a wayneeta a dullaassin oppa co qara dalta in dapatto.”

¹² Waaqase we piisa ettaninno ikiini, “Sekkammaayye piitaayshin qoota saka akkatto malla, samayta piita' piisa ka ishina' kida, ‘Oo xaaysho sanaya!”

Waaqa akka diissata koda' kippeeta daashe

¹³ Waaqa ikiini, “ishina' maxanyumaanne ana qara' haasawannittan ka desa oorrittan ka ana kaassannitan ka kiinittane, ‘Ata wa neeqa maanan ke qara' haasawanne?’

¹⁴ Ishina ikkiitene, ‘Ha Waaqa kela koda kodeeta paata patta, seeraadi tooyteeta ka fuula Waaqase we piisa ettaninno tura akka orra nyarrahe mina' kallaatta, maana ino qara nessissa?

¹⁵ Orra isi peepno, sanaya, orra wa neeqa' koono iteyaantoonni, orra Waaqa ekkaysanno qara'e, rakkoota takka nefo deeni in kitto.’”

¹⁶ Sitiiyyi orra Waaqa fuurro ka ollopa oore ka ollin torraade, Waaqa ka wa torraadene' dakkaysade ka dakaye. Semmalla isha tura'e, maxxada orra isha fuurrooti ka maxxaadi ulfeena daanno akka in teymammini'i, mataafa qaropa taafamen.

¹⁷ Waaqase we piisa ettaninno ikiini, “Kuyyaatan anti koda' xaanooyye, ishootta kodatteetiyyo koddan, akkima aappa inna ishi' dakayna' suraysanno mina'e, anti akkimoose' mina'en ishin suraysada.

¹⁸ Sitiiyyi akkima dukaallayta isho nama wa neeqa' koono ollin in pannini'i, taaki akka nama koda Waaqa koono ka a kooni in kinnin olli in pahanin upnaattan.”