Xuuma Mikkiyaasi 6 - Mataafa Qulqulloota

Akka Waaqa hellaa Isira'eeliti' dehaamta kokkoka daashe

¹ Wa Waaqa hellaa Isira'eeliti' kiina' dakkaysada; xa'a ka akka maakkumane'e, miiddotaayshin irrowwa tura' lelada! Kunkunnawwa nefo ka dakayen.

² Ishina irrowwaayye ka ishina shalalla kiritta piita' koddeetiiyyi, wa Waaqa samaytaadi qara' haasawanna ka maakkumma' dakkaysada!

³ Waaqa ikiini, “Ata samaytiyyo, intoonno ana' lelaay! Maanan ishin' mihshe? Ka maanan ishin payyahashe?

⁴ Ha anti piita Kipsi karan ishin sookshe ka karpishshuma kela ishinan pahe ka akka ishin mukshane'e, Muuse ka Arooni ka Maariyaami ishina' reexe.

⁵ Samaytiyyooyye, wa nuqusase a Mo'aapi Palaaqi ishin qara' dikade ka wa Pala'aami innasene a Pi'oori ishi oorshe matte oorsada. Piita Shitiimi paayyatte haka Kelkela kaynitto'e, wa ke qara' kaye oppa dikado. Sitiiyyi ke dinissa malla waan anti Waaqa kode piisa upnaattaay.”

Wa Waaqa samaytaadi qara faana

⁶ Ata maanan qapada ka Waaqa' ishin de'a ka Waaqase kutta turopan sakatatta' aana? Hela nyalqitta lo'alla a para takka piren qapada ka kalisoota a kupannito' koda ka daassata isha turopan dehaada?

⁷ Hela amma kadin laahadda kumadda' dikamma taaki sayteeta a pisha kirrada kuma kudan mina' kitto isha' dehannaayye, i'ishin xasooda? Moon dapase ka juppootase xayyo malla, hela qartiyyon kalisoota ishi' kalsha?

⁸ Namo! Waaqa wa paxaara'e ke' lele. Ha isha wa ke qara faana, akka wa dukaata kodde kooto ka xoona a jaalala' qapa qapnaatto ka Waaqaayti olli naalumaan kallaatto faani.

⁹ Ha Waaqa fuureeta ookuma. Isha Yursaalami' kiini, “Hupnase' xayyo a miira dikado ka ayno akka hupnose a miira' qapo nefo upnaado.

¹⁰ Hela amma anti xawwi teyantose a karpampayta karpan tikaadi karopa pootade ka taarose a kura a darta a paatan kuradenen teyma xawwa?

¹¹ Hela kuli anti orroose taara kura a darta a kala kara' katanno in duupada?

¹² Teyantoolayaassin karpampaya, orra katamaassina'ew darta pora haasawanni, afaasso oppa nefo sassapaaw kala.

¹³ Semmalla anti juppootaayshin malla ishin patissa'e in piisade.

¹⁴ Iddamtan umma ishin kara in kayto ka doxa ishin qara in nessisso; ollopa paata xaayattan, xaayyata ka oppa xaata; kadi punu ollopa tuulattaneeyye, orannaannen ishin tura pashsha.

¹⁵ I'aylaattan umma a' ferattan, sayteeta dalta a ekerta oppa harmisattan umma a daatattan, dalta wayneeta nefo iddiipattan umma taadetaadi a iktan.

¹⁶ Wa malla sede piisa ishin qara' kayta' qoota aata ka saanta a nuqussasene Omiri isho a Aki'aapi kidamma' teyyatten ka ishin kallaannittan ka kollumaasso kamma anten mallan ishin pira ka orra paleese' kara kalo, orra piisa tura' jeersha ka akka pakka samaytiyyo otammo oppa otamtane' koda.”