Xuuma Mikkiyaasi 1 - Mataafa Qulqulloota

¹ Xeltase a nuqusa Yihuta Iyyo'ataami ka Akaasi isho Hisqiyaasi nuqusumeneeyye, Waaqa nama takka a piita Mooreti Mikkiyaasi kidammo'e qoota piita Samaariya isho a Yursaalamiti desa erkanoosen lele.

Nyarrahata Yursaalami isho Samaariya qara' deeto

² Waaqa Poqalla isase piisa qara qapo tikaadi a qulqullootati xata ishin qara' maakkumaay, samayta piitatiiyyi isha kela' napahata kata; piita piisa nefo ka wa isha' kiina napahata karopa pohatto.

³ Ha Waaqa porase a oppa kalo xata lekkada; ka are piita qara irrowwa qara a'aana.

⁴ Awsetiiyyi akkima shaha apittan liillaan mina'e, irrowwa ka isha kela liilan; ka akka pisha takeelan xata urqinaan mina'e urqan; kunkunnawwa kuli ka qitqitan.

⁵ Sede piisa, qoota dapa Yayqoopi ka juppoota hellaa Isira'eeli' koopte malla asse koddita. Ata ayno hellaa Isira'eeli' dapoppopa kalshe? Neequmta a katamaasene' xaaysho a Samaariya'enne? Ata ayno orra Yihuta akka kunkunnawwa qara killowwa' sakatado' kodeew? Katamaasene a Yursaalami'inni?

⁶ Semmalla Waaqa ikiini, “Samaariyaan akkima tikka pootene ka ollopa tuulene' mina' koda; ikka eenna oppa' wayneeta dishannaane' koddita. Dakaddasene a ishin qupamte'en kara poota ka takeela kelopa alle' tuqa ka kirittaadi kuli kela sooksha.

⁷ Killowwaadi imoojaman, daassatase almalewwasene' xaadi tikase a killoota kara caati' dehaatte piisa apittan kupada, pahanadda a qaatisatte' piisan alle' pashsha, daassawwa a almaluman ollopa pootatte asseew almaluman piraman.”

Pateetta Yihuta qara' deeto

⁸ Sekkammaayye Mikkiyaasi ka kide, “Qootose' mallan pooya ka kida, ‘Oo ana qayte!’ Ka nyarrahatiyyo akkissa'e, mehadda a kalsannaane isho xopa mali qulle qumqume pora aana ka a kutta' mina pora aluula ka a punsukkayta' mina pora iyya ka nessiyyo a pooyta' dakaytisha.

⁹ Ha faykitteeta a Samaariya in dinto, rakkoose' nefo ka Yihuta qara' kayte ka xarra a katama Yursaalami kulipa tuullite.

¹⁰ Orra piita Keetti paarkaalaannooy, rakkoota ino qara' kayte ishootta'en lelan' umma kapa pora in pooyan. Ma xoori orra piita Peti'ofira orrinnooy, oto' kapa kaytaneeyye pora pooya ka leyan isi dakka!

¹¹ Ishina' samayta piita Shaafiri' koddeetiiyyi, a mehadda a' kalsannin mali jeeran asse qulle qumqume poojama ka aana! Orra piita Sa'inaani' paleeta kara in sookan, piita Peeti'eseli mattaadi pooytoppa kittaay, ishinan paha in ettanisso.

¹² Waaqa Yursaalami pashshaay, orra piita Marooti xawwi atta' kippanni ka kiini, “Wa paxaara'e' ino de'a!”

¹³ Ishina' orra piita Laakiishi' qoota' dapa Isira'eeli' paho kooten orra Yursaalami ka juppoose ishin kela kollade malla, fartada a oranna kamma sarakella hiddada!

¹⁴ Samayta a Kipsi nuqussa Isira'eeli sassapanni; ishina samayta Yihutaatiiyyiiw, paleeta Moresheeti a Kaatiti'i, “Nakaytan qaa'ina” kida ka daassata ishootta' daasha.

¹⁵ Samayta Merisaatiiyyi, nyaapan ishin oppopa erka, saarrasene a Isira'eeli ulfeessame ka rahana a piita' tuulame kara deddekadan.

¹⁶ Ishina samayta Yihutaatiiyyi, hellaassina a' jaalannittane' qoota poojaman malla, ishootta' daptisada ka matta isqara koosha ka akka kuyso allitta' mina muduldulsada.