Xuuma Mikkiyaasi 2 - Mataafa Qulqulloota

Wa orra a hiyyeessa miiddino qara' kaya

¹ Orra neequmta koda dikanno ka oto mukaneeyye neequmse oppaaw dikanno, oo ishootta kido! Wa koda dikadene' piisa ikodan ka oto paritooyye, wa dikadene' koda qara nakayshan.

² Dula a faanan nama qara iteyyanni, tika a xajeelen kuli asseew nama qara irreetan quu'anni, umma namumayteeta nama' tooytaanni in caan ka wa qapa' piisa tura saranni.

³ Semmalla Waaqa i'ishina' kiini, “Ha anti alle'en ishin pashsha umma pakkanna kela a' pahatan, sitiiyyi qoota rakkoota dikke koopto malla, isi peepaan a' kallaattan.

⁴ Kuyyaasetiiyyi orra ishina kojeessa ka qoosan saara pooyta' saarsha ka kida, “Ha ino piisantin panne Waaqa ka paatinno piisa pashshe orrase ino pooje ka kodeetinno pootade.”

⁵ Semmalla awta piitoose samayta Waaqati' daassamtooyye, ishina oppaayye qoottota a' qapnaattan.

⁶ Xuumampayaasso i'ana' kiini, “Wa ino qappada in caan umma jeera asse paho ino qara in kayooy, pora ino qara xuuma in haasawadan.”

⁷ Ka kaassanni ka kiiniiwwi, “Hela ishina hellaa Yayqoopiiyyi, wa asse paha' haasawatta iparpaaccisni? Hela duupatta Waaqa ipirama qapa? Hela xawwi isha' keeto ino pashsha? Hela Waaqa orra wa fayya' koonoti in sako?”

⁸ Waaqa ka ishootta' oorshe ka kide, “Samaytiyyo qara'e paarkaaluman xaaten ka orra' kide, ‘Piita nakayta.’ Ka a xaayshoti ishin oppan tarpino quda mehadda saratten.

⁹ Ka samaytiyyo kelaayye tikkaasso a fayya oppa iskatta alle' daanten ka hellaasso haka paraparati' sakiyyo kapa sekassen.

¹⁰ Porose are co qoota juppootaayshinan nyale malla, akka a' pirammini'i, piisse oppa xa'a ka alle aana.

¹¹ Kadi nama takka paata patta torrino qoota taadeta wayneeta ka ikkayta orra maashshannooti desa orra kollinna, isha orrooseti xuumampayta kodda' ettana.

¹² Waaqa ikiini, “Ishina pateetta kela pahe, akka kaharra moonnappa ca isho akka xelloota dawwatte ollopa tiitaawnitto mina'e, peela samayta Isira'eeli kela hase'e ollopa oorsha ikka piitoose' qara immakan.”

¹³ Waaqa samaytaadi tura xarra pana, ishootta ka saantose oppan diitmadan, isha ka mattaadi nuqusaaysho kodda ka tura' qata ka ishoottan aana.