Xuuma Mikkiyaasi 3 - Mataafa Qulqulloota

Mikkiyaasi akka saarra Isira'eeliti' dehaamta kokkoka' daashe

¹ Mikkiyaasi ka kide, “Ishin' saarra hellaa Isira'eelitiiyyi ka a samayta Isira'eeli' mukinnaatiiyyi, are dakkaysada! Akka saanta dukaatatin mukissa ishin faano a' uptane?

² Ishina' xoori' koda fayya' koda' tiitten ka neequmta kamma anten ka samaytiyyo a co quda koka qalten ka lafaasso' quda so'a qo'issen ka pirten.

³ Ka akka so'a oktaappa' xarissa' quurraan mina'e, so'asso oppa quurten ka lafaasso oppa faatten ka so'asso ollin damten.

⁴ Ishina' nefo kuyyaata oppa rakkattan ka Waaqopa ullupattane de'a, umma isha oppa ishina in oorsho. Qoota neequmta kooten malla, umma qinseetaayshina in dakayo.”

⁵ Waaqa ikiini, “Xuumampaya darta, nama ishootta' damta daannoti'i kiini, ‘We' piisa nakayta.’ Ka torrini ka nama ishootta' daanni in kinnini' kiini, ‘Oranna ishin qara' de'a.’ Ka samaytiyyo sassapanni.

⁶ Semmalla, arepa desa halkeetta oppa keleshaata in akkinini'i de'a, nessiyyo in dakayan ikka tura' tukkantaawta umma keleshaata in akkan ka xuuma in haasawadan.”

⁷ A kiina'e, “Keleshaatan akkininna ka xuuma haasawanninna.” Piisa qoota ishootta in ettannin malla ijeeran; qoota Waaqa oppa ishootta in oorinnin malla, jeeraysho qaran xaate'e matta piitan xata raa'ishan ka aanan.

⁸ Ma xayyo xoori, akkan hellaa Isira'eeliti' juppootaaysho ka dapaaysho lelo'e Waaqa hupnaadi ka hapuraadi ka dukaataadin ana immake ka ana kokkonnayshe.

⁹ Ishina dukaata tura miinta quu'ina ka haasa fayya alle' quqquu'ina, mukissampaya hellaa Yayqoopi ka saarra samayta Isira'eelitiiyyi, are dakkaysada!

¹⁰ Ha ishina' diika kodaanne katama Siyyooni' qupnittan ka juppoota kodaanne, katama Yursaalami' qupannittan.

¹¹ Qimoota paleetoseti nooddota mali deexa deexni in kitto, qeesewwaasso a we ishootta' daashan mali orra kollinni in caan, xuumampayaaw a kaaja ishootta' daashan mali xuuma haasawanni in caan ka a sede piisa koonaan qarandesa kiini, “Qoota Waaqa ino olli co malla, wa neeqa takkan' nefo ino qara in de'an.” Ka laadi Waaqan xelsanni.

¹² Semmalla Siyyooni ishin malla akka dula' mina' qotamta, Yursaalami ka tikka olqaropa qitqite' koddita, pora oppa tikase a qulqulloota' qupen ka mura jinxa kodda.