Xuuma Mikkiyaasi 5 - Mataafa Qulqulloota

Peteleheemi kara mukissampayta xa'a

¹ Atti Yursaalami, paarkaala ke kapa muren ka saara Isira'eeli kuli uleetan mattoppa daysheneey, xelaayti a oranna' xaashe.

² Waaqa ikiini, “Atti ke a piita Efraata kara kitto Peteleheemi, kadi punu kantada a Yihuta oppa shakkatte nefooyye, a xattati paayyatte haka paraparati'i, a saara koddo ka Isira'eeli mukshon keppaayye xaasha.

³ Haka isha dalanno'e, Waaqa alle'e Isira'eeli diisha. sekkammaayye isasene' poojame ka tiitaawan ka orraaysho oppa lahan.

⁴ Isha ka hupna ka ulfeena a Waaqase kutta isha' daasamon xa'a ka maxxa Waaqa a Waaqaaditin xellootase a kaharra' siksha. Kuttumaadi qoota pora piita oppa oorto pisa oppa' dakaadan malla, ishootta qaapa mali kallaadan.

⁵ Isha ka nakayta ishootta' daasha. Oto orra Asoori piitinno torpa' de'o ka xeelinnoppa kayooyye, tooytampaya tappa ka saarra setti'in ishootta mina diinna.

⁶ Ishootta ka piitase a Asoori a Namruudeta' torpan ka putan ka oppa' kuti'an. Orra Asoori kadi punu ino torpa' de'a ka xeelinno kulippa ino qaatqaataayye, isha inon paha.

⁷ Isasene samayta Yayqoopi oppa peela hase, akkima Waaqa tadaahata ka uusheta seehinno ikka piita ilawnaannitto mina'e, orra leka'e saka koddan. Umma nama pora in kippadane ma, isha patta xasa' kodadan.

⁸ Ka akkima karma pinaana a kappina opa shorro taaki akkima haaritta karma' xelloota kaharra opa doono ka qapanno ishootta ka nama qara ‘Sapay’ kido in qapnin mina'e, peelasene samayta a Yayqoopippa hase asseew samayta leka oppa paarkaalaasso' kodan.

⁹ Hellaa Isira'eeli hupnanne paarkaalaasso qara xa'an, paarkaalaasso' nefo ka alle' piraman.

¹⁰ Waaqa ikiini, “Ma xoori awsetiiyyi, fartadaassinan alle' pira ka sarakelladaassin oppa alle' mooja.

¹¹ Palewwa piitaayshina' piisan alle' pashsha ka mishshikewwaassin piisa alle' qitqishsha.

¹² Ka tipampayaassin alle pashsha umma so'ayta ishin oppa in caado.

¹³ Killowwasene a' xefattene ka tuuddasene a' kela xata sakatannittane'en ishin tura alle' pashsha, umma awwe desa wa a harkan xefatteneti'i a' sakatattan.

¹⁴ Killootase a' dishatten a asheera'en piitaayshin oppa alle shukka ka palewwaassin alle pulpula.

¹⁵ Piitaddasene ana dakaya tiite piisa qaraayyen miirase' xayyo kuttan haalota qeeda.”