Xuuma Hisqeeli 9 - Mataafa Qulqulloota

Akka Yursaalami' qatta'amte

¹ Sekkamma an dakaynooyye ikka nessaadi kuttisheew ka kide, “Ishina a katamoosen pashsha' xooya ka meehase' xaayshin a oranna paata patinno qapada.”

² Tin nama lehi a matta mina meehaaysho a oranna harkoppa' qapade ka qinda qutattati xarrase ela qatooyye xata deeni; ishootta qudaayyeew, nama takka mehadda qaaha kalsade ka koroja a meeha taafeta surraappa' hiddade ka caaw. Ka kullen ka porase a kalisoota silpa kapa qa'aden.

³ Sitiiyyi ulfeena a Waaqa Isira'eeli ka kirupeeletase a qara' kuti'e qaraayye xa'e ka xarra tika qulqulloota oppopa aane; Waaqa ka namase mehadda qaqqaaha' kalsade ka koroja a meeha taafeta surraappa' hiddade hale.

⁴ Ka ishi' kide, “Katama Yursaalami' piisa oppa a'aane ka nyalasene katama kara' kodde minanne, fuula orrase akata nyarrahe oppa' milikkita kode.”

⁵ Ka an dakaynooyye namase lehi' kideewwe, “Isha kamma' qata ka katamaappa pora aana ka leysha; umma karittaayshin nama takka nefo in suraysannin ka nama takka nefo'en nyarrahanin.

⁶ Qimaya ka xayyoolayse a diira ka tuparra isho iskatta ka hellaa shashakka' piisa leysha; ma nama a milikkita qapo takka nefo quda in kayan ka tikiyyo a qulqulloota kara paayya.” Ikka qimayaasene tika qulqulloota tura ca qara paayyen.

⁷ Ka ishootta' kideewwe, “Aana ka tikiyyo a qulqulloota nyalsha ka paapahadda pukkaan immaka!” Ikka aanen ka a katamaappa ca' leyshen.

⁸ Ete ishootta lennaan anti ka xawwaati haseeyye, piitopan pi'e ka fuula piitan kaye ka ullupe ka kide, “Oo ino kido! Waaqqo ke a piisa qara qapo! Hela asse' miiraayti Yursaalami qara' tuqta ka peela Isira'eeli' piisa pirta?”

⁹ Isha ka ana' kide, “Juppoota a samayta Isira'eeli isho a Yihuta akata koopte, piita ka diikan immakaatte; katamadda ka mura dukaata' dapeetan immakaaden. Ha ishootta ikiini, ‘Waaqa alle'e piita diishe; Waaqa umma ino akkini in co.’

¹⁰ Ma xoori anti kodaaysho kapa'en ishootta qatta'a diisheey iltiyyo ishoottan suraysatto; umma karittiyyo ishootta'en nyarraho.”

¹¹ Tin namase mehadda a qaqqaaha kalsade ka meeha taafeta surraappa' hiddade ka tiitaawe ka kide, “Wa ana ajajte in dikkishe.”