Xuuma Mikkiyaasi 4 - Mataafa Qulqulloota

Mankisteeta a Waaqa a oppa orra nakaytan kallaado

¹ Parra piraampiraatiiyyi, irrootase a tika qulqulloota a Waaqa qara qupamte, irrowwa a pila' piisa qara harmo' qapnaatta ka akkaatta, samayta piitadda ka eeyyepaaw tupeela de'a.

² Semmalla samayta leka ka de'a ka kida, “Seera Waaqa Siyyooniiyyi kollanniiy, qaaletaadi ka eeyyew Yursaalamiiyyi kittaay, xooya irroosse a Waaqa' qaropa fayyanna, ka tikase a Waaqa Yayqoopi a qulqulloota opa anna, isha akkiman wa isha' heena' koono ino kollisha, anka saantaadin kallaanna.”

³ Ha isha samayta leka qara'e farata, Waaqa ka, orra a piitadda Isira'eeli' kapandesa ca ka a sesseka oppa kalo ka oli dape ollopa araarsha. Ikka koraatewwaasso silpoota' tumadan; ka orannaasso maajiteeta' tumadan, umma orra oli in torpo. Sekkammaayye oori, nama qoota oranna torpeetati desa kollanno in caado.

⁴ Nama piisa ka oori nakaytan dulaadippa koda kodada, umma wa isha fuursha takkan nefo in caadan, Waaqa a we piisa ettaninno asse haasawadeey.

⁵ Orra Waaqa amanni in kinnin xaaysho killowwaasso'e saksadan, ino' xoori, Waaqa Poqallaannon haka paraparati' waaqaysanna.

Samaytase a Isira'eeli poojame, akka piitaaysho opa tiitaawo

⁶ Waaqa ikiini, “Kuyyaatosetiiyyi, anti toonnaya isho isasene qootan anti ishootta qara' dapa mure malla pora daaname ka rakkootan payyahe'en olopa oorsada.

⁷ Isasene totoonnaawe akka peela hasanen koda; isasene alle' puyatame sawwa fuurammoti' koda; anti Waaqa ka awwe desa paayyatteeyye haka paraparati'i irroota Siyyoonitiiyyi ishootta qara' nuqusuma.”

⁸ Atti ke poqa irroota Siyyooni a qaraxata xelloota tooytinaan katama a Yursaalamitiiyyiiw, ulfeenaayyti a mukissa a xatta'e ke' oora.

⁹ Ata maana malla akka iskatteeta yatatta xaayatin qapamte mina akata asse ullupni? Hela sede a nuqusa a' qapnin malla? Moon hela qoota orra ke dehaamo dapte malla?

¹⁰ Ishin samayta Yursaalamitiiyyi, akkima iskatteeta yatatta xaayatin qapamte mina' paatan isi qida; katamasene a kara kaltane kara iddaanamtan ka lakoppa' kutiitan ka piita Paapilooni opa poojamtan. A koddito ma Waaqa eyye'e ishinan paha ka paarkaalaassin kela ishin tooyta.

¹¹ Ammaa xoori orra lekayta ollopa oora ka kida, “Yursaalami a jeerto! Anka pateettaadi rukno!”

¹² Ma samayse' xoori, wa Waaqa dikanna in upnaanne, akkima unta tuma awtaappopa poonnaan mina'e, ishootta rakkacciissa malla Waaqa ollopa ishootta oorshe matte in qapan.

¹³ Waaqa ikiini, “Ishina samayta Yursaalamitiiyyi, akkima xorma a kaassa isho kamaja silpa' qapo mina'en ishin kokkonnaysheey, aana ka paarkaalaassin akka unta' mina' tuma. Ha ishina' piitadda lekaya' patissan ka teyantaaysho a karpan ollopa pootadene piisa ana Waaqa Poqalla piita piisa mukinnooti ishin deetan.”