Xuuma Mikkiyaasi 7 - Mataafa Qulqulloota

Pi'itta hellaa Isira'eeli

¹ Akkima nama a jaaha jaahame kammaayye patteeta faddatta' aane ka dape mina'en koddeey, oo ana kido! Isase an allu' kide, “A jaaha in jaahammin turannen qara' aana.” In dape.

² Ha nama Waaqa isi daashe piita qara idapade umma nama dukaata koono in co; orra piisa oli kaatini ka oli lessaata kammaaw anni.

³ Harkaasso wa neeqa' koda ikolladen, mukissampaya isho taanynyadaasso kuli nooddotaaw faani, a hupna ukkumeeta' qapo wa heena'e irreetan orra qara' kooni ka sullaata kammaaw anni.

⁴ A ishoottoppa shakkayteeta aako paho qassatta paha, a ishoottoppa akata dikatta fayya' qapo kidammo, akka qeetta xallenta' mina'e nama fuurinni. Akka Waaqa xuumampaytaadippan lele mina'e kuyyaatase a de'o ka sawwaadi qara' xa'o pore kitta. Karaayye, ishootta ammaaw tura' tammaqtan piramen.

⁵ Nama in amanan ka moottaayti kuli qara' xasa in xaayadan. Iskatteetaayti a' jaalannitto nefo kapaayye afaatti tooytado.

⁶ Sitiiyyi inna diirta aappaaysho'e puyadan, enenta ka aayyaasso needdatta, haantota ka haqqitootaadi qara' xaata. Semmalla toollaaw tikoppa desa olli' paarkaala kodda.

⁷ Xayyo xoori xasannen Waaqa kippada ka Waaqase ana' qaarqaarsa koddo asada, isha ka qinseetiyyo dakaya.

Akka dina Waaqa kapa de'o

⁸ Paarkaalaayyo! Kadin punu pi'aayye in xa'aay, kadin punu tukkantoppa caayye, Waaqa ana' la'ayshaay, patta'en xasoodan.

⁹ Anti juppoota kodaannen Waaqa nyarrahasiiseey, haka neequmta ana qara' dehaatte oppa tooyno ka dukaata ana' murro kara'e, miiraadin duupada; kuli ishaaw la'aytaadi oppopa ana sooksha, anka dukaataadi akka.

¹⁰ Paarkaalasene' xayya kiina'e, “Waaqa Poqallaatti ayshaayye ca?” Oto sede piisa akkaneeyye, ijeeran. Anti ka pi'itta paarkaalaayyo' tooya ka oto akka miissa qara diddiinnaan mina qara didditammaane akka.

¹¹ Ha kuyyaata oppa kawwatta katamaassina' dawattan ka xeelaayshin kuli paldisattane de'a.

¹² Sitiiyyi samaytase' xaayshin pase piisa piita Asoori ka katamadda a Kipsi ka kirra Efraatisi kapaayye ollopa kala ka a pora sessekaatiiyyi ca' piisa ka pakatewwa qara desa ka irrowwa qara xata kepa de'an.

¹³ Piitose' xoori, neequmta orra oppa kalo koono minan xaate i'onta.

Akka Waaqa Isira'eeli suraysado

¹⁴ Waaqqo! Akka sikmayta fayya deettappan desa xelloota sikinno mina'e, samaytaayti siksado ka ishootta muroppa ca a xatta' mina'e akka piisse a Paasaani ka a Kele'aati oppan desa deetta deetane' kode.

¹⁵ Akkima piita Kipsi' kara koda orra qawwannon ino sookisse mina'e, kodaayti a orra qawwanno ino akkisheew.

¹⁶ Smayta piitadda' piisa oto sede akkooyye, hupnase a qapane tupa nukkulaada, ikka jeeran matta piitan xata raa'ishan ka eyye' dakkaawan.

¹⁷ Ka akkima maaka isho uumatadda karittan piitandesa titmanna' mina'e piita daman ka mishshikewwaasso kara sookan ka xaran de'an ka Waaqa Poqallaanno opa tiitaawan ka isha fuuraan kallaadan.

¹⁸ A nama juppoota diinno ka peela samaytaadi oppa hase qara dapa dikni in kinnin, ata Waaqqo, a xaamo ke paha? Ha atti oto nama suraysannittooyye, xasa ke' dakaanni diisheey haka paraparati a' miironni a' kitto.

¹⁹ Amma nefo ino suraysattaaw ka dapinno alle' diissa ka juppootinno piisa ino qara alle xati hiwwalaalla pakateeta' kelopa tawissa.

²⁰ Kodayteetase a xatta a aappadaanno Aprahami isho Yayqoopi olli kodatte mina'e amma kuli dukaataayti ka diissataayti a xoona a parapara ino akkissa.